قصيدة التحرير

من روائع زكريا اللبيب
عندك علم يا بوى
https://www.youtube.com/watch?v=JF3gNopkDHI

عندك علم يا بوى باللى صار !! ...... فى بلادنا طغـيان .. ظــلم و جور !
عندك علم باللـــــيل ولـلا نهــار ...... و الشــمس زايد ناقصة بـ تثـور !
قمع و قتل والناس تحت احصار ...... تعذيب مسجون و ذبح مأســــور
جند الكـــتايب نوع مـ الكــــــفـار ...... مابين مجرم وامعة و مسحـــور !
يوم هاجــمونا فى ارتــــال كبـار ...... و الراجمات تقـــول يوم الطــور !!
دهم المنازل و الهــتك والعـــــار ...... و قلوب مصراته تفور .. تفــور !
خطف و حبس حبسو المية فـ دار ...... فى حاوية .. حتى الهواء معسور !!
ماتو خنق .. ماتو حرق شن صار ؟...... فى الزاوية..شى يقهر المقهـور !!
و اجدابيا تحت القــصف والنــار ...... و السوق طلعو عـــاريين صـدور
و عند الجبل والنــازحين اكــثار ...... يا بوى عاشو دمـــهم مــهـدور
لو ريـــتها امناظر جــتت تنهار ...... وتحسها دموع الثكالى بحـــــور
و الدود فى لحم الضحايا احـــتار ...... ضاق المرارة و باتــله محـسور
و اجساد تحت الحـــــادها و الثار ...... فى خاطرى يا خاطرى المكـسور
فى كل زنقة الموت , دار و زار ...... بين القبر و القبر ... فيه قبــور !!!
حتى الشهيد اللى احترق بالنار ...... عندك علم يا بــوى وجهه نــور !!
و النور نور الله كـيف اخــتــار ...... من بينا فرحـــان و هو مـبـــتــور !
نحسابها وحسبة حسيب الضار ...... يحساب ربي حاسبه مضـرور !!
و حساب من حاسس حسابه حار ...... ساعة سعير اسعالها المسعــور
غَــبَاوين !! من يقدر يجيرالجار ...... من جاير امجرر جيوش الجور؟
لايام دارت رغم ياللى انــــــدار ...... شوف الدواير بيه كيف اتــدور !!
لله طـــلعو ارجــــال من الثـوار...... سبحــان من خلا الليــبي يثــور !!
على طاغية على قصة استعمار ...... و ختــــامها بالدم تسعـــة شهـور
و ختامها يا بوى كـيــف انــهـار ...... راكع مطـاطى هامــته مقـهــور
ربي كبير و فـــوق كل جــــبـار ...... يمهل و لا يهمل عـبد مغـــرور
يا ليبيا دونك ضنى المــخـــتار ...... دونك ارواح اليــــوم بين الـحور
ردو الظلم واالضيم , واستهـتار ...... من كان حُكمه .. حِكمة الساطـور
تاريخ تحريــرك صبح تـذكـــار ...... يوم صار ليك الحكم , بالدسـتور