قصيدة (( خــدودك))

الشاعر المرحوم روفه الدعبوب الرفادي
قصيدة (( خــدودك))

اخدودك على لون الشمس الطياح
وعيونك سماح
ودورك عراجين ع الصدر سماح

اخدودك على لون الشمس الغروب
عشه اهدوب
سواد عينها مر داء للقلوب

وصوته مواويل والحانها اطروب
فيهن اشراح
كمنجى ضبط ربط وتره وناح

اخدودك على لون شمس المغيب
ودورك خصيب
يابخت من لك فيه جارى نصيب

صفا بينكم حب كي صفو الحليب
طويتوا اصفاح
انسيتو شقاء هول ماضي انزاح

ويا تعسن من فيك حظه أيخيب
قليل النجاح
أيعانى مع ظيم مر الجراح

امعارك ومديول وماله نصيب
ونزع الرماح
أيلين اللي قبل كانوا اكساح

اخدودك على لون شمس المحج
ودورك اندج
كسي الصدر وين فوقه ارتج

وصفك على وصف هامل الفج
عفي المسراح
تناير مع دير فيه قزاح

اشاوش مع الحلو شال عينه ولج
له زول لاح
سند عالوعر قطع فات السماح

وعينك على عين شاهين فرجه ادرج
سالم الجناح
اطوطحيها وين تك السلاح

تسلم اخى عبدالحفيظ