منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» جحا والقاضي
أمس في 10:32 pm من طرف فرج جا بالله

» كرر ياعلا .. اوقول اغياب لبّاس العبا .. ضر الوطن
أمس في 7:41 pm من طرف naji7931

» "بنغازي" ابرز ماجاء في المؤتمر الصحفي
أمس في 6:02 pm من طرف عبدالحفيظ عوض ربيع

» داعش الإرهابي يعلن عن عملية نوعية
أمس في 6:00 pm من طرف عبدالحفيظ عوض ربيع

» تم نقلهم الى المرج
أمس في 5:55 pm من طرف عبدالحفيظ عوض ربيع

» ماتم الحصول عليه من ارهابى الشركسى
أمس في 5:49 pm من طرف عبدالحفيظ عوض ربيع

» صنع الله ينفي وجدو مرتزقة أفارقة في الهلال النفطي
أمس في 5:39 pm من طرف عبدالحفيظ عوض ربيع

» إجتمع رئيس الحكومة المؤقتة "عبدالله الثني"
أمس في 5:33 pm من طرف عبدالحفيظ عوض ربيع

» 6 غارات جوية مكثفة على تمركزات ميليشيات الجضران
أمس في 5:31 pm من طرف عبدالحفيظ عوض ربيع

» العافية بمدينة هون يستقبل عدد من الجرحي
أمس في 5:26 pm من طرف عبدالحفيظ عوض ربيع

» تقدم القوات المسلحة العربية الليبية
أمس في 5:24 pm من طرف عبدالحفيظ عوض ربيع

» شاهد قناه الكذب النبأ
أمس في 5:22 pm من طرف عبدالحفيظ عوض ربيع

» إقاف عملية حجز المواعيد في منضومة حجز مواعيد استخراج جوازات السفر
أمس في 11:02 am من طرف STAR

» التوزيعات النقدية لفروع المصارف التجارية بالمنطقة الشرقية للمصارف
أمس في 10:12 am من طرف STAR

» هل تنوي زيارتها قريباً؟ إليك أفضل 10 مدن ملاهٍ في أميركا
أمس في 9:47 am من طرف STAR

بحـث
 
 

نتائج البحث
 


Rechercher بحث متقدم


الجزء الثانى من ملحمه (ما زلت نا هو نا)

استعرض الموضوع السابق استعرض الموضوع التالي اذهب الى الأسفل

الجزء الثانى من ملحمه (ما زلت نا هو نا)

مُساهمة من طرف dude333 في 2016-07-10, 9:54 pm

الجزء الثانى من ملحمه (ما زلت نا هو نا)
من القصيده رقم 6 الى القصيده رقم 12
 
(ما زلت نا هو نا) الرويعي الفاخري القصيدة ** السادسه

........................................................
 مازلت أنا هو أنا .. لا درت حوش ولا خديت مراة
مكسور خاطري
*****
مازلت أنا المنحوس .. لا درت حوش ولا رصيد أفلوس
نجري وراء سلفة أنحوس أنحوس .. لا قرض نبني ولاشريت وطا
ولادرت بزنس ولا دهب مدسوس .. والحال أهو كل يوم وراء
مازلت أنا هو أنا .. لا درت حوش ولا خديت مراة
مكسور خاطري
*****
ما بنيتش حوش .. ولا درت كوشة ولا محل بريوش
ولاني أسطا في الغش والمغشوش .. سوق التجارة ما معاي مشا
ومانيش مطرب في ألاعراس أنشوش .. مبحوح صوتي ما أيفيد غناء
مازلت أنا هو أنا .. لا درت حوش ولا خديت مراة
مكسور خاطري
*****
ما هناك أمان .. لا قرض مصرف ولا معاش ضمان
ولا مصلحة في فلان وألا فلان .. أصحاب مصلحة ما خير فيهم لا
واللي قليل البخت والحفيان .. الله أيصبرة ما خاب فيه رجاء
مازلت أنا هو أنا .. لا درت حوش ولا خديت مراة
مكسور خاطري
*****
ما أتقولش قال .. من قبل مايل ميل بختي مال
والحال أهو كيف هو الحال .. لا أيسر صاحب ولا أيسر عداء
ومازلت راجل حالتي بطال .. أنزور المصالح بين مشي وجاء
ومازلت نرجى بوغثيت أطوال .. أم السوالف عالكتوف كساء
بالك في يوم بتنقلب ألاحوال .. وتفتح أبواب الفرج بعد عناء
وتنفك عقدتي وأيحلها حلال .. يامولاي يارب السماء
مازلت أنا هو أنا .. لا درت حوش ولا خديت مراة
مكسور خاطري


 
(ما زلت نا هو نا) معتوق ادم الرقعى القصيدة ** السابعه
....................................................................
ما عاد نا هو نا ** الراس انبيض والجسم فيه خيا   والعين ضببت
....................
ما عاد فى مقدورى  ** نقضى بلا واحد معاى امورى
ولا عزيز كى نخطم ايبهت شورى **الغالى ابقى ودّه معاى جفا
اللى قبل ما يزهى الا بحضورى** ما اتقول ف الدنيا امغير انا
اليوم وين قابلته وقمت بدورى** سلام ود صافى والسلام وفا
ما اهتم، خاطبته بصوت جهورى ** وبلوم قلت له مازلت نا هو نا
حد فزعته صبّا وبهت شورى ** تبهيتت انكار وغيض واستهزاء
على طول راطنّى بقولة(صورى) **متعارفين شى قبل والا لا
سبحان ويش غيّر وجهته من شورى**وعهد بينّا تما االيوم هبا
الدنيا بماضيها مواعض تورى**غير عن مواعضها الحى سها
ونا قبل ديمة هاديات بحورى **ما دردرتهن زوبعة هوجاء
بين ولفتى عايش سنين حبورى ** وسّامين قيم السيف ع الشوماء
فى طفولتى ياما رضيت غرورى **ونا غيت نور الشمس والجوزاء
فى ربيع ترفاسه لنفسه يورى **فقّاعه على جنبه حذاه رمى
ياما تخيّلت الزهور زهورى **وعشت بينها ياما ايام زهى
وياما تصورت الطيور طيورى **ان جت اسراب بين وطاه بين سما
انكان قرّبن منّى ايزيد سرورى ** وانكان باعدن عنّى انطاردها
ما عرفت لا مستر ولا سنيورى **بين الغزلا عشت فى صحراء
انكان جعت من خير التمور فطورى **ونشرب حليب النوق فيه شفاء
صوت الفطايم والرحاه الطورى **مونسات ما نرتاح غير لها
ووين ما بلغت الرشد تمّا دورى ** افعال خير منها ظاهرة وخفا
ان جونى على حاجة وفى مقدورى**لا انشك لا نوعد وعود خوا
انكانت صواب انديرها من فورى ** وانكانت خطا نجزم بقولة لا
وكى اشرفت ع السبعين قل ظهورى **وقلّو اصحابى من ضنا حواء
فيهم اللى بالدار ماهم شورى ** وفيهم اللى ودّع مشا ما جا
ومنهم اللى قاعد حذاى مقورى **غير ما ايسوقنى عليه خطا
وبقيت كيف بوقدّاح خافت نورى ** نا والعجوز مبروكين سواء
مالى مثيل امفيت عامل كورى ** مالى من غير المعاش رجا
نحسب قروشة فى عقاب شهورى** نلقاهن امقدّم رايحات هبا
ونا ان قلت شعرى وارتضاه شعورى**انقوله وما نهتم له بصدى
....................
لا انريد صاحب شان ينظر شورى ** ولا انريد شكر ولا انريد اكفا
انكان عشت ربى هو كفيل امورى **وان متت يوم قبرى ما انبات خلا
ما عاد نعرف ناسى**  ولا عاد نفرز م الحديد نحاسى
ولاعاد باصحابى عمر مجلاسى ** اللى موتوا واللى قعود احياء
اللى اليوم نسيونى ومانى ناسى ** وراحوا مثيل الرش فى الظلماء
وين يخطروا دمعى ايجى متماصى** تقول سيل فى نوّة عقاب شتاء
ونا كبر سنّى والمرض وافلاسى ** دايلاتنى دولة سيول خلاء
اتعاب المعيشة والزمان القاسى **داهكاتنى ما عاد فى عزاء
الا بوحداجة ع الكتوف مواسى ** من زمان لا جيته ولا هو جاء
اللى خدها يشبه البرق الساسى **اللى جا ايشكّع فى غيوم مساء
حكاية غلاها كيف جت فى راسى **ونا كنت حالف ما اندير غلا
لى قريبتى لا ناسها من ناسى ** لا نا ندايد ف الاعمار سواء
مقاييسها ما ايطبقن مقياسى **غير بهدلة رايد الله بها
هى عايشة فى عزها صقّاصى ** ومى عابية لامثالنا بعبا
ونا الحيل بارد والظهر متفاصى **وما عاد نسمع من بعيد اندا
وهى ترتشق كيف الغزال الماسى**ونا الاربعة دوبك انوض بها
وهى دورها وقتا ايميح اكداسى **  كثرة مخابلته اتزيد اغراء
ونا للمراة ان جيت نمشط راسى ** نلقاه قعمولة ناشفة م الماء
ولا لبسها باهت مثيل لباسى **وان لبست الباهت ايزيد زها
ولا انفاسها ف الطيب كيف انفاسى **اللى بالبصل والثوم مشحونا
هى عالية ف الموج وانا راسى ** الفرق بيننا جوبة سما ووطا
ان جت فايجة فوجة الصقر القاسى **اللى ع القنيصة صلّطوه اعداء
تفاصى اللى من قبل مو متفاصى ** واللى عقولهم كيفى تريح هباء
قنيصة لها ياما نصبت اقفاصى ** مابت اطاطى يوم ع الحوما
هى مقنصة وانا جفا مقناصى ** واللى امقنصة ديمة اتريد عفا
افرض انسايسها وكنت سياسى **وهى وافقت وانا فرحت بها
ورسمن ليالى عرسها وعراسى ** واندارت اللى تندار ف العادة
بعدها تقول احصلت فى هرماسى **لا مال عنده لاو عشير هناء
شايب امقنب ف القروش ايواسى **وان ضاع الجنيه منّه ايطيح اغماء
....................
م البخل فى عدة امراض ايقاسى **انكانهو تغدّى ما ايذوق عشاء
وانكان غرت شى  يوم وخبطت مداسى **ودرت كيف بومزود لتاورغاء
وقلت الحجاب اخذيه شرط اساسى **خروجك بلا لبس الحجاب خطا
تقوللى خطانى ما اتدوخ راسى ** ملّيت من سخافاتك الرجعياء
عرفت عاد هروكتى وخفة باسى ** وترقيع الخطا بالخاطيات خطاء
ليش عاد نضرب فى الحديد بفاسى ** معازاة فى اللى ما ايقيم عزاء
قلت خير لى عنها انواطى راسى **ومواطاة راسك ع العنيد هناء
نصبر ونجرّع مرارة كاسى  ** مرات المرار يكون فيه دواء
ونبعد على الخناس والوسواسى ** ونقول ياالله الستر فى الدنيا
الا الاخرة فيها نصيب معاصى ** ولها كريم باحسانه ايبدلها
والدنيا قديمة ف الحفاف اتواسى **وما تغريك فيها ايام زها
بحرها، العايم فيه كيف الراسى **عقاب عمرهم تحت التراب سوا
ياتعس من طغى وقلبه قاسى ** وياسعد من داير الدين وتا
وقايم فروض الله صابح ماسى **وبايت على نعمة الله ثناء
وكلام النبى والذكر ماهو ناسى ** اللى فيه لامراض الصدور شفاء
....................
ماعاد نعرف بابه **اللى قبل يزهى بى ونا نزهى به
ولا عاد لو نحرث اتجينى صابه **ولا تجارتى منها قنيت نماء
نحسابها الا تجرة وفا ونقابة **وتاتى لصاحبها بكل سخاء
لقيتها مثيل الخيط ف النشابة ** ايصيب الهدف مرّة والاكثر لا
خذيت دفترى فى عام درت حسابه **لقيت النتيجة بهدلة وشقاء
ولقيت دينها داير على ضبابة ** وديمة معايا كى حمار جحا
رميت دفترى كى رمية الحطّابة **اللى حطبت تنوى اتدير عشاء
ووين روحت لقيت امغير ترابه ** حتات العشاء شاله اللى شاله
الحاصل تجارة سمسرة ونصابه **حشاك كيف تجرة الارملة حواء
اللى لها زباين كلهم سلّابة ** ايقايضوا لها فى تمرها بنوا
قلت خير ها السريب نقفل بابه **ونقول الرجا ف اللى كريم عطاء
والوقت راه كيف الريح للنقلابة ** لازم اتعيشه كيف ما تلقى
ياما صبرنا وين كشّر نابه ** وياما نظرنا من ايام صغا
وياما احملنا جفوته واتعابه **وياما اقصرنا عن غذا وعشاء
وديمة الله كريم واسع بابه **حتى وين تضايق ايفرجها


ما زلت نا هو نا) عبد الجليل سيف النصر ** القصيدة الثامنه
.............................................................
سبيل عادتي ما زلت نا هو نا ..عنوان للصمود ورمز للتصدا
ما زال شامخ خشمي .. وما زال يدالف هوايج طشمي
وما زلت نغشم كي تجى للغشمي ..عنيف صلب ما نقبل بالاستخذا
وما زال يصعب بالنقايص وشمي .. عصيت عالتمنديفة وعا لتغوا
وما زال في عينة المولى عشمي .. قوي بيه نتقّى جميع بلا
وما زلت هشمة من تشاهى هشمي .. وما زلت للبغضى امراض الدا
**
ما زال سيفي ماضي .. لاوما زال ع الطاغي عناف غياضي
وما زال حرفي ومنطقي والفاظي .. لاخطوط نار ممنعهن علي التخطا
وما زال مزمومة زلال احواضي .. لاسبيل للضمايا في شحوح الما
وما زال تفتيح الزهر ف ارياضي ..لازها للانظار وللاشمام شذا
وما زال شوافة اكنان الحاظي .. رود للارجاع ومحذرا لسوا
وما زلت نستلهم امجاد الماضي .. وما زال ليا بالجديد عنا
وما زلت ما نرضى ولاني راضي ..علي من تعدى ع الحقوق سطا
وما زلت لا لحظة اوخاذ اغماضي ...ونا للمبادى الساميات وفا
وما زال لو نحيا نصيع بياضي..ولو نموت لاستشهاد لي احيا
**
ما زلت رافع راسي..وما زال عودي في الطقاشة قاسي
وما زال فيا من مآثر ناسي ..عزم وعصر بيهن شبع وروا
وما زال ما يامن خصيمي باسي ..وان كان انتبشت العاصفة النكبا
وما زلت مرهف للضعيف احساسي ..وما زلت ع الطاغوت نار حما
وما زلت ف آلام الجريح نواسي ..بكل ما اوتيت وما الله عطا
وما زال نبات النما تغراسي.. وما زال وهجي ف الاحلاك اضوا
وما زلت من راسي لطرف مداسي ..نقي م الشوايب ما هواني دا
**
ومازلت نا هو نا
مصير من اشعبط في حفف مهراسي ..وجاه دق ميجنتى يريح هبا
كبار الزوابع ما تغابر ساسي ..يا بال زيطة محترف تفسا
**
ما زال فيها شادد .. العروة الوثقى وفي القديم نجادد
وما زلت من موقع صلابة مادد ..ايد طاهرة للي عمار نوا
وما زلت في فتوق الافتان نسادد ..دابين فيه مجال للتتقا
وما زال ع الظلاّم سيلي هادد..ان هاضن زعابينه عنيف انوا
وما زلت في منشد صواب نرادد بنبرة.. جهيرة موش باستحيا
وما زال ع الجملة حواحي بادد علي .. حق وعدل ومساوا
وما زلت لومة من يحبوا عادد .. وما ز لت داير كبد ع التخوا
وما زلت وصلي في الودود نوادد .. وما زال عندي لمن جفا لجفا
وما زال ع الباطل عدايا لادد اقدامي .. رواسخ والاعصاب قوا
ما يثير وجداني شطيح مهادد .. ولا نلتفت يالا نبيح جرا
**
ما زال قشط احلاطي .. وما زال تشكع ف الحلاط امشاطي
وما زال لاو بارد ولاهو راطي .. بارود لو مني فقص ترزا
وما زال لو ننوي ندير طواطي .. يطولن طناطنهن اجها وانحا
وما زلت رفاض الخطا م الخاطي .. علي علو حسي نقول كلمة لا
وما زلت من يومة حلال قْماطي .. وعظمي علي نفر القيود نشا
وما زال ما ننزل ديار مواطي .. وسيع كم سامك في شرف لعلا
وما زال ياسع للجميع بساطي .. بشرط الطهارة فمن عليه وطا
وما زلت طيب لو بصفو خلاطي .. وما زلت عصلب فتك ع التلوا
**
ما زلت نا هو الأول وما زلت .. في جنان الشرف نجول
وما زلت لا نحرف ولا نتحول ..عما اعتقدت ولا نرد ورا
وما زلت ف اسعاي الصلاح نمول .. لين تتبادن مجنبة وذرا
وما زال ورورتي بعد نصول .. اطّرطش زبادي فايرة تحما


           (ما زلت نا هو نا) علي الساعدي سعيد الفاخري
                                  القصيدة التاسعه
                             ............................................


يا حاج فرقت نا .. من بو غثيث أتقول غيم أشتا.. رجاي منقطع
يا حاج فرقت حالي .. مع بو سوالف عل الضمير مدالي
لا عاد نشقابا ولا يشقابي .. حتى لو بكيت بدمع فيه دما
علي وين ما يخطر سريب الغالي .. ما عاد إيجيني نوم تحت أغطا
وناخذ الليل ونا أمغير أنشالي .. ويبقى قول حالتي هابا حفا ونقا
يا حاج دونك بررح .. جضر وياس متستاصل أمعاي امررح
لا أنغبت نشغل لا أنجيت أنفرح .. الدا كبر ما عنده هناك دوا
ولا عاد أزنادي من جدي إيجرح .. نين البحر ينزح إيعود ثرا
وتبيض الغزاله و الدجاج أيطرح .. أن صار هكذي ممكن إيصير رجا !
ويا حاج فرقت نا
يا حاج فرقت نا في بوغثيث أتقول غيم شتا **رجاي منقطع
 

(ما زلت نا هو نا) ادم العيساوى **القصيدة العاشرة
......................................
ما زلت نا هو نا ** نين في الذهب يلقو اثار صدا
ما زلت رغم العازه ** في الشده حديد و في الحنان قزازه
و ما زال عقلى من افراق اعزازه ** لا دار حل و لا خدا و عطا
كلام علايل شالاّت مزاحه ** لا عند توّه ما سماه صفا
خطاهم امخلف في الفواد حزازه ** ضعيف نبض ما ينفع امعاه دوا
امفيت ما ايحن الله يا رزازه **الا حق واضح ما عليه اغطا
قضيتى مع مرهون ما اتوازه ** نين يطلعوا ليهود من يافا
و لسبانيا ترجع مرايا نازه ** كيف ما مشت لا بحكم لا بقضا
و نين البحر يبقى عفا قرقازه ** ما عاد فيه ايبل راس رشا
امقطع ايدين الناس و الحزازه ** ما زال عندى في العزيز رجا
حتى الصقر ما يعلا على مركازه ** مهما ايتعلى تجدبا وطا
و ما زات نا هو نا
......................
ما زال عندى عزم ** صامد انوجه في العذاب ابحزم
حتى كان دمعى ما خذا عا اللزم ** ولايل على قولت اسمعت ابكا
مش لازم نواجه  و الله حزم ** و لا نتحى للياس بأى قضا
وما زلت علقم في ارياق الخصم ** و للصاحب عسل ميّه دوا و شفا
و ما زات نا هو نا
......................
ما زلت كى من قبل ** عزمى شديد انشيل فوق الحمل
و ما زلت ما انواطى غير ابثقل ** ولا انخش في ديموم بمرخا
نين لمواج الهايجه ع الرمل ** ترمينى سواء ميت سوا بنجا
عطانى الله ميزات فكر و عقل ** احسابى ايجى هو و الحساب سوا
ان كان جيت بالشر تسلك دبل ** و في السلم تاخد حاجتى برضا
امنسب عفيف شريف اصل و فعل ** من بيت ما تهلب عليه صلا
ان جانى بفعل الخير ياجد مثل ** وان جانى ابشر انجيه بيش ما جا
انا انسان متمسك بحبل الوصل ** حال غايتى ما ايكو نلى اعدا
و ما زات نا هو نا
......................
 
 
 
(ما زلت نا هو نا) حسن شاكر الهوني **القصيدة الحاديه عشر
........................................................

مازال عندي همه .. ومازلت ما بين العرب نسَّما
ومازال كلمتي تجمع الشمل تلمه .. عندي الداني والبعيد سوا
ومعا الناس صاحب حق عندي ذمه .. ولد بيت ما نقدر ندير خطا
وبيت سر للصاحب وشايل همه .. وحكمة نعالج ف لهموم بها
وديمه على غيري مفرج غمه .. رضي والدي منه خذيت ارضا
ولو نقص عندي بالمديح انتمه .. امغير ذكر المبادي للشباب دوا
وكل شاب ياخذ درب بوه وعمَّه .. م الجيل لولي ناخذ دروب حيا
لنا سلف صالح والوفا في دمَّه .. لو يموت ما يرجع عالمبدا
ويهيج البحر مرات عنده جمَّه .. ومواج تلاطم عاليات اقوا
عندي على بو ميم ضافي كمَّه .. قصائد سماح امسجله ذكرا
غلا من مركبلي رجيف وحمَّه .. منه انطبب في جوح غلا
الجرح القديم نضمده وانضمه .. يعاود علي ينزف نصيب ادما
كاس الغلا في الجسم زرع سمَّا .. ما عد نافع في عزاي عزا
نطلب المولى يسلمهن من همَّه .. انظاري وعقلي في الظلال سوا
وما زلت نا هو نا
*****
ما زلت نا هو الاول .. صابر على جور الزمان امهول
وحظي امجرب في الرقاد يطّول .. ويمرن عليه اسنين ما يصحا
لو انموت لا نطمع ولا نسّول .. ولا عبد منه نطلبه الرجا
ثابت على مبداي ما انتحول .. وما يوم ملواجب طلبت اعفا
من غير ربنا ما حد عليه انعول .. هو اللي خلقني ملعدم نشا
والحاسد امفيت الحسد ايش ينول .. والحسد ثبت في قلبه امخلف دا
وما زلت نا هو نا
*****
ما زلت في تياري .. الشباب في نما عقلي وبين افكاري
والكبر له اشاير غير انواري .. نص قرن كي دوبه علي مضا
وامجرب وراسم في الحيا مساري .. وعلى من ظلمني ما انرد كفا
كل شي محصي في اقلام الباري .. واللي تعمله عنا تنال جزا
وصادق وقول الحق له جهاري .. يالحق رافع ربنا السما
وامسالم وكاسب بالموده جاري .. متواضع وسالكهن ادروب الله
وأن كان م الزعل مرات تشعل ناري .. نسرع نطفيها بجرعة ما
انخلط انوازي وللشعور انداري وعايش حياتي بين ناس احيا
اوواخذ علينا الشعر نص نهاري .. هايم معا نفسي صباح مسا
ولعمار علم غيب اطول والا اقصاري .. وعارف الدنيا مش دار بقا
مضة عالنايم وعللي ساري .. رحلة نهايتها تكون فنا
ومازلت نا هو نا
 
مازال لي كلام .. نقوله وما نخشى عليه ملام
نحنا دينا في لاشرع دين اسلام .. منزللنا تنزيل م السما
نجانا نشلنا من عهود ظلام .. وضيه دروب المومنين ضوا
حلل الحلال وحرنه الحرام .. عن فعل المعاصي ولفجور نها
حث عالاخاء والوصل في لرحام .. متعاونين في الشدة وفي الرخا
ايريد مجتمع مايهدمه هدام .. متماسك يهابو قوته لعدا
قابل للتوبة في حسن ختام .. دين يسر ياما ضالين هدا
ويحيي نهر البعث كوم عظام .. فيه يخرجو لموات م الوطا
انداد وعراة وحافيين اقدام .. للمولى ايهبو ملبيين ندا
ويرفع اقلامه ويصدرن لحكام .. ويندم اللي للنار راح هبا
ونحنا عليها دايرين ازحام .. الدنيا اللي ميمولها انتها
وفينا العاصي ومرتكب لجرام .. وفينا الغافل مابشي درا
عالجنب ليمن وليسار اينام .. يشخر تاركهن اض صلا
وفيه ناس تفتن بينا ظلام .. اشيان لفعال اقلوبهم سودا
وفينا اللي شكار والذمام .. وفينا اللي للغير دار ولاء
شعب العروبة دارهم حكام .. والغرب ودارهم سلم عليه رقا
يبيعو لوطان يعلقو الوسام افعال مخجلة منها الجبين ندا
باعداد الصوابع مالهم احترام .. ان زالو حماة الشرف والمبدا
ونحنا وطنا قدامنا منضام .. من كمشة يهود وضعف وامريكا
ينظرو لنا نظرة قطيع اغنام .. ايهمها الا لوكال والمرعا
هذول يفهمو عابر لحدود وسام .. وجيوش زاحفة ما تلتفت لاورا
ومن دم ساخن نعملو حمام .. نهونو لرواح نرملو النسا
ونين العدو يطلب الاستسلام .. ابنا يعترف لشروطنا يصغى
مازلت نا هو نا
 

((ما زلت نا هو نا) روفه دعبوب الرفادي ** القصيدة الثانيه عشر
 
--------------------------
يا حاج فرقت نا .. من بو غثيث أتقول غيم أشتا.. رجاي منقطع
يا حاج فرقت حالي .. مع بو سوالف عل الضمير مدالي
لا عاد نشقابا ولا يشقابي .. حتى لو بكيت بدمع فيه دما
علي وين ما يخطر سريب الغالي .. ما عاد إيجيني نوم تحت أغطا
وناخذ الليل ونا أمغير أنشالي .. ويبقى قول حالتي هابا حفا ونقا
يا حاج دونك بررح .. جضر وياس متستاصل أمعاي امررح
لا أنغبت نشغل لا أنجيت أنفرح .. الدا كبر ما عنده هناك دوا
ولا عاد أزنادي من جدي إيجرح .. نين البحر ينزح إيعود ثرا
وتبيض الغزاله و الدجاج أيطرح .. أن صار هكذي ممكن إيصير رجا !
ويا حاج فرقت نا
*****
ويا حاج نصبر صبر .. ألقيت علتي لا هي مرض لا كبر
حتى و الحجايج بين شكل أوبر .. ودك علي روحك أدير عزا
ألا أمغير جابرني زماني جبر .. و القل شين ما تنظر امعاه هنا
لام الميامي كيف ندع الحبر .. ربيع بغوها ماجروه عروق نما
وتريض في عفا لاقدع لاهي نبر .. ولا محاوفة لاهي طفيف عصا
ورافق اللي مالدهر واخذ عبر .. تنسابها ماضي شقا و كدا
صعيبة عل اللي جن أيامه غبر .. أتراود ثنايا شقا وكدا
أحلام كيف من بدل التبن بشبر .. عواطف أنخافن لا انموت بها
ولافات لاساحر و صاحب سبر .. ولا من أمخاوي في سما وطا
فتاح شبر ويتقز ويشبر شبر .. وما من أمشعوذ له أفلوس هدا
وفي الاخرة إللي سكن في قبر .. داير طويل الياس فيه رجا
*****
يا حاج خذ مشحاطه .. غلا بوغثيث إيكيد في مشاطه
لا إيريد دموه ولا إيريد إخلاطه .. لعياله يطارد في عدا و عشا
وأعتاز باع بندقته وباع أحلاطه .. واحذاه يردن ما من أسراب قطا
وخده علي كفه غفر مرباطه .. سليم كان عاود وما خذا و عطا
مالقل عمرنا عدا حشاك سماطه .. وشيب الحسايف في الخدود بدا
*****
ويا حاج فرقت نا
......................


نلتقى فى الجزء الثالث و بقيه القصائد

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~

dude333
مشرف المنتدى السياسي
مشرف المنتدى السياسي

ذكر
عدد المشاركات : 5527
العمر : 47
رقم العضوية : 9508
قوة التقييم : 36
تاريخ التسجيل : 11/01/2012

الرجوع الى أعلى الصفحة اذهب الى الأسفل

رد: الجزء الثانى من ملحمه (ما زلت نا هو نا)

مُساهمة من طرف بلقاسم العماري في 2016-07-11, 12:24 am

اسلمت

بلقاسم العماري
عضو جديد

ذكر
عدد المشاركات : 3
العمر : 44
قوة التقييم : 0
تاريخ التسجيل : 27/05/2016

الرجوع الى أعلى الصفحة اذهب الى الأسفل

رد: الجزء الثانى من ملحمه (ما زلت نا هو نا)

مُساهمة من طرف STAR في 2016-07-11, 9:53 am

يعيطك العافية

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
اشهد ان لا اله الا الله واشهد ان محمد رسول الله

STAR
النائب الثاني للمشرف العام
النائب الثاني للمشرف العام

ذكر
عدد المشاركات : 114821
العمر : 31
رقم العضوية : 31
قوة التقييم : 186
تاريخ التسجيل : 08/03/2009

http://tamimi.own0.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى