منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» الصلاة علي رسول الله+الاستغفار+ذكر الشهادة+كفارة المجلس
اليوم في 11:22 am من طرف STAR

» صورة: خط ملك المغرب يثير دهشة المتابعين!
اليوم في 11:03 am من طرف أحميدي مريمي

» "إنه أخي والله أخي".. طالبة طب سورية تتفاجأ بجثة شقيقها المعتقل في محاضرة لتشريح الجثث
اليوم في 11:02 am من طرف أحميدي مريمي

» ليبيا.. خبر كان.. عاجل
أمس في 10:39 am من طرف عاشقة الورد

» حيل سهلة وسريعة تزيدك جمالًا وانوثة
أمس في 10:26 am من طرف عاشقة الورد

»  فوائد ترتيب المنزل وتنظيفه.. أكثر مما تتوقع!
أمس في 10:18 am من طرف عاشقة الورد

» جزء من الطلاب المتقدمين للكلية العسكرية توكرة للإنضمام للقوات المسلحة العربية الليبية
أمس في 10:16 am من طرف STAR

» بالصور مركز شرطة القرضة أبشع الجرائم بمدينة سبها
أمس في 10:14 am من طرف STAR

» الأمهات القاسيات هن الأفضل.. هذه أمثل طريقة للتعامل مع أطفالك!
أمس في 10:13 am من طرف عاشقة الورد

» هكذا يبدو شكل "الكوكب القزم" الأصغر في مجموعتنا الشمسية
أمس في 10:10 am من طرف عاشقة الورد

» لماذا يُصاب الأشخاص بانتفاخ تحت العين؟
أمس في 10:03 am من طرف عاشقة الورد

»  عليكم ارتداء الجوارب خلال النوم .. إليكم الأسباب
أمس في 9:55 am من طرف عاشقة الورد

» مصر توافق على تجديد تصاريح سيارات الليبيين بالقاهرة لـ6 أشهر
أمس في 9:50 am من طرف STAR

» «العامة للكهرباء»:تركيب أبراج الطوارئ لربط (طبرق القعرة) غدا
أمس في 9:49 am من طرف STAR

» اتفاق مع «المالية» ينهي اعتصام الموظفين بمطاري طبرق والأبرق
أمس في 9:49 am من طرف STAR

بحـث
 
 

نتائج البحث
 


Rechercher بحث متقدم


الجزء الرابع من ملحمه (ما زلت نا هو نا)

استعرض الموضوع السابق استعرض الموضوع التالي اذهب الى الأسفل

الجزء الرابع من ملحمه (ما زلت نا هو نا)

