مقالات مختارة : محمد بن سليم ,,,,, فِك المارشا (5)

من طرف **dude333** 2012-05-21, 4:06 pm

محمد بن سليم : فِك المارشا (5)
21 مايو 2012
فِك المارشا مجموعة من الخواطر تحكي عن الهموم الحالية للمواطن الليبي بطريقة ( هم يضحّك وهم يبكّي) ، ومعلش يسامحونا جماعة اللغة العربية لأن (فِك المارشا) ح تكون بالعامية لأنها زي الهدرزة بين اي اثنين ليبيين …
ــ ماشاء الله يا سي .. لاقوة إلا بالله الانتخابات صاح؟ .. تراه صبعك يا صاحبي؟
ــ عليك قصة .. تي حرام ماعدينا انتخبنا مع بعضنا .. اهو صبعي ياسيدي والحبر قاعد مفنّص .. مش عارف كيف يحولو فيه .. اجدد عل الانتخابات ياسي..
ــ هههههه ياعليك جو وخلاص.. لمن عطيت صوتك ياعمو؟؟
ــ فكنا من الجو عد .. توا يطلعن النتايج وتشوف الجو بروحك .. الحمد لله الفرز قدام الناس ويطلعو علينا البنغازينو الصح بيش يمشّو أمورنا ياراجل خلاص ماصبرنا إلا واجد .. درّس درّس عل اليمين .. خلينا ناخذو شوية طعمية وبطاطا نمشو بيهن في الطريق ..
ــ طعمية وبطاطا؟ باهي خير من بلاش ..
نزل صاحبنا لمطعم الطعمية .. وقعد صاحبا ورا الدومان يسمع في الراديو وأخبار انتخابات (بنغازي) وطبعا كالعادة وأنت مدرّس يخطمو عليك وحدين تعرفهم وين ماكنت في المدينة .. اهو واحد صاحب مخطم بسيارتا ويبيّب :
ــ حمادينو .. شنج يابوها .. تي وين الحبر ؟؟
يضحك صاحبنا ويطلع يدا ويشير بصبعا اللي نصا حبر بيش يأكّد لصاحبا أن مشى وشارك بالانتخابات ..
ــ هااا عيش هي .. طعمية وبطاطا فرششش .. امغير افطن للطريق بس ..
طلعو الشباب بالسيارة وهما يكسدو عل الطعمية والبطاطا .. وفي نص الطريق وصاحبنا اللي يسوق معبّي فما بطاطا قال لصاحبه :
ــ إلا قولي يا .. توا بعد انتخابات (بنغازي) شن يبي يصير في الانتقالي؟
ــ تي هكي ولا هكي الانتقالي شهر اخرى وتقولا عظم الله أجرك .. تشاو معش فيه انتقالي ..
ــ بالله شويه طعمية في يدي .. خير مانخبطو في حد .. باهي شن نقولك .. مش المفروض ان الجماعة اللي في الانتقالي هما أصلا أصلا من المجالس المحلية على مستوى ليبيا ولا أنا غلطان؟
ــ مزبوووط ..
ــ باهي معناها توا اللي يبو يطلعو من انتخابات (بنغازي) معناها المفروض يخشو للانتقالي .. ولا أنا غلطان؟
ــ مممممممم .. والله كلامك صح .. شكلها الطعمية فيها سر ..
ــ تي أوكي يا بانيه .. خلينا في موضوعنا .. باهي مش الانتقالي هوا اللي حط توزيع الكراسي في الانتخابات الجايه بتاع المؤتمر الوطني؟؟
ــ اااه واللي صايره عليها دوه واجده بيش يعدلوها .. لكن هات من يسمع ..
ــ اهااا انت قلتها .. ماهو بعد مايخشو الجماعة اللي انتخبناهم من بنغازي ويخشو للانتقالي .. وغيرهم من باقي المدن يخشو حتى هما للانتقالي .. مش بلكي يطالبو بتغيير الكراسي للمؤتمر الوطني الجاي هذا؟؟ مش بلكي تخش في بعضها جوا في الانتقالي ما بين وحدين جايين بالانتخاب ووحدين قاعدين بالتعيين وما بين وحدين يبو التقسيمه الحالية للكراسي ومابين اللي يبو التعديل؟؟ ما وقتها حتى هما يقعدو أعضاء بالانتقالي وكلمتهم مسموعة .. ولا أنا غلطان؟؟
ــ ياراجل امغير وحّد الله .. فيش اتقول انت ؟؟؟
ــ انت خليتني ندوي من بدري وكمّلت الطعمية ..
ــ توا انجيبلك اخرى امغير درّس عل اليمين وفك المارشا واشرحلي اخرى اللي قلتا توا …
محمد بن سليم