منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..

انضم إلى المنتدى ، فالأمر سريع وسهل

منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
منتديات عيت ارفاد التميمي
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» أندية السعودية تزاحم آرسنال على صفقة عربية
لوكان غير من باب الوفا شاورنا   Icon_minitime1اليوم في 2:51 pm من طرف STAR

» مانشستر يونايتد يستهدف مهاجم ريال مدريد
لوكان غير من باب الوفا شاورنا   Icon_minitime1اليوم في 2:51 pm من طرف STAR

» نجم آرسنال على طاولة برشلونة
لوكان غير من باب الوفا شاورنا   Icon_minitime1اليوم في 2:50 pm من طرف STAR

» مدن في ماليزيا تضمن للسائحين قضاء إجازة استثنائية
لوكان غير من باب الوفا شاورنا   Icon_minitime1اليوم في 2:50 pm من طرف STAR

» كيفية تعطيل وظائف مشاركة الملفات في الهواتف الذكية
لوكان غير من باب الوفا شاورنا   Icon_minitime1اليوم في 2:49 pm من طرف STAR

» ما هو سبب الخمول خلال النهار وما هي الاطعمة التي علينا تجنبها
لوكان غير من باب الوفا شاورنا   Icon_minitime1اليوم في 2:48 pm من طرف STAR

» حالة مزمنة تؤثر على 40% من سكان العالم تسرع من شيخوخة الدماغ
لوكان غير من باب الوفا شاورنا   Icon_minitime1اليوم في 2:48 pm من طرف STAR

» كيك الشاي بالزعفران والبرتقال
لوكان غير من باب الوفا شاورنا   Icon_minitime1اليوم في 2:47 pm من طرف STAR

» الصلاة علي رسول الله+الاستغفار+ذكر الشهادة+كفارة المجلس
لوكان غير من باب الوفا شاورنا   Icon_minitime1اليوم في 2:44 pm من طرف STAR

» عناصر غذائية تنشط الغدة الدرقية
لوكان غير من باب الوفا شاورنا   Icon_minitime1أمس في 2:13 pm من طرف STAR

» رونالدو يصب غضبه على الحكم الرابع بعد خسارة مدوية للبرتغال
لوكان غير من باب الوفا شاورنا   Icon_minitime1أمس في 2:13 pm من طرف STAR

» ما الأفضل الاستحمام ليلا أم صباحا؟
لوكان غير من باب الوفا شاورنا   Icon_minitime1أمس في 2:11 pm من طرف STAR

» كبدة دجاج مقلية مع حمص بالبصل
لوكان غير من باب الوفا شاورنا   Icon_minitime1أمس في 2:10 pm من طرف STAR

» مباريات الثلاثاء 26/3/2024 وقنوات الناقلة
لوكان غير من باب الوفا شاورنا   Icon_minitime12024-03-26, 3:24 pm من طرف STAR

» جولة على الجسور القديمة... معالم شهيرة صمدت على مر التاريخ
لوكان غير من باب الوفا شاورنا   Icon_minitime12024-03-26, 3:21 pm من طرف STAR

بحـث
 
 

نتائج البحث
 


Rechercher بحث متقدم


لوكان غير من باب الوفا شاورنا

2 مشترك

اذهب الى الأسفل

لوكان غير من باب الوفا شاورنا   Empty لوكان غير من باب الوفا شاورنا

مُساهمة من طرف dude333 2016-07-18, 10:13 am


ملحمة لوكان غير من باب الوفاء شورنا بداية هذه الملحمة للشاعر المتألق محمد حامد الشيخي وتولت عليها ردود الشعراء  
********************
الشاعر محمد الشيخي
********************
لوكان غير من باب الوفا شاورنا  ..  ما ايريد يربحنا ولا يخسرنا
لط رحيله  ..  ودار دورت العاقب نهار الشيله
لوكان غير شاورنا هذيك الليله  ..  امعاه فى هذيك وهذى ما قصرنا
امغير كل حد عنده طريق اتشيله  ..  وحنا طريقنا من يوم فيها سرنا ..
الها اعيار ما نرضوا اعيار بديله  ..  واموالف علي شض الحمول ظهرنا
وموش عيب لا عاب الخليل خليله  ..  حتى فالبطون ايعاركن لمصرنه !
لوكان غير من باب الوفا شاورنا  ..  ما ايريد يربحنا ولا يخسرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر صالح بوعياد الشهيبي
********************
لوكان غير من باب الوفا شاورنا  ..  ما ايريد يربحنا ولا يخسرنا
لو كان رد الشيره  ..  رانا اخترنا له الراي الخيره
لا انبصروا لا نعرفوا تبصيره  ..  احنا عمرنا فالجد ما بصرنا
سوا راينا ايديره سوا ما ايديره  ..  المهم رانا جلوته صدرنا
لوكان غير من باب الوفا شاورنا  ..  ما ايريد يربحنا ولا يخسرنا
********************
رد الشاعر عبدالسلام بوجلاوى
********************
لوكان غير من باب الوفا شاورنا  ..  ما ايريد يربحنا ولا يخسرنا
عزيز القيته  ..  من غير علمنا مختار دار لبيته
بلا اسباب سبب بينا تشميته  ..  الله ايهديه ابموقفا دردرنا
لوكان غير بلغنا ابما فى نيته  ..  وحط العلل فى لرض وادابرنا
نين نفهموا منه اسباب بليته  ..  وليش وعليش ابغيرنا غيرنا ؟!!
لوكان غير من باب الوفا شاورنا  ..  ما ايريد يربحنا ولا يخسرنا
********************
رد الشاعر محمد الممهور
********************
لوكان غير من باب الوفا شاورنا  ..  ما ايريد يربحنا ولا يخسرنا
لو كان عد رفقنا  ..  وخطم وشاور قبل لا يفارقنا
بالك انجوه ابراي بيه وثقنا  ..  حتى ما خذابه لاخره عبرنا
وبالك ايشابك مرفقه مرفقنا  ..  نجاوروه وانديروا اللى تسترنا
ومنينه على يسار الطريق عزقنا  ..  صغرن اقداره راه ما صغرنا
ولايشطنا ما صار لا يقلقنا  ..  هو اختار وحنا للكريم صبرنا
لوكان غير من باب الوفا شاورنا  ..  ما ايريد يربحنا ولا يخسرنا
********************
رد الشاعر عبدالرحمن بوصوكاية
********************
لو كان غيرمن باب الوفا شاورنا .. مايريد يربحنا و لا يخسرنا
لوكانهو صارحنا  ..  وخبر برايه قبل مايفضحنا
كنا مشينا لعاقلين طرحنا  .. عليهم الميضوع و إشّاورنا
وكنا انديرو راي في صالحنا  ..  صالح ايجمعنا وماودرنا
ولاكن خصارا هالعزيز سلحنا  ..  سلحت قديم الثوب ما دورنا
باع الغلا واحنا اللي ربّحنا  ..  اللي باعنا انبيعوه ماكدرنا
لو كان غيرمن باب الوفا شاورنا .. مايريد يربحنا و لا يخسرنا
********************
رد الشاعر السايح البوسيفي
********************
لوكان غير من باب الوفا شاورنا  ..  ما ايريد يربحنا ولا يخسرنا
لوكان وسع باله  ..  تعوذ من الشيطان حط ارحال
تمهل صبر ع القيل واللي قاله  ..  غربل وصفى اللي ابها غسورنا
ركز وشاف وقال شن درناله  ..  لين فى حفيره حضرته حدرنا
هو عارف اللي ايدير فيه فساله  ..  رايد ابها فى خاطره يقهرنا
اتقول دم له عنده قديم ايساله  ..  ما ايجيب غير اللي اتجيب ضررنا
وتو ينفعه لو ما برمش افعاله  ..  يخسر ابضعف اضعاف ما خسرنا
ويشبح الله فى حالتى وفى حاله  ..  هللي علي اعروق الندى كورنا
لوكان غير من باب الوفا شاورنا  ..  ما ايريد يربحنا ولا يخسرنا
********************
رد الشاعر صلاح عبيد
********************
لوكان غير من باب الوفا شاورنا  ..  ما ايريد يربحنا ولا يخسرنا
لو كان حتي وفا  ..  وزّن اموره بين كفي وكفه
عدْ الأيام اللي لطمهنْ غفّا  ..  كسر زهاويهن وزاد كسرنا
نسا وقت كان بجمرتي يدفّا  ..  نسي كل شي اتقول مادمرنا
ماسال عني كيف نا نشفا  ..  ف غيبته ندعي الله يجبرنا
همش ندايا راح نوري طفا  ..  نسا فالحقيقه كان زمان قمرنا
ياريت خبرني وقال حذفا  ..  رشادة غلانا والبعيد دفرنا
اللي واجعتني خدعته بالعفّا  ..  قول اللطافه قول بيه بهرنا
اللي واجعتني كنت نا في صفّا  ..  ونحلف عليه انقول مايغذرنا
أمأمن اسراري ليه داخل رفّا  ..  غربال تاريته وزاد كدرنا
ياما زرعنا اورود هو صيفّا  ..  ياما حكينا ع الغلا وسمرنا
ياما ياما . شوق ياما صفّا  ..  ب أكلاش الجفا فرغ وماعبرنا
تاريته غلانا كان عنده نفّا  ..  استشق . تكيف بعدها وطمرنا
الحاصل وجعني ماحكالي وحفّا  ..  شور الجديد اللي كسر خاطرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر ناصر أبوعجيله الشيخي
********************
لوكان غير من باب الوفا شاورنا  ..  ايريد يربحنا ولا يخسرنا
لوكان هو راجعنا  ..  واسمع راينا واحنا ارياه اسمعنا
لو كان هذا درنا راي زين جمعنا  ..  وقرعتنا عطى فالراي وادابرنا
خذا راينا والله ارياه اتبعنا  ..  المهم رانا عالصلاح عمرنا
لو كان رد علينا  ..  رانا عطينا والكلام خذينا
ورانا عليه ابراينا رايينا  ..  وبالراي السليم امعاه ما قصرنا
والله جاب راي مقنع و بيه ارضينا  ..  المهم بالشيره جبر خاطرنا
لا دين سلك لا سلك فى دينا  ..  بلا امشاوره سافر عزيز هجرنا
لو كان غير من باب الوفا شاورنا  ..  ايريد يربحنا ولا يخسرنا
********************
رد الشاعر اكرم الكاسح
********************
لوكان غير من باب الوفا شاورنا  ..  ايريد يربحنا ولا يخسرنا
لوكان غير تباطى  ..  وجا سالنا الشيره انفكو ارباطه
موش هك يرحل فالخفا بزقاطه  ..  لاعد خاطرنا ولادورنا
ولاكان شامت دارنا رغاطه  ..  ولا كان لايم لامنا ونزرنا
بالي الرقيع اتفسده لخياطه  ..  وبني الخيا لاسبد مايقبرنا
لوكان غير من باب الوفا شاورنا  ..  ايريد يربحنا ولا يخسرنا
********************
خالد المجبري
********************
لوكان غير من باب الوفا شاورنا مايريد يربحنا ولا يخسرنا
لوكان في تخطيمه  ..  جانا وسكرنا املاف قديمه
لكن بلاتوديع راه ظليمه  ..  لنا الله وهو اللي ايصبرنا
علي بيعته لنا بلاتسويمه .. وعن كسرته ابقل الوفا خاطرنا
وعن جرح تمه غير ناقل ديما .. من جية الشامت اللي خبرنا
وعن عين مازالت الها تبليمه .. من يوم مافارق فراق قهرنا
وكان غير شاورنا بعد تسليمه .. بالربح قلنا له وماكدرنا
لوكان غير من باب الوفا شاورنا  ..  ما ايريد يربحنا ولا يخسرنا\

********************
رد الشاعر ابو ريان
********************
لو كان يا غالينا  .. . خدينا معاك وفى الكلام عطينا
نخلط ونقسم ماعليك علينا  ..  وندفع الزائد كانا قصرنا
الا اللوم مانقبل نهار ايجينا  ..  نكبر مع الميعاد مايصغرنا
لوكان غير من باب الوفا شاورنا  ..  ما ايريد يربحنا ولا يخسرنا
********************
رد الشاعر حافظ الشيخي
********************
لو كان هو جارحنا  ..  شاور نهار الشيل ما انجرحنا
لا ايريد يشرينا ولا يربحنا  ..  ولا يزيح عنا همنا وكدرنا
يامه امعا جاوى الصوب مدحنا  ..  لو الشور رده را ابراي عمرنا
لوكان غير من باب الوفا شاورنا  ..  ايريد يربحنا ولا يخسرنا

********************
رد الشاعر عز الدين التريكي
********************
لو كانهو راجانا  .. ..لو كان ع اللي ف خاطره حاكانا
ما كنت نا و العين يوم حزانا  .. .. لا كنا درفنا دمعنا غدرنا
شد الرحيل بهونته فاجانا .. ..عدى رقد مو عادته يسمرنا
جرحه صعب مصعب على نسيانا .. ..يا مسهل عليه اطياح ما عمرنا
درفنا علي اللي بسيته كافانا .. ..اللي قبل ما يغدر اليوم غدرنا
ياما مشينا بشوقنا و هوانا  .. وسط الجناين مانهار عثرنا
وسط الجناين دايرين عزانا  .. . ف كل الامكان حلمنا بعثرنا
انتمم كلامي بالصلاه لمولانا  .. ..عوضي عليه ان شاء الله ايصبرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر سالم محمد درياق
********************
لوكان جا ونشدنا  .. . رانا اللي وسط القلوب جبدنا
وراهو رسم ميعادنا ميعدنا .. .وقلبنّامعاه الراي واشاورنا
ومع حضرته درنا حدود جهدنا  .. . لين نقنعوه بشي كان اقدرنا
وشلنا معاه رحيل واسقدنا  ..  .. . كانا علي شيل الرحيل جبرنا
امغير هو رحل خلا وراه عددنا  .. ولومة ومية كسر في خاطرنا
من هول دورته فينا فرح حاسدنا .. الله ايسامحه العزيز ويصبرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر خالد أقشيرة
********************
لوكان هو لمحلي .. .مانبيه يطريها ولايشرحلي
نفهم على الطاير ومايوضحلي .. .ونكونو تفاهمنا وهك اخترنا
مايقولها علني ولايفصحلي .. .. ويشوه حلاوة صورتا ف خاطرنا
وان كاني مخطي نبي يصححلي ..  استاد هوا وطلبته دايرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر مفتاح بوحرق المغربي
********************
خذاني بوقه  ..  عزيز غربي مازلت نا فى شوقه
جرينا امعاه وماعطانا روقه  ..  اياماً واشوقه بي  ..  ما عبرنا
وشريته ابراس المال عامر سوقه  ..  مصوقرينه مضمون ومصوقرنا
عذره عطيب وحجته ملقوقه  ..  صدمنه جفاه الشين ومقطمرنا
وبعد عاقني ما ارضيت يوم انعوقه  ..  انفكن ارمامي وانكسر جابرنا
عزيز باعني بطلوق ما مطلوقه  ..  خلف امواجع بي نين شعرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر عبدالرحمن عابد المغربي
********************
لوكان غير من باب الوفا ودعنا  ..  وجاب راي مالرايات بيه قنعنا
لوكان هذا سامحناه ما توجعنا  ..  مشيت عزيز وهلبته موكرنا
لوكان دارهابالك اتقول صنعنا  ..  وجت من جنابه فائده صبرنا
لا يضرنا جفواه لا ينفعنا  ..  امغير موجعه وارحكت فى خاطرنا
على كل حال احسابنا راجعنا  ..  امعاه مالقينا عيب به يذكرنا
وما عمر ما كلمة العيب اسمعنا  ..  منا ولا فى ما مضى صغرنا
الشى المحيرمن طرف لا يعنا  ..  قبيته مشى فالسر ما خبرنا
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعرة عهود العريبي
********************
ساق رحيله  ..  كيف نو قاطب ماطره فى ليله
انادي عليه وما نداى اصغيله  ..  عدى ابشوقنا وزاد الزمان قهرنا
والعين حايسه وبدمعها ترعيله  ..  ولكان هامته ما صفوها عكرنا
ناضت اتشالى بالغطا توميله  ..  وجثامة رحيله اتقول ( حيه ) اخسرنا  
لوكان غير من باب الوفا شاورنا  ..  ايريد يربحنا ولا يخسرنا
********************
رد الشاعر صالح العبار
********************
لوكان غير من باب الوفا شاورنا  ..  ايريد يربحنا ولا يخسرنا
ياريت جا وحكالى  ..  وفضه على روحه وجا وشكالي
يلقانه سند واصحاب له فالتالى  ..  والحمل الثقيل انشيل لو يدبرنا
ونحموا الرمية كان جانه جالى  ..  وانشيلوا عناه الجار لا جاورنا
ونحمل العيب ودوم واسع بالى  ..  ما اتدردره حاجة غريق بحرنا
لوكان غير من باب الوفا شاورنا  ..  ايريد يربحنا ولا يخسرنا


-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
لوكان غير من باب الوفا شاورنا   116669782
dude333
dude333
مشرف المنتدى السياسي
مشرف المنتدى السياسي

ذكر
عدد المشاركات : 5585
العمر : 54
رقم العضوية : 9508
قوة التقييم : 36
تاريخ التسجيل : 11/01/2012

الرجوع الى أعلى الصفحة اذهب الى الأسفل

لوكان غير من باب الوفا شاورنا   Empty رد: لوكان غير من باب الوفا شاورنا

مُساهمة من طرف علي بومطايو 2017-04-05, 11:25 am

الله عليك وع هذا القصائد ارائع
قمه في الابداع تحياتي cheers cheers cheers cheers
علي بومطايو
علي بومطايو
عضو جديد

ذكر
عدد المشاركات : 8
العمر : 33
قوة التقييم : 0
تاريخ التسجيل : 08/03/2017

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى