مرايف علي برقه

مرايف علي برقه
*************
مرايف علي برقه انريد عربها
والعين شورها عرق الغلا كاربها

بجدابيا تبداها
وطن السعادي اللي اجواد ضناها

وتهلب علي سلطان في ممشاها
عريبات فيها زايدين طربها

وشط البدين منيطقه محلاها
انكان صيف تكي وذوق عنبها

مشيطات هلها منطقه تتلاها
رقطه منها لوعتي وسببها

وتخطم علي المقرون ما تنساها
ايسارك سلوق ايبانلك مسربها

وكلا قمينس فرحها وهناها
عوقاير خوت الجد ما تهلبها

وكمل مع قطرانها و وطاها
اصبيحات تلقاهم اوجوه عربها

وتلقي بعدها عزها وغلاها
بنغازي الفزاعه انصار كربها

دريانه وبو جرار مانسيناها
وتجيك العقوريه بعد تهلبها

للمرج عدي طول جر معاها
طاست لبن في وسطها تشربها

قصر ليبيا والكوف تو تلقاها
البيضاء بعدها طيبين عربها

و اهلب علي شحات جول احذاها
و اطلع علي سوسه وما تحجبها

جول ابنظرها العين ما تنهاها
في وسط درنه قهوتك تطلبها

لطبرق اسقٌد توا اتجيك وراها
امساعد خلاص اقدع ولا تهلبها

وفي شي واجد مالرياف انساها
العين رايفت واريافها غلبهاا

كمال العريبي