مُساهمة من طرف dude333 في 2016-07-11, 8:03 am


الجزء الرابع من ملحمه (ما زلت نا هو نا)
من القصيده رقم 17 الى القصيده رقم 24
(ما زلت نا هو نا) فرج صهيبه القصيدة** السابعه عشر
--------------------------
ما زلت نا هو نا ** حتى ان صار ف دنياى ما ها
نخبر دروبهم
-----
ما زلت شاكر جزّى ** وما زلت عايش في طناطين عزّى
وما زال عندى ع الغزال اتهزّى ** حتى ان كا الضى في عينى طفا
ولا توا ما قبلت فيهن امعزّى ** عسى نكرهو شيء خير ألنا
ما زلت نا هو نا
......................
ما زال عندى سوم ** وما زلت في القصده انعد اللوم
وما زلت واضح جوهرى معلوم ** وما زلت ما ننزل اديار أخيا
وما زلت طيب خنجرى مسمّوم ** وما زال عندى عرق فيد ندا
وما زلت نا نشهد مع المظلوم ** ورزقى على واحد كريم عطا
وما زلت ما نكسب امفيت النوم ** عندى خير من خوجتا فلوس اربا
وما زلت نا هو نا
...............
ما زلت كى ساعتّه ** انقول كلمتى واللى اتصير تعتّه
حتى ان صارت في حبالى متّه ** الجى خالقه مولاه عظم شقا
ودّك سوايا صاحبك تكمتّه ** ونا ريت واجد ما انريد كفا
اهناك من لى سيته قلبته ** على خلقته فيها دوا وشقا
وما زلت نا هو نا
...............
ما زلت صاحب دوّه ** مع بو شفايف كيف لون الفوّه
من اللى على بالك جت تتطوّا ** جلمود مالها لسّه جنين ثغا
وان كان عاد م العنس وماى من توّا ** الهاكم عام امجزيّا ع الما
نقناقى عليها انخش هول الصّوا ** جابت سوا خابت سوا ابسوا
وكلا الغنى ان جابك الغنى في دوّا ** عفاب خلطه فيها طرا و جرا
ايغّيم اتقول اساع يقطب توّا ** نين الغدا يركب ع الغدا
ويجلّى سحاب مزنها يضوّا ** وأوقات فالدهر مره اتدير شرا
وما زلت نا هو نا
...............
وما زلت على هّمه ** ومعاى العصر كابر بيه نسّمى
ولانى ثقيل بطمعتى انترمّه ** فوق من النقاوى كان فيه نقا
والحى فعله يشكره ويذمّه ** ان كان في الكلام وع اللسان جرا
ولانى م اللى جاريه في دمّه ** عليك يا افلان فلان قال كذا
ولا للضيف قدامه طعام انلمّه ** والجود راضعه م الثدى رضع البا
ان جابك الظرف احداى رسوه رقه ** تلقانى وما تقّصر عليك اخطا
زارع الخير ثواب منّه نمّه ** وزارع الشر يحصد غضب ودعاء
انعد في نهار احساب جمله الامّه ** من القرنه ايصير للحمّا
.................
وما زلت وين اندير الصوب انتمه ** وجت ولعتى في بنت مش مرا
سين عين ذبلنى غزير الجمّه **سود العيون اللى نظيف عضا
جرحه ايناوض كيف امراض الحمّه ** نشدت الطبيب: البنت: قال دوا
وما زلت نا هو نا
...................
ما زال عندى عزّه ** ونقول من لحم الخنزير عندى كزّه
ولانى خيفيف انكتبت عليا فزّه **ولا ببندقه مليتْ ولا بعصا
ولانى على خلقّت الله انتهزّى ** ما من ضحك اللى وراه بكا
ولا عمر قالو في كلامى مزّه ** عندى الكلام اتقول نقر صفا
و اللى ايعزنى واجب علىّ انعزه ** كلا ع الكريها ما هناك اغطا
صاحب السوايا ايجيه يوم اتهزه ** الدنيا طويله وفيها رد اكفا
و ما زلت نا هو نا
........................
ما زلت رغم العازه ** وشيلت مرادى يوم دارو زازه
شين يا خصص ليدين غالى حازه ** صوّه ووطن بعيد شن خلا
لكن الصبر الجرح بيه تعازه ** حسيت النبض عندى اعزوم اقوا
.....................
وما زلت كيف الصبر في مركازه ** حتى ان طار ما ينزل امفيت علا
ولانى اللى اشوه نظاف قزازه ** لا عليه غيظ ولا عليه ارضا
عزيز نفس ما انتبه عرب مرطازه ** ولا تحوز يدى شئ فيه خزا
ناكل رغيفى تحت ضى القازه ** و لا شبعتى في قصور اربا
بينك وبين اللهىفيه مفازه ** اتكيدك ان ما تما امعاك اوتا
وما زلت نا هو نا
...............
 
 (ما زلت نا هو نا) محمد بوهارون ** القصيدة الثامنه عشر
الشاعر محمد بوهارون
......................
 
ما زلت نا هو نا ** حتى ان قالو لامشاء لا جا
شور دارهم
................
ما زلت كيف العاده ** نلبس اللى ضاق اجدال حدّاده
و نكره خسيس العرف و الشرفاده ** و نخالط اللى ديمه اطوال عنا
ونعد في ملامه لومه الوداده ** انسيّل شرابى يوم جف الما
 ابغيض كيف مثيل النيل في معتاده ** يد الكريم امعاه يد الله
سيد ولد سيد و بين الساده ** يلقوا في كلامى للقلوب شفا
نهار كل حد ماسك بيد ازناده ** و البيع و الشرا في السوق جيّب ثنا
حتى ونحن كل حد في بلاده را البعد للىّ عاشقين جفا
كى قول بن زيدون في ولاّده ما حقن امواقينا عليك ابكا
وما زلت نا هو نا
.....................
ما زلت نا هو الأول ** ما ع المبادى الماضيه انتحول
حتى ان قالو يا مرادى طوّل ** لازلت وافى وشيمتى الوفا
اسّاع في حياتى كل حال ايحوّل ** و يجيك المبشر را الغالى جا
واحلى فساتينك برقص ايفوّل ** و يرنن زغاريتك هنا وزها
لا تاخدى في كلام اتقوّل ** وبالله اذكرينى كل وان مسا
و ما زلت نا هو نا
...........................
طا زلت كيف زمان ** حتى لو زمانى خص في لاوان
ومازلت نعشق م النساء نسوان ** وكل شيع ندى في الحياه انسا
ونحب الطبيعه و شردت الغزلان ** و نحب الهدو والعيش في الخلا
و نشرد مع اللى روّه في الوجدان ** ونصعد معاها نسكنو العلا
علشان الأرض تمت مالها امان ** واحب عند العاشقين الله
دار بيت مقدس حب للحبان ** منابر و فيها ايقيموا الصلا
ويكون رسم نعمه مأذنه و آذان ** ويكون اسمها ما فوق كل شفا
يا الحب ياللى قاتل الفرسان ** حتى نا قتلنى حبها و قسا
و ما زلت نا هو نا
...........................
ما زلت نا مازلت ** ما ع المبادى لوله حوّلت
ولا في العلل حطيت ولا اساع شلت ** خليته سدا يريد المجارا
بالله يا حبيبه كان قالو قلت ** نفيض في حنين و شوق فيه فيه غلا
خطرها مقاعد صوب كى قابلت ** عليك نين دمعى ع الخدود جرا
من هول المعيشه و الحياه انعزلت ** و غدر الزمان اللى عليّزرا
و ما زلت نا هو نا
...........................
ما زلت نا ما زال ** ما زلت نعشق في النسا و نسال
وما زلت امتيم من اسنين اطوال ** وما زال حافظ خاطرى الوصا
لا يهمنى لا جاه لا مال ** رسول حب نمشى ع الوطا ابطا
و ما زلت نا هو نا
...........................
ما زالت فيا ادموع ** وما زلت نبكى كيف نجبد نوع
و ما زلت نلقى في العلل ميضوع ** و ما زلت انصبى وكان صار أصبا
وما زلت نطلق للخيال اصروع ** ان كان غير قابل للخيال هوا
وما زلت نصدف علّه الميجوع ** حتى ان كان ليه مل القيت دوا
وما زلت نجمع ع الجموع اجموع **  وما زلت ليلى سامره ابعنا
وما زال جرحى م النسا مهلوع ** وما زلت نازف بالدموع ابكا
نبكى على لباسه المطبوع ** تسمع نواقيسه اتقول اقطا
فوق من غوايش كل شوط ابنوع ** و شوط من ختم تنسيق و امساوا
ولباس من حرير وجسم كى الشموع ** و فوقها ورود احدودها الضيا
اتقول بدر كامل و النجوم افروع ** امبعثر مصابيحه كسا المسا
دوب ع الوطا توطا بكل اخشوع ** ويزيد في نسوم عطورها الهوا
ضامى لطظامى و الروا ممنوه ** بالله يا أنعيمه هذا مش اصغا ؟
نسمع عليك امغير ع المسموع ** ايقولو الحبيبه عايشه بزها
انشوف في ميادين ليبيا و نجوع ** ايعزن الضايف و الغريب ان جا
عند المحيط الاطلسى و ربوع ** تتويجهن املاقا ان صار لقا
و ما زلت نا هو نا
 
(ما زلت نا هو نا) محمد سعد كنيش **القصيدة التاسعه عشر
الشاعر محمد سعد اكنيش
------------------------
ما زلت نا هو نا ** ما نعبا عاللى ما عليه اعبا
و لا انازعه
..............
ما زلت نا لوّل ** لا انبيّد لا انوانس و لا انتحول
وما اخلقت شى امزور عشت امجول ** لا نحمل عيب لا اندير خطا
ولو متت لا نشحت ولا نسوّل ** من غير الشرف ما انذوق شربت ما
          ورا العمر لا دايم الـ حد لا يطوّل ** ولا ايدوم كرب و لا ايدوم رخا
والفال له رده عللى ايفوّل ** بعد العمل لازم ايجيك جزا
الواجب ع الانسان ما ايتفوّل ** و نعود بالحديث القول خطرّها
خطّرّها خبر خطرّ الغالى الأول ** سريب مطلع امس ا ما زلت نا هو نا
ولها الوقت في صوب البنات انموّل ** غيرهن اللى خايف ايقول لا
وما زلت نا هو نا
.........................
ما زلت ناهو بيدى ** كيف امس كيف اليوم في تنكيدى
حتى كان هن ماهن منازل ريدى **ابعاد حازهن رقراق فيع اعلا
ممشاهن قعد صاعب على مكيدى **و الياس غمّنى غمّت اشتا
انموح كما السكران نا الوحيدى **وان كان رقدوا ناخد الليل ابكا
ما القيت شى فزعه تجى تحت ايدى ** امفيت قولت يانا في عزيز عزا
ونا من قبيله واصلهم يا سيدى ** اشراف عندهم تاريخ ما ايغبا
افواخر و أصحاب الذكر و التوحيدى ** و اثقال ع العدو ما يرحموا و اقوا
تريسهم ايهنى ساعه التجريدى ** كبير و صغير ايجو ان صار ندا
وما زلت نا هو نا
.........................
ما زلت كيف البادى ** لا انزيد و لا ننقص على معتادى
حتى كان راسى شاب دون اندادى ** لاسباب واضحه نحكى لكم بها
اهناك شى ننظر فيه ما هو عادى .. امباعد نوم العين من الحوما
حال هلامواشى تم حال العادى ** و السمسار ع المنتج طغا و بغا
ولهم وين نشكى في حنا يا وادى **عياط في قفا ميت بلا جدوا
والقنو فيه ميله مش عاد متقادى والناس والفت دور الصوب خطا
حتى والتطور كايد العدادى ** على ناس ما فتشت ولا صرا
نحنا نجعنا ما زال نجع ابوادى ** لا له طريق ولا احذاه ابنا
ولا مدرسه ايكو نضيها وقادى ** قطعه جدب في مزرعه خضرا
ونحنا طبعنا وين ما ايصير امنادى ** ايبا لعبها بالسدو والقصرا
نعطوه حقها ساعة نقيق الصادى ** حاض ابحاضر ما اهناك بطا
وما زلت نا هو نا
.........................
وما زلت يانا الليله ** كبير غير عقلى خضر في تمقيله
انريد البنات وما هناك وسيله ** انعيد الشباب وهو قريب فنا
ومانى من اللى يعملو بالحيله ** ايغطوا الواقه كان جابا اغطا
 اللى ايزوقوا في شيبهم بالنيله ** وهو انذار من عالم الغيب النا
مفروض نقهموه ونحسبوا الحصيله ** بيش للسفر يبقى اهناك اوتا
                          ونا ما انجامل ننتمي لقبيله ** يكفينى شرف قابيتنى منها             
ابوادى شماسى هم احماه اكحيله ** الجاسوس ما ينصح القوم ابها
كمين غزى سيبهن بغير جميله ** من طلّت كبير القوم بدّار
نزّالين وين الباب يفرش سيله ** في سلت عيث وتربته حمرا
ومجاورين ناس روس مش وذيله ** امشاركينهم في البؤس والسرا
غير هالعلل ما دونه تفصيله ** ولا جوّنه حلّع ولا وصفا
خطرها اللي في الصوب جابد حيله ** وصاعب عليه اللى عزيز جفا
مشكاك نقص م الضاحب اللى تشكيله ** نتيجه ايشمت فيك ناس اعدا
المقروض ما يجفا العزيز عزيله ** و كانه نكر يبقى قليل حيا
وما زلت نا هو نا
.........................
 
وما زلت لا هالساعه ** ما انحبشى عيشه ردا ودناعه
من ناس رائهم ما زال راى جماعه ** متين ساسهم ما يبان فيه اخيا
مثيل الجبل ما تحركه زعزاعه ** ولا السبع يجفل من نقيق اجرا
نحنا نجعنا فوق أربعين ارباعه ** ايبانو ضيوفه في هنا وزها
سوا في رخا والا في سنين مجاعه ** الضيف نفرحوله فرح وين لفا
ونحنا وطنا وين ما ايصح ارجاعه ** خيرت البراقى مينت العجفا
ما يصيدها شى غش من مرباعه ** غزلان سارحه تحاذى اطيور قطا
غيّر عليه الدّهر له نقداعه **اليوم على اكحيله ما هناك اعنا
في عام مجدب مش عام ازراعه ** كميّن حبس ضيّق دايرين الها
لو كان العداله امطبقه م الساعه ** جميع من حبس ناقه اينول جزا
وما زلت نا هو نا
.........................
 (ما زلت نا هو نا) مفتاح الفالح **القصيدة العشرون
                                           -------------------------------      

ما نيش نا هو نا .. أنحمل وين ما يحصل معاي خطا ..ونقول ساهله
ما نيش م الزعاله .. بعد طيش عاطني الله عقاله
أنحمل وين ما يحصل أمعاي فساله .. ما من اللي عدت بدون كفا
وأن كان ما رقالي في السما نرقاله .. أيام وانا مبلي أمتاع بلا
و اليوم كل حد فيا أمحصل داله .. أموانس علي كمين عيب لفا
وحتى من جفاني ما أنريد أنساله .. اليوم الغلا تما عليه أرضا
........................
ما نيش ميس ياس .. وما نيش مقتنع بالياس مل الاساس
أنحب الحياة وأنحب كل الناس .. ومومن وعندي في الكريم رجا
إيجي من تساخيره إن جاني ياس .. إيجب الفرج ويجيب الدوا للدا
و اللي عليه إيعبا ما ينهاس .. إللي ما علي غيره إيجوز عبا
هللي خلق فيا رهيف أحساس .. أنسان عاطفي مالي عزوم أقوا
أن شاف الجمال إيصيرله ألتماس .. عندي العين من قلبي قليل نجاة
وكل يوم مسقي من الغوالي كاس .. زها في اوله واخر المطاف بكا
قضيت عمر جيد وأغلبه أنعكاس .. وشعرت بتغير في الحياة جرى
عندي العقل هالفترة زكا عل الراس .. وهو في ظلالاته عليه طغا
........................
ما نيش نا هو الاول .. الانسان إيتحول كل يوم أمحول
موال الغلا وأحسن أنسان إيمول .. علي كثرته مادرت بيه نما
قضيت كم عام وانا عليه انعول .. ألقيته هبا كله ورزق اربا
وما عاد سني تو لي أتخول .. أندير الخطا وأنعالجه بخطا
و اليوم الكريم ورحمته نسول .. تايب أنكمل في النهار صلاة
وما عاد نبي عل النسا نجو ل .. في العام يالله مره أندير غلا
........................
مانيش كيف زمان .. اللي فات مات وبات ماضي كان
كذاب كان قتلك عل الغلا عصران .. جربت الغلا لمرضي فيه دوا
ونعشق أيام الصغر و النسوان .. فيه بينا ذكرى وملح وما
وعندي حنين كبير في الوجدان .. للصوب الشريف اللي بدون أريا
لكن اليوم خلاص مهما كان .. ما عاد يغريني أسلوب أغرا
الأيام و الضروف إيغيرن الانسان .. الانسان مستحيل إيدير ما يشاء
حتى لو كسنه يعتبر عريان .. إللي يقتنع الايام موش كسا

وما نيش نا هو نا


......................
 (ما زلت نا هو نا) السائح البوسيفى ** القصيدة الواحده و العشرون
-----------------------

ما زلت نا هو نا ** ما درت من ليام يوم اغطا ** ولا انديرها
مازال عندى صبر ** وحافر بيدى للنوايب قبر
ومازال عزمى قو شبره شبر ** سريع حذر داير للقتال اوتا
حتى وهن ايامى من اهمومى غير ** نضحك انوارى فى اجروح اقوا
ومازلت ناقل كسر ماله جبر ** مكسور يبرى قول كان برا
ومازلت زامط مرلوعه وعبر ** مقطوع منه قطع ارشا
ومازال موس الوقت وسط الهبر ** خزين وقت من مداه صدا
زمازال حملى ثقل قوق الدبر ** لاشكيت لانى اللى رجعت ورا
ومازلت واثق صاح صغر و كبر ** كيف ما يبونى انجى انجيهم نا
وما زلت نا هو نا
........................
ما زالت لى غيريَه ** شؤيف اصل صادق من عرب بيتيه
ومازلت نفعل كلمتى رسميه ** وبلا فعل قولى ما عليه اعبا
زمازال عندى ع الاصحاب حميَه ** نوقف بما نقدر ان صار ندا
ومازال عندى احساس و انسانيه ** انجود فى المواقف ما انقصر لا
ومازال عشقى البر وام حويه ** عوج اللغاوى فى ارقاب حلآ
ومازلت نقدر اندير السيه ** و لا اندير هاللى اتمنسى بخطا
وما زال منتدانا فجر ساطع ضيه ** بجود من اوجوده ضى لاح ابها
ومازال ليبيا بالقدر و الهميه ** بلاد عز للى فى حباها جا
وما زلت نا هو نا
 
 (ما زلت نا هو نا) سعيد العمرونى **القصيدة الثانيه والعشرون
..............................
 
مازلت نا هو نا
ابن ادم أكتابه م الذنوب ملا ** يغفر لي الله
مازال هو موضوعة ** مشاكل الدنيا مو مشاكل لوعه
وايسبح بحمد الله وقتا يوعه ** اللي رد له روحه عطاه حياه
وايبادر صلاة الفجر وقت أطلوعه ** ويختمها أيصلي ع الرسول صلاه
ولا هو شكا بالحيل م الموجوعة ** والصبر خير ماكيفه اهناك دوا
ولا يشغله تفكير في مشروعة ** عارف اللي خالق أرزاق عطا
ولا أفراق البعيدة عمر سح ادموعة ** تسيل دمعته الفقد الرجال بكا
وشاغله زمانه بركته منزوعة ** لا مروة رجال ولا وجوه حيا
لاعد صغيرة ع الحشم مطبوعة ** حتى مازنا راه بالعيون زنا
وكيفة الذكر لبليس عنده طوعة ** غضب بوه وامه كل يوم خذا
دخان كارطة واطياح في مربوعة ** وسامر علي سهرة خليج أغنا
والكلمة القبيحة هي اللي مسموعة ** في الشارع ولا الجامع نهار مشا
والشر باذرة والي بذر مزروعة ** وأن ما اليوم بكرة م الحصاد كلا
في يوم ناسه كلها مجموعة ** وتاخذ علي ذرة أعمال جزا
مازال هو ديدانه ** مشكل الدنيا مو أفراق افلانه
الواجب عليه أيغيره بلسانه ** المنكر أن ما قادر أيمد عصا
وانكانهو ارضي بالقلب ضاع إيمانه ** وان ضاع دينا ماعد أيعوز بلا
أول أفروض الدين هي لمانه ** تضّيع وفي أخرهن تضيع صلاه
وايجدن أمراض وقبل موش أمعانا ** انكان الزنا بين العباد فشا
 
ولا عد غزير أمطار جاب سمانا ** انكثرن أموال ومانعين زكا
والكيل لو نقص وأخرى نقص ميزانه ** السنين الشديدة وجور حكم بدا
وبينا الباس شديد يقوى شانه ** انكان ما أكتاب الله حكمنا
وبذنوبنا أيسلط الله أعدانا ** كان عهدنا مع الله نقضنا
وانكان في المكان أفلان موش مكانه ** موعد الساعة راه قريب دنا
تخريب لاخرة وانعمروا دنيانا ** ولدار خاربة كاره انكان مشا
وغالي علينا القصر في ابنيانا ** ونسينا القبر اللي ظلام غطا
وغالي علينا المال في اجمعانا ** وانسينا زكاته وقت حوله جا
والموت كل يوم تجيب للجبانة ** وان ما سمعت قدامك أتشوف عزا
مواعظ أكبار أي عندكم يالانا ** عماء أقلوب ماهو بالعيون عما
مازلت نا هو نا



(ما زلت نا هو نا) بوبكر علي القديري**القصيدة الثالثه والعشرون
..............................
وما زلت نا هو نا ** انوح علي غالي قديم غلا ** والدار شاهده
ومازال عزمي هوا ** لكن فراقه بوغثيث ملوا
منه الخاطر نين تعكر جوا ** واسموري عليه الليل خلف دا
نصبر علي فرقاه وندير مرووا ** مامن الي مفارق عزيز مشا
ننسي غلاه لي راح ياخذ سوا ** ونشقا بحالي ونستعين بالله
هو الي رزق ادم وامي حوا ** وهو اللي ميسر حال لانبيا
ونخاطا الناس الشاقيا بالدوه ** القيل والقال عندهم هيوايا
ونبدا حياتي من جديد بقوه ** مانخون صاحب لي وين مشا
وانكان ع الغلا نصيب بيدا هوا ** ربي العالي يدير مايشا
مازلت نعشق غالي ** ومازال مايفارق سريبه بالي
لحظة وداعه عطبتلي حالي ** هو سبب دايا وهو الدوا
عقل وجمال والقرون مدالي ** ركاحه في العلل ماعندها ضوضا
شكيع خدها سبحان ربي العالي ** مازق بروق فعز جو شتا
يابوغثيث اتقول جيش المالي ** ويا بوميامي هلع نقرارا
دعيت ربنا يوثق معاك حبالي ** لايكون مايل ولايسير رخا
 (ما زلت نا هو نا) الشوبكي خيرالله أمجاور** القصيدة الرابعه و العشرون
 
مازلت نا هو ناء ** سوا يراجعن ليام واللا لا
عالجود والخصص مازلت في معداله **  ومازال كيلي بالوفا مكياله
انميل للوفاء والنقص مانا باله ** حتى لو طريلي في الحياة دواء
علي حكمتة مافي شي عوجاله ** واللي يريدها ربك تكون بهاء
الله هو اللي يأمر ايجي ابسهاله ** جميع رزق من فوق الوطاه مشاء
لابيع فيه ولا هناك ادلاله ** ولا يقولك مازال مسع جاء
اولو برقم بطاقة ولوبرسالة ** وشاهد يوضح لستلام لهاء
ولاله وكيل ولا عليه وكاله ** ولايمنعة واحد ان كان عطا
امغير وين مايأمر ايجي ميجاله ** ايجيك وانت لاتعلم ولاتدراء
ذمامن اللي خلاه فاحسن حاله ** وهو قبل لاحق مالعذاب صداء
مكروب كربت المسدى علي حماله **  وياما امراعي من ايام كداء
كيف مدله رونق وطال دلاله ** وكثرن مشاريعة ودار أبناء
نحكيلك علي وصفة عظيم جلاله ** اللي بحكمته يأمر بما ياشاء
وكافة جميع الكون تحت ارساله ** وعالم على اللي ماشكيت ابهاء
وعالم اللي طارب وفاضي باله ** وعالم على اللي في حياة صغا
والحوت ضامنه جوا غريق مجاله **  وصقع البحر عنده احساب دفاء
مستانس وماجد مرقده واوكاله ** وجلده قوي فوقه اتقول اغطاء
لايجيه هول ولا تعب يلفاله ** مطامن وعايش في حياة هناء
 
وهل المثل واضح من خلاف ادلاله **  ولانحكره تلزم عليه وصاء
ولا انبيع فيه ولاعليه عماله ** ولاني اللي مكري عليه اكراء
ولافي الخبر عندي اسلوب سهاله ** علي كل شي نبقى رقيق احداء
انوافق الحق ونرتضي لعداله ** واللي سقيم ماعندي امعاه خطاء
ابصيفتة الزين ايساعدك بفعاله ** عشراه كيف يطاول يزيد هناء
وانجيته علي كربه يهون ماله ** واللي تريدها منه يقول بها
ولايجي لشي واحد ويشكاله ** ولايريد من شورك اردود اكفاء
لجواد طبعهم ملي عظيم جلاله ** ماينقصوا ديمة اصحاب اوفاء
بنايت البيت اللي وسيع مجاله ** ملجاء للغريب اللي بعيد جبا
وهل البيت من غادي اصحاب كماله ** سواء مجدبه والا العام رخاء
عابر السبيل اللي معا جلجاله ** تعبان حالته يلطف الله بهاء
ان جاء اصدافهم يانس ويفضى باله ** بقولة ايساره مهناك بطاا
 
 
مازلت نا هو نا .. على ما طرالي في الحياه وجرا ..نظيف معدني
ما زال في إحساس .. وضمير إيتعذب من عذاب الناس
وما زلت نعطف رغم حقد الياس .. حتى إن كان ما عقب علي نما
قلع غرستي مالارض مالاساس .. ونشرها مع الارياح في الصحراء
حتى وهي هشيم وعروقها يباس .. كي قبر حاتم مي أحساب خلا
والمركب أتضره كثرة الرياس .. أن سافر و جاته عاصفه هوجا
ونا مركبي منسوخ بالحراس .. وين ما علي شط النجاة رسا
واللي قستا ما قاسها تراس .. طاحناتني الايام طحن رحا
امغير للمصابي درت قلب أنحاس .. وعبرة عبرة اليابان للمأساة
وما زال قلبي ما علن الافلاس .. قاعد رصيده للهموم دوا
وما زلت متماسك مثيل الساس .. كيف هرم خوفو عل الزمان عصا
وما زلت صامد كي جبل لوراس .. رغم هزات الدهر الاقوا
و الله يقرضك با بذرة الدرياس .. ربيع وطنها ديما عفاه جفا
وهناك كيفه من البشر أجناس .. اصحاب الفتن و الحقد و البغضاء
والله يلعن الوسواس و الخناس .. اللي للمحبة و الاسلام اعدا
وتحسير المذابح هو جزا لجناس .. لكن جبيني فيه عرق حيا
وما زال فيا الشعر للدراس .. أدروس وتجارب موعظة وهدا
وما زلت داير للرفق مقياس .. مصافي انصفي في الرفيق بها
أصحاب المروة قرعة المنهاس .. اللي في النوايب يوقفوا بسخا
معادن كريمة كي أحجار الماس .. علي كل ما تقدم أتزيد غلا
أن جا الياس يلقاهم أشداد الباس .. وأن جاهم رخا صفوا وعطا واحما
ونكره الغدر ساقيني الغادر كاس .. من طبيب في سكرة عطش واغما
و الظلم يا من البست الباس .. لا اتكون لي ولا أنكون لها
وهو ذيب يوسف حاس والله داس .. والله أنظره من دم الكريم دو ا
ترايوا عليه وركبوه حساس .. وشال وزر يوسف نين يوسف جا
مالي وما الزير و الجساس .. وحرب البسوس وداحس والغبراء
أستوعبت درس الشنفرة حساس .. من أمته الموتى يفهموا الاحياء ؟
وان كنت ورا عمران في الكياس .. أنشوف في بصيص الجدي و الجوزاء
أنحط الرحيل ونلتقط الانفاس ... ونحدد مساري قبل كل اوتا
و انشق الطريق الموحشة بحماس .. ونكون للخلا عابي بكل عبا
يا عصر فيه طموحنا ينداس .. من أي الكواكب جيت وأي فضا
ثقب الاوزون أزعمه واستقراص .. و الصحن اللعين إيغيرن الاشيا؟
أنحوس في متاهه حايسه محتاس .. امراه عكس امراه فيها انا
أستنجدت و خفت وصارلي إلتيباس .. وردن علي صوتي ألفين صدا
وحاولت مسك القلم و القرطاس .. ونبلغ صلاح الدين قالن لا
و جا العم ( جنكيز خان ) فوق خماس .. ب امغلف العنقاء
و الصليب والقديس و القداس .. و حرب النجوم وهالة العذرا
من شرق يثرب لا مغارب فاس .. عليه نفذوا الاحكام الاشقيا
الموساد نصب كم صنم تفساس .. ايردد افكاره كي الببغا
وربطهم ( شوار سكوف ) ربط أركاس .. رموز العرب في املوك في رؤساء
رسالة إلي الفاروق وألتماس .. الاسلام طالب في الاسلام أفتاء
الإسلام عندنا غيله وطعن أمواس .. وردت جميل الطيبات أذاء
والاسلام في إنحدار وأنتكاس .. شيع وماع وهدم ما ابتنا
ويا عمر تما حجنا (تكساس) .. ودين من النصارى و اليهود إيحا
وياعمر مجلس الامن و الجلاس .. أكلاب رامبوا تنبح علي من شاء
نصح عمر بالحسين و العباس .. وثورة الحجارة واطلبو الفناء
وما زلت نا هو نا
*****
ما زلت له مشتاق .. إللي هزني فرقاه من الاعماق
وسادل وراه أسدال ما ينطاق .. أستار ياس ما يجدي امعاه رجا
ويجي في منامي جية السراق .. ويحايي معاي امراض لي شفا
ونسبح وراه أنجول في الافاق .. خيال حلم ما يملى فراغ لقا
ويا تعس قلبي ما صفا لا راق .. ولا عاد يامن في جناب مرا
ودع زهاه مع غروب شفاق .. غلا بعده ما يالف حنان غلا
ويا حسرتي موعر سعير افارق .. أفراق جز مني ما امعاه نجا
إيكابر مع علة مرض ما تاق .. مرض سوس ينخر في حشاه دبا
كما غيض قهره و المرض عواق .. وعزايته شوامت فيه ما أشتكا
قلبي الطاهر ما عرف نفاق .. أمعاه الخساسة مي اردود اكفا
طموحه كبير وللعلا تواق .. ودونهم ضنا يعقوب قطع لوا
مصقول صقل السيف م الدقاق .. سابكاتني الايام عود شقا
وخليهن أن مالن ياخذن غنداق .. أساع ينصفن الايام يوما ما
ويبكي فيه نبل العشق للعشاق .. أبكا ما بكا في ضخرها الخنساء
وعلي طول ما طال الزمان الشاق .. نرثى فيه شعر ونثر واي رثا
وبجاه من عرج لله ع البراق .. أجعن من اسبب فيه دار خلا
وما زلت نا هو نا
 

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~

dude333
مشرف المنتدى السياسي
مشرف المنتدى السياسي

ذكر
عدد المشاركات : 5527
العمر : 47
رقم العضوية : 9508
قوة التقييم : 36
تاريخ التسجيل : 11/01/2012

الرجوع الى أعلى الصفحة اذهب الى الأسفل

رد: الجزء الرابع من ملحمه (ما زلت نا هو نا)

مُساهمة من طرف STAR في 2016-07-11, 9:54 am

انعم انعم احسنت

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
اشهد ان لا اله الا الله واشهد ان محمد رسول الله

STAR
النائب الثاني للمشرف العام
النائب الثاني للمشرف العام

ذكر
عدد المشاركات : 114683
العمر : 31
رقم العضوية : 31
قوة التقييم : 186
تاريخ التسجيل : 08/03/2009

http://tamimi.own0.com

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى