منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..

انضم إلى المنتدى ، فالأمر سريع وسهل

منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
منتديات عيت ارفاد التميمي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» أندية السعودية تزاحم آرسنال على صفقة عربية
الجزء الاول من ملحمه (ما زلت نا هو نا) Icon_minitime1أمس في 2:51 pm من طرف STAR

» مانشستر يونايتد يستهدف مهاجم ريال مدريد
الجزء الاول من ملحمه (ما زلت نا هو نا) Icon_minitime1أمس في 2:51 pm من طرف STAR

» نجم آرسنال على طاولة برشلونة
الجزء الاول من ملحمه (ما زلت نا هو نا) Icon_minitime1أمس في 2:50 pm من طرف STAR

» مدن في ماليزيا تضمن للسائحين قضاء إجازة استثنائية
الجزء الاول من ملحمه (ما زلت نا هو نا) Icon_minitime1أمس في 2:50 pm من طرف STAR

» كيفية تعطيل وظائف مشاركة الملفات في الهواتف الذكية
الجزء الاول من ملحمه (ما زلت نا هو نا) Icon_minitime1أمس في 2:49 pm من طرف STAR

» ما هو سبب الخمول خلال النهار وما هي الاطعمة التي علينا تجنبها
الجزء الاول من ملحمه (ما زلت نا هو نا) Icon_minitime1أمس في 2:48 pm من طرف STAR

» حالة مزمنة تؤثر على 40% من سكان العالم تسرع من شيخوخة الدماغ
الجزء الاول من ملحمه (ما زلت نا هو نا) Icon_minitime1أمس في 2:48 pm من طرف STAR

» كيك الشاي بالزعفران والبرتقال
الجزء الاول من ملحمه (ما زلت نا هو نا) Icon_minitime1أمس في 2:47 pm من طرف STAR

» الصلاة علي رسول الله+الاستغفار+ذكر الشهادة+كفارة المجلس
الجزء الاول من ملحمه (ما زلت نا هو نا) Icon_minitime1أمس في 2:44 pm من طرف STAR

» عناصر غذائية تنشط الغدة الدرقية
الجزء الاول من ملحمه (ما زلت نا هو نا) Icon_minitime12024-03-27, 2:13 pm من طرف STAR

» رونالدو يصب غضبه على الحكم الرابع بعد خسارة مدوية للبرتغال
الجزء الاول من ملحمه (ما زلت نا هو نا) Icon_minitime12024-03-27, 2:13 pm من طرف STAR

» ما الأفضل الاستحمام ليلا أم صباحا؟
الجزء الاول من ملحمه (ما زلت نا هو نا) Icon_minitime12024-03-27, 2:11 pm من طرف STAR

» كبدة دجاج مقلية مع حمص بالبصل
الجزء الاول من ملحمه (ما زلت نا هو نا) Icon_minitime12024-03-27, 2:10 pm من طرف STAR

» مباريات الثلاثاء 26/3/2024 وقنوات الناقلة
الجزء الاول من ملحمه (ما زلت نا هو نا) Icon_minitime12024-03-26, 3:24 pm من طرف STAR

» جولة على الجسور القديمة... معالم شهيرة صمدت على مر التاريخ
الجزء الاول من ملحمه (ما زلت نا هو نا) Icon_minitime12024-03-26, 3:21 pm من طرف STAR

بحـث
 
 

نتائج البحث
 


Rechercher بحث متقدم


الجزء الاول من ملحمه (ما زلت نا هو نا)

2 مشترك

اذهب الى الأسفل

الجزء الاول من ملحمه (ما زلت نا هو نا) Empty الجزء الاول من ملحمه (ما زلت نا هو نا)

مُساهمة من طرف dude333 2016-07-09, 1:16 pm

الجزء الاول من ملحمه (ما زلت نا هو نا)
من المقدهه الى القصيده رقم 5

أ: مقدمه
ملحمه" نا ما زلت نا " هى راس بيت للشاعر بوعجيلة عبد السلام القبائلي أحد شعراء مدينة اجدابيا يقول
(لوكانك من جيلي**انّصبي على بابك بطوله ليلي ** شحات للغلا)
وكان بهذا البيت يخاطب فتاه جميله بباب بيتها .... ومرت الأيام والتقى بزميله الشاعر (عبد السلام بوجلاوي) وحكى له ما حصل له وبسرعة بديهة رد عليه بوجلاوي قائلاً:
لو كانك من ندّي ** مانرد من ردت الباب انعدي
انخبط برجلي كيف تبطل يدي ** نين يشغلك مطراي وتحليلي
كيف تفتحي عندي اسلوب تجدي ** ضروري ان كانك مسلمة ترثيلي
ونسيل ان سالتيني فيه انبدي ** سريب سرد سهرايه سبب تسويلي
نين للغلا يد ليمين اتمدي ** وابها تعزقي احسنات في منديلي
ومرت سنوات وتزوج ابن الشاعر بوعجيله عبد السلام ورزق بمولود وحضر بعض الشعراء والاحباب مهنئين له وسأله أحدهم
(هل مازلت شحات للغلا يا بوعجيله)
فرد عليه قائلاً :
مازلت نا هو نا .. حتى ونا ضناي مخلفين ضنا .. شحات للغلا
من هذا البيت انطلقت الملحمه الرائعه التى ابدع و اضاف اليها الكثير من الشعراء وكنت قد تابعت بالبحث فى مختلف الدواوين و على شبكه الانترنت فاستطعت ان اصل الى الاسماء التاليه و استطعت ان ارصد ما قالوه و ما اضافوه كاملا و بعون الله ساقوم بنشر كل ما قيل فى هذه الملحمه تباعا وقد وصل عدد ما تم رصده قرابه الخمسون صفحه مما يجعل نشرها دفعه واحده من ضروب المستحيل بالفيس بوك و اليكم اسماء من شارك فى هذه الملحمه الرائعه

------------------------------------------------------

بوعجيله عبد السلام ** القصيدة الأولى
احمد عبد الرحمن الشلوي ** القصيدة الثانيه
عقوب الشرمي ** القصيدة الثالثة
عبد الرحمن بو امغيّب الصنقري ** القصيدة الرابعة
ضوء الميلوسى القصيدة ** الخامسه
الرويعي الفاخري القصيدة ** السادسه
معتوق ادم الرقعى القصيدة ** السابعه
عبد الجليل سيف النصر ** القصيدة الثامنه
ادريس الشيخي **القصيدة التاسعه
ادم العيساوى **القصيدة العاشرة
حسن شاكر الهوني **القصيدة الحاديه عشر
روفه دعبوب الرفادي ** القصيدة الثانيه عشر
عبد السلام بوجلاوي **القصيدة الثالثه عشر
عبد الحميد عبد السلاو بطاو**القصيدة الرابعه عشر
عمران القزون** القصيدة الخامسه عشر
حليمه الشريف السعيطى **القصيدة السادسه عشر
فرج صهيبه القصيدة** السابعه عشر
محمد بوهارون ** القصيدة الثامنه عشر
محمد سعد كنيش **القصيدة التاسعه عشر
مفتاح الفالح **القصيدة العشرون
السائح البوسيفى ** القصيدة الواحده و العشرون
سعيد العمرونى **القصيدة الثانيه والعشرون
بوبكر علي القديري**القصيدة الثالثه والعشرون
الشوبكي خيرالله أمجاور** القصيدة الرابعه و العشرون
بالاضافع الى قصائد مجهوله القائل


*****
ب : القصائد


(ما زلت نا هو نا) بوعجيله عبد السلام ** القصيدة الأولى
-------------------------------------


مازلت نا هو نا ** حتى ان كنت داير صاحبه وضنا
شحات للغلا
مازلت ما غتنيت ** حتى ان كاني عاقل وباني بيت
تقولّي سعيد نقولك ياريت ** عايش امعيشه ما عليك ابها
قولو الناس على سماحة صيت ** ونا اتقول طيب الصيت قطع الوا
تلاشى دلالي لوّلي وانسيت ** اعزاز دنوهم للعقل كان دوا
مازلت نا هو نا ** مازلت من وجداني
نعشق ونا عارف احدود مكاني ** واخذ نصيبي م الغرام الفاني
امغير شيمتي في غيّتي الوفا ** ومازلت متمسك بقو ايماني
وعارف الدنيا موش دار بقا**  وحتى انكان هو الزمان موش زماني
امسايرينه وادعا ايحد ادعا ** مازلت نا هو نا
رغم اتعابي
ورغم الزمان اللي مضى شبابي  **مازال لي مكان بين اصحابي
نرتاح كان ساقني الهْم اخط  ** ومازلت داير ليبيا محرابي
وندعي الها في كل وان صلا  ** ومازال رايي في الشباب ايجابي
حتى انكان فيهم تختلف لاراء  ** ومازال يلمع من بعيد ركابي
من يومن اركوب الخيل بامزابا  **  ما يهمني كان الجواد كبابي
واجدين غير يلهدوالا بعصا  ** مازلت نا هو نا
*****


(ما زلت نا هو نا) احمد عبد الرحمن الشلوي ** القصيدة الثانيه
.......................................................................
مازلت نا هو نا .. نصون الغلا ماني عديم وفا ان جيت للوفا
...   ... ...   ...
مازلت صاين ودك .. ومازلت طامع فالزمان يردك
ندزوا وجاهه يطلبو في يدك .. يجيني بعد ياسات ومراجا
وانتي فالسماحة ما لقينا ضدك .. علي كثر ما رينا وجوه نسا
سماحة عيونك والغثيث وخدك .. عرش الجمال تصوقريه بها
ما تلوم هاللي ينحرم من ودك .. ان كان كمّله عمره عليك ابكا
...   ... ...   ...
مازلت فيك نراجي .. ومازلت كامي لوعتك ونداجي
يمكن لصوبي والغلا تحتاجي .. تجيني وتلقيني نظيف نيا
مع الزين نستانس يروق مزاجي .. والعفن ماعندي عليه عبا
علي شان بومضحك مثل العاجي .. نخش الخطر لو تم فيه دما
خطرها لقصقالك نعود ادراجي .. هو اللي مسببلي نصيب كدا
فيك وسط طايب حركته رجراجي .. ومضحك علي لون الجليد سوا
وما نظن نبقى من سريبك ناجي .. الله وعلم تبقى لي سبايب دا
غباوين في شانك نويت نقاجي .. لو يبقو جميع الناس لي عدا
...   ... ...   ...
ماولت وافي عهدي .. ومازال صوبك في مكانه عندي
ومازلت صادق في الغلا من جدي .. مجروح وانتي في غلاك دوا
وراه الخيانة عالبنادم تردي .. تدعي الناس يصيب فيه دعا
وشين النوايا عالعرب والحسدي لا بد ما يشقى ينال جزا
في الآخره وين الرحيل يعدي .. يندم على مادار فالدنيا
...   ... ...   ...
مازلت في جرناني .. ومازلت حاملهن هموم زماني
ومازلت في موج العزيز انعاني .. لا بان لامنه هناك نبا
حال العدو في غيبته خلاني .. مرايف وما عندي عزوم قوا
كنيبه بعد ياسات يبقى داني .. ويقسم ويبقى من حلالي نا
وننسى مع زوله جميع احزاني .. وما عاد يذّكر معاي شقا



(ما زلت نا هو نا) عقوب الشرمي ** القصيدة الثالثة

...............................................
اسمعنا شريط وفيه قول ارحومه** كلامه اعلاج وللمريض دوا
جميع من اسمع بوداد حط اختومه ** لاايعارض لايقول خطا
مايطّلع الكلمة اللي مذمومه ** بوداد زين اللفظ كان حكا
او كمان خوه من غادي ايعد اللومه ** ماايرد ع الطالب بقولت لا
العمده شهير او سيرته مفهومه ** الله يرحمه راجل قليل افدا
ان قال الكلام اتايده الحكومة ** وفوق من قراره يختموا القضا
ان شاء الله في قبره هني في نومه ** تدعيله العالم كل وان صلا
لاكن الدنيا ما عليها لومه ** ما ادوم للانسان دار فنا
اومازلت مالي رده ** اومازلت نفزع عند وقت الشده
او مازال في قلبي صفا وموده ** وانحايل ع اليتيم كان بكا
ساس المحنه ماانريد انهده ** وانحمل صاحبي حتى ان كان جفا
او عمر الجفا ماتم كي الموده** اوربك خلق لطباع موش سوا
اومازلت نا صبار ** او مازلت نتقّى انريد عمار
او نبقى انطفي كي اتشيط النار ** وانكافي اصحاب العيب بالحملا
او ياما اشربنا ف الزمان امرار ** او ياما اضحكنا في ايام زها
هذا خبر ريته صحيح وصار ** وارحومه حكابه ف الكلام بدا
ارحومه كلامه موعضة ووقار ** ارحومه امعلم ما ايريد وصا
اومازلت ما نذارا ** والضيف نعرف واجبه واقدارا
او نشكر اصحاب العرف والشعارا ** في كل يوم وكل ليل مسا
اومازلت نا كي قبل م الصبارا ** وبفعل العطيبه ما انريد اكفا
او مازلت صاحب جونه ** او جاري انخاف عليه نوقف دونه
وانعامل العالم كل لون بلونه ** او ما القيت كيف الصبر باب نجا
اولانقص عندي ف الرفق لاخونه ** صاحب صداقا كامله بوفا
مازلت في معدالي ** ومازال طبعي كيف قبل وتالي
اومازلت ع العايب انطّول بالي ** كنيب ايتندم ويهديه الله
اهناك ناس هاديهم الله العالي ** واهناك ناس من غادي اوجوه شقا
افيهم اللي مغضوب عقلا دالي ** لايفيد صاحب لايكيد اعدا
اوفيهم اللي تلقاه كي الهلالي ** يخبربك طريق الخير في الظلما
مازلت نا كي قبل ** او مازلت ماودي انكر الحبل
او لاخير ف اللي يعتبوا ع الهبل ** واللي لااجوّل لامشا لاجا
اللي مايبانوا يوم دق الطبل ** فزعهم امغير اعياط كي النسا
منحاش جا بولبده *ابتاع الزبل** علي وطنا عيط وادير عزا
نفسي انشوف الخيل وامراح ابل ** او نفسي انراعي وطن فيه اعلا
اومازلت كيف زمان ** او نكره اللي كذاب والفتان
وانصاحبت صاحب ماعليا هان ** اوكل يوم في قلبي ايزيد غلا
او لاخير في راجل طويل السان ** وجابد سريب الناس كل ضحا
غالي علي البر والوديان ** او نجع البوادي في اوطان خلا
رجاله عصارا صيدهم غزلان ** والله طير الحباره امعا قطا
لاعندهم ناموس لاذبان ** او اديوك م البيضا اتجيب الدا
وانجاهم الضيف ايذبّحوا خرفان ** هاضول ناس من غادي اصحاب عنا
وسلامي علي لجواد والفرسان ** اعداد ماقرا قاري كتاب تلا
واخيار الكلام صلاه ع العدنان ** وهي الفايده نختم القول ابها



(ما زلت نا هو نا) عبد الرحمن بو امغيّب الصنقري ** القصيدة الرابعة
(وله قصيدتان)
** عبد الرحمن بو امغيّب الصنقري 01**
...................................................................
مازلت نا هو نا ..ساس الحيا نبني عليه ابنا.. نظيف معدني
مازلت لك حمال ** ومازال في عقلي عليك دلال
ومازلت واخذ في قولة قال** ومازلت مانخدم امفيت ابها
ومازلت تقلب كل يوم بحال** ومازال عندي فيك باب رجا
....................
مازلت نا القديم** صاحب الجفا نقدر عليه انصيم
لاعيب لاسيات لاتحريم** لامعاتبه لاحس لاضوضا
ولا ليش لا كنك ولاتكليم** كثر الحديث ايسير فيه خطا
ولانريد نفتح باب سين وجيم** ولاخير ف الصاحب ان كان شكا
خزازين عقلي نين دارن ريم** من كثر السوايا طافحات ملا
صابر ونراجي في رجا الكريم** يمكن اللي دردي اتعود صفا
....................
مازلت كي ماكنت** لابعت صاحب لاصديقي خنت
نظيف الصداقة كان نا قارنت** من غير عله خالصه بوفا
وننشد لوجه الله كان نشدت** علي صاحبي حتى ان كان جفا
....................
ومازلت نقفزلك بعد ما تقت** لانريد شكر ولانريد ثنا
ومازلت نبذل كل ماكونت** ومازلت نفرح للغريب ان جا
ونضيف الضايف لو عشا شحتت** انبات في مسره كامله وهنا
مضغاتني ليام نين ابطلت** وعندي ملاها والفراغ سوا
وكثر رفق لجواد منها خذت** امبادي بدينا بالحياه ابها
رصيدي قوي ومازلت مسع لنت** وغنا النفس ماكيفه اهناك اغنا
وكلمة الحق انقولها لوكنت** بين المشانق والسيوف احما
متمسك علي مبدا وبيه امنت** حتى وهن اظروفي هكذي وكذا
واصحاب المظاهر والنفاق اكرهت** دساسة الدسايس والوجوه اقوا
ووجهم اتقول اكباس طول الوقت** من كثر المعاصي شايلات صدا
كرارة احبال كبار فيهم دخت** وقلة ضمير وفشخره وريا
وان سالوك ماليله هنيه بتت** وان سلتم ماعد خلاصك جا
وان طالبتهم تبقى اتقول اغلطت** تاخذ كريهه سنه رد اكفا
يغفرلي الله ان فيهم خضت ** علي عد مامنهم لحظت اخطا
الله يبعد الشيطان واستغفرت** مغير للنذاله مالقيت وعا
الله ينعلك يا ابليس وين حضرت** واينعل اللي كيفك سوا بسوا
وصلي ع الهادي واقول امنت** رب الخليقه واطلبوا الهدا
مازلت نا هو نا ساس الحيا ** نبني عليه ابنا نظيف معدني


قصيدة اخرى للشاعر عبد الرحمن بومغيّب
(وله قصيدتان)
** عبد الرحمن بو امغيّب الصنقري 02**
.........................................................
مازلت نا هو نا ..علي كبر سني عفن في اخطا.. امغير بينا
مازلت موش تمام ** ومازلت خاطي في بعض لحكام
قليل وين ماناقف ورا الامام** وقليل وين ما نوعا الفجر قرا
وقليل وين مانزعل علي الاسلام** وقليل وين دمعي ع الخدود جرا
شباب الحجاره جابهم الاعلام** الواحد اهدومه غارقات ادما
ولاجابني شايب كبير انظام** ولامشاعري حرك صريخ انسا
وقصة الدره فلم م الافلام** وواجد مثيله مانباهم جا
قاعد وانصنت انريد سلام** قابيتني جاهل وفي غبا
القدس راه مايجيبه مضيغ كلام** ايريد يوم دخانه اتقول ندا
ياربنا ياملك ياعلام** ان تنصر الحق الظلم راه طغا
مازلت نا هو نا ..علي كبر سني عفن في اخطا.. امغير بينا


(ما زلت نا هو نا) ضوء الميلوسى القصيدة ** الخامسه
...........................................................

مازلت نا هُونا .. يا عنان حوّل خبر ع الطّغاء
حول خبر لزوم .. وخوذ حوله لهرقل عظيم الروم
يسلم يسلّم قبل يأتي يوم .. ما تنقبل فيه الأعذار رجاء
ومن قبل ما توصل خيول القوم .. عربٌ كرامٌ نجّبٌ نبلاء
ومن قبل يبدأ الحكم للمحكوم .. يشرع دساتير الحياة حياء
ومن قبل ما نعلن خلافة قوم .. في لوس أنجلس ووجوها السمراء
ومن قبل ما يأتي نهار مشؤم .. أم القرون تخلص الجماء
حول على العربيد .. وحول على بوجهل خبر أكيد
خبر من شمال أفريقيا تحديد .. وتزأر صيوده لحظة الهيجاء
ومن وين ما فلدلفيا بتربيد .. تم أسرها باليد دون عناء
ومن شعب سيد ما عليهش سيد .. ورآه العرب وأفريقيا السوداء
سليل لنواجع بدو وأهل البيد .. أيديهم أطوال ويوصلوا الجوزاء
ويحضرُوا ليوم شين شديد .. عظيم يوم وعد الله فيه لقاء
نهار يا كتفر الروس فيه تميد .. شجر في عواصف معنفة هوجاء
قديم دينها يخلص ودين جديد .. من يوم غرناطه ليوم قناء
* * * * * * *
مازلت في حطين .. ومازلت في جالوت رأس العين
ومازلت في اليرموك و القزوين .. وذات الصواري فوق ظهر الماء
وما بينا قاعد صلاح الدين .. وخالد وعقبه وبن زياد نواء
يحرق جميع السفن لغرضين .. يا البحر يا أما النصر ع الأعداء
يا قينقاع العصر يا شياطين .. أكاذيب ما غطت عيون خطاء
فوتوا المضارب غصب مجبورين .. منكم المقدس و الأوطان براء
يا يهود خيبر أرحلوا في الحين .. راهو قرار المؤمنين قتصاء
* * * * * * *
ومازالت نتوهج حماس ودين .. في يثرب و في أم المدن و القراء
ومازال نور المصطفى الأمين .. قوي يندفع من وسط غار حراء
ومازالت أم الحسن والحسين .. تنجب أشراف الدهر و العظماء
والمعتصم مازال م الحيين .. تلمع سيوفه ملبيات نداء
صوارم أرهاف المتن والحدين .. مغاليل ما كلت نهار عطاء
ومازال بن عباد وبن تشفين .. و ذاك الوميض سيوفنا النجلاء
* * * * * * *
مازلت نا موجود .. حاضر و قافي من قديم عهود
ومازلت صامد في المكان صمود .. لين بينا يحكم الله قضاء
ومازلت على مر الزمان عنود .. أشد من رواسي الأرض والبيداء
ومازلت وافي للزمان أوعود .. مؤمن و وعد المؤمنين وفاء
ومازلت على جنس الأوغاد حقود .. وقدست حقدي في الضمير غلاء
* * * * * * *
ولقنت حقدي لي ضماير سود .. وحملتها لي جيل حقد سناء
اللي ما بكاته صخر دمع يجتود .. زى ما بكاته دمعت الخنساء
هي فداته دم سال بدود .. مشى جسمها وجسم اليهود أشلاء
ومازلت نتحرك عظيم حشود .. نعبر جبال الألب لا مواناء
ومازال سيفي بو شفار هنود .. ومازال سرزى فوق م الغبراء
ومازلت ندخل الأندلس بوجود .. نجدد قصور العز في الحمراء
له الجوانح خافقات شرود .. خفقة جوانح ورد للعفراء
حنا ناس حمالة أثقال جدود .. للخلق مانا حاملين إناء
* * * * * * *
ولي مجد ماهو في الوراء مجحود .. تألق عروش المجد فوق سماء
ويعجز عليه الوصف و المجرود .. ويثقل لسان الدهر وين حكاء
أنا من بني بابل إعجاز خلود .. ومآرب وصيدا وصور والبتراء
وقرطاج هي والأهرام شهود .. وتدمر و شور وعدن والزرقاء
وصبرات أويا عمر ما محدود .. ولبده ألجميله وأرضها الفيحاء
تقول درر على صدر الزمان عقود .. ولهم عواجت هامت الهيفاء
ولا حصار يرهبني جرى مقصود .. عدوان صارخ ظلم واعتداء
وننتج من ارضي خيرها محمود .. ولا خير حيه حاقده رقطاء
ونكبس حزام الجود م الموجود .. ونقنع بحض الواكلين حساء
ومحال منى يستحى لسجود .. للكم و عيني رافعه للماء
ومحال على وحدة عرب انحود .. قررت ماليها الحدود بقاء
لا صلح لا اعتراف بالتلمود .. ولا دبلوماسي سلك في العماء
قيموا الأحلاف وطوروا البارود .. فسفور ذرة و غاز والكيمياء
إيدز وفيروسات نود بنود .. وزيدوا نفايات السموم دهاء
ولوكر وحيكوا كذب بين بنود .. وحيكوا و حيكوا والأيام سراء
وما تتركوا في بغداد حتى عود .. فريق ينتهي وفريق آخر جاء
وحطوا على دجله صخر جلمود .. وحطوا على الفرات سد مداء
والنيل سدوا وبذلوا مجهود .. وسدوا الروافد وين فيه حياء
صبرنا صبرنا الصبر ليه حدود .. يا إفرنج يا شداد يا طغاء
يجي يوم لازم بينا ميعود .. تعكس أمواج البحر دور وراء
ونمسح مدامع حدرت عنقود .. جرت فوق وجنات الختدود شقاء
* * * * * * *
أنا الغضب في يوم الوغا ميقود .. ترقى لهاليبه جحيم لظاء
أنا الغضب في يوم السلف مردود .. نهار فيه دم الصامدين سخاء
أنا غضب كل أفريقيا محشود .. وتزأر صيوده للعرين حماء
أنا الغضب فوق ترابنا الممدود .. من نواكشوط لبكر لصنعاء
أنا الغضب غضب الله ع التامود .. و ع مترفي العصر و العصاء
أنا ريح صرصر في مداين هود .. يهدم قصور العاج ع البغاء
وسيل عرم ما توقف اعماه سدود .. و تنهار في طفرة سيول **اء
وما تفرحوا يا غرب يا اليهود .. مادام فيا عرق نبض حياء
وما تحسبوا جسمي كلاه الدود .. و منهوك ما نقدر انقل عصاء
أنا مزن متركب عنيف رعود .. وبينى وبين الفاتحين ضحاء

نلتقى فى الجزء الثانى و بقيه القصائد

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
الجزء الاول من ملحمه (ما زلت نا هو نا) 116669782
dude333
dude333
مشرف المنتدى السياسي
مشرف المنتدى السياسي

ذكر
عدد المشاركات : 5585
العمر : 54
رقم العضوية : 9508
قوة التقييم : 36
تاريخ التسجيل : 11/01/2012

الرجوع الى أعلى الصفحة اذهب الى الأسفل

الجزء الاول من ملحمه (ما زلت نا هو نا) Empty رد: الجزء الاول من ملحمه (ما زلت نا هو نا)

مُساهمة من طرف STAR 2016-07-10, 9:36 am

انعم اسلمت

يعطيك العافية

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
اشهد ان لا اله الا الله واشهد ان محمد رسول الله
STAR
STAR
النائب الثاني للمشرف العام
النائب الثاني للمشرف العام

ذكر
عدد المشاركات : 126398
العمر : 39
رقم العضوية : 31
قوة التقييم : 211
تاريخ التسجيل : 08/03/2009

https://tamimi.own0.com

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى