ثلاثيات من الواقع الليبى...للضحك فقط

ثلاثيات ليبية

ثلاثة يتمنهم الليبيين: السكن في طرابلس ... والعلاج في تونس.. والوصول لسن التقاعد.

ثلاثة ما تحلمش بيهم : السفر للسياحة ... وتصيف مع عايلتك ... وكأس العالم في ليبيا.

ثلاثة لازم نتخلى عليهم : التفنيص ... والتلقيح ... والبني خارج المخطط .

ثلاثة تسبب الإحباط : الواسطة ... و الديون ... والمنتخب الليبي .

ثلاثة يرفعوا الضغط : الملح ... وزحمة المرور ... والعيل كان عشش .

ثلاثة تسبب الغرور : الفيلا ... والهامر ... وبدلة الحرس البلدي .

ثلاثة مايقبلوهنش الليبيين: التعليم ... و المصريين ... والكندرة المقلوبة.

ثلاثة ما يرقدوش الليل : المديون ... والخانب ... وواحد نايضة عليه السوسة .

ثلاثة شبه اختفوا من ليبيا : الدلاع الطويل ... واحترام الشياب ... والفراشية .

ثلاثة ما تحسش بطعمتهم الا في ليبيا : شاهي العائله... ومكرونة على الحطب ... والبومردم

ثلاثة تدعو لهم بالهداية : البلعوط ... والحسودى ... واللي يشجع في نادي الوحدة.

ثلاثة ما تستغربهمش في ليبيا : واحد قاص السريع على كرعية ... وواحد يسوق في الاتجاه المعاكس ... ومتعين وعمره عامين.

ثلاثة تتمنى ما تتصبحش فيهم : سواق افيكو مستعجل ... وطابور طويل في الشيل ... ومديرة المدرسة وفيدها عصا.

ثلاثة ما تعرفش أمت تخشلهم : السجن ... والمستشفى ... ومكب القوى العاملة.

ثلاثة ما ليهمش معنى إلا في ليبيا : العسلوز ... والزميتة ... والعصبان .

ثلاثة ربي يفكك منهم : مجاري مفتوحة ... وكلب مطلوق ... ورشادة طايشة

ثلاثة ايديروا فيهم الليبيين بس : الهروب من الأحمر فى السيمافرو... والذفال على رأس بمبة الغاز ... وتنفيض فرشة الاكل من الروشن.