منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» وصول سيولة مالية إلى مصارف درنة قادمة من مصرف ليبيا المركزي البيضاء
اليوم في 10:07 am من طرف STAR

» مصارف درنة تعلن فتح أبوابها أمام المتعاملين بدءا من الأثنين القادم
اليوم في 10:07 am من طرف STAR

» تكليف العقيد خالد عبدالله آمراً للغرفة الأمنية المشتركة في شحات‎
اليوم في 10:06 am من طرف STAR

» شرق طبرق تري النور بعد انقطاع التيار 19 يوماً
اليوم في 10:06 am من طرف STAR

» إطلاق سراح رئيس ديوان حكومة طبرق بعد اختطافه في البيضاء
اليوم في 10:06 am من طرف STAR

» العقيد أحمد شعيب مدير أمن طبرق
اليوم في 10:05 am من طرف STAR

» خبراء جدد يؤدون اليمين القانونية للعمل بمركز الخبرة القضائية فرع طبرق
اليوم في 10:05 am من طرف STAR

» مديرو جهاز الإسعاف بالمنطقة الشرقية يطالبون بتعديل أوضاع الاعاشة
اليوم في 10:05 am من طرف STAR

» المسماري: البنيان المرصوص دعمت الهجوم على الهلال النفطي والسراج متحالف مع القاعدة
اليوم في 10:04 am من طرف STAR

» المجلس الأعلى لحوض النفط والغاز يستنكر الهجوم على منشأت النفط الليبية
اليوم في 10:04 am من طرف STAR

» الجيش يعلن وقف إطلاق النار في قنفودة غرب بنغازي
اليوم في 10:03 am من طرف STAR

» شورى بنغازي ينفي علاقته بأي مجموعات مسلحة في طرابلس
اليوم في 10:03 am من طرف STAR

» بلدية بنغازي تتسلم سيارات إسعاف من برنامج الأمم المتحدة الإنمائي
اليوم في 10:03 am من طرف STAR

» الصاعقة تحبط هجوم انتحاري بسيارة مفخخة
اليوم في 10:03 am من طرف STAR

» ناقلة نفط تستعد لتحميل 590 ألف برميل من ميناء الزويتينة
اليوم في 10:02 am من طرف STAR

بحـث
 
 

نتائج البحث
 


Rechercher بحث متقدم


كونه ضاع ضاع.كامله.بجميع الردود من شعراء الفحول

استعرض الموضوع السابق استعرض الموضوع التالي اذهب الى الأسفل

كونه ضاع ضاع.كامله.بجميع الردود من شعراء الفحول

مُساهمة من طرف الهيلع في 2010-05-15, 8:53 pm

لشاعر "السنوسي الحمري " مدينة سبها قال



كونه ضاع ضاع .. جريت وراه حد المٌستطاع .. وما لايمت

..

وبعد ذالك طرأ تغيير فى راس البيت وأصبح


كونه ضاع ضاع .. جريت وراه حد المٌستطاع .. افراقه صار



..

وكانت مُشاركة الشاعر " السنوسي الحمري "





كونه عك عك .. وكونه امعاى خبل ماسلك

ماسلمت راهو انفك فك .. جنين الكبد واخذانى امزاع
انحوس اتقول حاصل فى شرك .. انفك ايدى تحصلى اكراع



..



الشاعر " امحمد الغزالي بن عيسى " بنغازي


كونه راح راح .. وكونه فقد فعل(ن) فقد صاح
وكون اترد لايام السماح .. ماضنيت لاضنيت باع
ارياح القسم لطنهن ارياح .. وصاف غلاه فى عز الارجاع
اونامازلت معقود الجناح .. انراجى فيه من يوم الاوداع
وهو بغلاي مطلوق السراح .. انسى ماصار تحلف ماالتاع
*-*-*
كونه خف خف .. الما والملح خف بما حلف
وكونه صف دونه ياس صف .. انصارع فيه واقدرني الصراع
لا عراف شاكيته عرف .. ولا فزاع منه جن افزاع
ولا سلمت فيه ولا صدف .. ولا للقسم طعت امنين طاع
صهدت الكبد وين الدمع جف .. رجية عمر ما تقبل اوداع
علي ليام خليت السلف .. ايردن فيه كيل الصاع صاع
..


الشاعر "ناصرالعقوري " اجدابيا





عارك نين طاح .. عليه العقل لاكن راح راح

صبا دون ياسه بسلاح .. امغير خذاه منا بالذراع
أونا تميت فى مصفق ارياح .. ابقى للياس صوبى بالجماع
اهموم الوقت درانى امراح .. من رايات مبهوت الخناع
اتحوش اليل وتمد الصباح .. ردن فى كيل اللوح صاع

..




الشاعر " سالم الدرياق " سرت


درته اللى قدرته .. وكونه ضاع وخسرته خسرته
ووين اياست من قربه نكرته .. طبعى حار نرفض لنصياع
بدا بالغدر لكن ماغدرته .. بلا ميعاد هان الود باع

كميته سر فى عقلى طمرته .. خفى عالناس لو وصلوه ذاع

..



الشاعر "الشريف الشارف الحرنة " اجدابيا




ما فيها ندامة .. بلاه انحمل ننساهن ايامه

زمان الوصل مااقصرهن عوامه .. للطماع ما فيهن اطماع
امرار الفقد متجرَّع آلامه .. والجراع يلوي في الذراع
فقد اجواد ماتوا ع الكرامة .. اطوال الباع في زين الطباع
لْهم في الناس لو دوَّرت ياما .. نريد ارداع ما نلقى ارداع
وما من وطن متمازي حزامه.. طوايف رفض خلنَّه امزاع
عامر كان باصحاب الشهامة .. يحاموا فيه من خوف الضياع
ان صار لطام مايهابوا لطامه.. وان شحَّ المير طعَّامة جياع
ما اصعب يوم تنكيسة اعلامه.. ما من قلب من هوله التاع
شاخوا فيه قطَّاعة ارحامه.. اللي من قبل لخصومه اتباع
بيت العز قلاَّعة رمامه .. لقينقاع ياما من اشياع
قنو السو متمادي إجرامه .. وجهه بشع ما فوقه قناع
ضنا لجواد جضَّوا من احكامه .. احفاد اسباع دالنهم اضباع
ما من طفل ودَّع الابتسامة .. وأم تنوح ما جنهم افزاع
واندال الصقر نفاض الكمامة .. لا للشروط عدوانه انصاع
بهر الابصار في لحظة اعدامه .. مشهد فخر في لوطان شاع
وقفة عز زاداته فخامة.. لا مالحبل شوّب لا ارتاع
بالتشهيد صرح في ختامه .. علامة خير ما فيها انزاع
يا بغداد عاقبتك سلامة .. فضل الله بيبانه اوساع
مهما الليل يطاول ظلامه .. ان تاق الفجر ياذن بالوداع
باذن الله تنزاح الغمامة .. بعد لقهار وسنين الصراع
..






الشاعر "عبدالقادر بكار العوامي " بنغازي





كونه صار صار .. هذا قسم ماعندى خيار
والمكتوب مامنه فرار .. وامر الله نقبل باقتناع
جرحه شين طبابه احتار .. والتضميد ماهاون اوجاع
وفالمكنون ماطفيت النار .. لعند اليوم من يوم الوداع
..





الشاعر "ابوبكر بوحويه " لبريقة


كونه فض فض .. غرض من كان للخاطر غرض
في دنواه لاطشني الحظ .. مشي بالقسم ماهو بالذراع
يا لو في مازال المعض .. ما سيبت سفاي لقناع
لاجل فيه ما نقبل عوض .. وفي سباه ما انهاب الصداع
غير ايديه من ديه نفض .. اجهار نهار من شاريه باع
والي اتنين فيه اتقض قض .. غنوه اوحود كانولي اتباع
لو كان مغير نابيه نتعض .. ما ننحط في خانة اضياع
نا في ايدي من غيرة انعض .. انغالي غير في نفس الطباع
اعطيلي عهد قبله وانتقض .. فيه ابردن نيران الاخداع
ابذار اوفي حتى كي رمض .. سوايا رد كل امخلب صاع
وشلت الحمل كي فوقي انشظ .. حتى كان لاحقني اضياع


..

الشاعر "عبدالسلام بلحاج " سبها

كون كان كان .. كيان وكون فى كون وكيان
وكونى كنت له حد الامكان .. نكون حريص فائق لأطلاع
على مافيه من سر وبيان .. ومايحاك ضده من أطماع
انخاف عليه من زلة السان .. عليه وفيه رافض لأستماع
وكونه كان ماكن فى المكان .. اللى مابين صفات لظلاع
وكان نسيم طارد للأحزان .. نقى مافيه شى بلا صطناع
وكان ربيع زاهر بالحنان .. عفى للعقل شاسع لأتساع
وكاد يكون هو شط لأمان .. لولا فعل موجه بالشراع
..


الشاعر " علي عبدالهادي " سبها

كونه راح راح .. وكونه طاح بعد العلو طاح
ولكن موش فى وين استراح .. ولافى وين تبتله اكراع
وكونه لاح بعد اليأس لاح .. وحاذف عن مخافيه لقناع
وكونى كنت مكسور الجناح .. وحلمى فيه من كاره انباع
خذنى عن مولاته ارياح .. وشلت اللون لابيض بأقتناع
وكونه فى عايش قول صاح .. وماعد لى فردوده اطماع
وكونه كل كلى مستباح .. اكيد اكيد مافيها اخداع
ونيسى غير ماصادف صلاح .. الله الله والدنيا متاع
وفى ماصار عاطيه السماح .. وخير الله مافيه انقطاع
..
كونه طارطار .. وكونه جار فوت الجور جار
وكونه حرق يحرق حرق حار .. سرى بسموم بسم الله شاع
وكونه دار فينا دير دار .. مشوكل شرك ويزيد اتساع
بلى عالوقت ما رد اعتبار .. غلانا فيه سالك صاع صاع
ابقيلى نار ماتطفى ودار .. لها ماعاد عندى طول باع
..


كونه لط لط .. وكونه حط فى وين التهط
وكونه حلم بضياعه سمط .. العقل بنار وهموم وضياع
وكونه كان فى جلوة الشط .. وغافل عن مفأجاة الاوضاع
فرمشة عين فى غارق خلط .. اشرق ماطق فى مد الذراع
لمن خلاه للعازة ايلط .. وغيب قبل لايقول الوداع..

..


الشاعر "عادل شحات " اجدابيا


نجرى يالحمرى .. غير شقاى ضاع وضاع عمرى
قلت القسم فيدى طاع لمرى .. غير القسم لمر اليأس طاع
نطمر فيه فرقت حال طمرى .. سرا شاع بين الناس شاع
واللى قلت بين ايدى وغمرى .. هان غلاي بيع اطلوق باع

..


الشاعر " مفتاح الفالح " اجدابيا

..

كونه كان كان .. جريت وراه فى حدود الأمكان
مامن تو ساعى من زمان .. انقول اساع يوفيلى اساع
كميت السر لكن بان بان .. بوبح بيه بلعانه اوشاع
خلاص ارتحت من قاسى اوخان .. وفتكيت من لوى اذراع
عليه ادمنت خلانى انسان .. ايعيش ابربع من اربع ارباع



الشاعر "بوشناف الشلطامي "



كونه طاش طاش .. اشرب لرياح مافيها نقاش
ايحوش ان كان ريم الفج حاش .. وهو بالعين ينظر فى اسباع
ونا تميت ندفع فيه كاش .. رجاه دموع كى غيث الأرجاع
اللى هو كان هو حد الحواش .. ونجحد فيه صوبه ما انذاع
امفيت ارياح فى الدار اتناش .. وجرة دبو فى قولى اضباع
الا هاضاك زوله ماطشاش .. على لنظار يلفا لااساع

..


الشاعر " عبدالسلام بوجلاوي " بنغازي



كونه فات فات .. زمان غلاه واللى فات مات
وكون الفكر با اسبابه شتات .. راح ارياح من يوم الاوداع
وكون الصغر عدن به اوقات .. شباب العمر والبرطاع طاع
غزاه الكبر باصياف النبات .. واحصاد الزرع وادراس الاقياع
قعد حتحات فاضل ما لأحتات .. وماصفوه من غيره اشباع
والشبعان حتى فالفتات .. بطى فالفت للناس الجياع

..
الشاعر " محمود العبار "

كونه طار طار .. بين ايدى فى عز النهار
بوجنحان مرفوع المطار .. نكر داعيه مو ناوى ارجاع
ترقص فوق واللى صار صار .. بكل فيه ماعندى اطماع
حد عزاى سيلن يا انظار .. ادموع اتقول سفوه فى ارجاع
افراق اعزاز نالقنا امرار .. سوا تخفيه والأ كى انذاع
حتى كان من واطى النار .. له لخرين مايحسو اوجاع
..

الشاعر " سالم العوكلي " البيضا

كونه صار صار .. افراقه مر واخطوره امرار
وراه العقل حايس فالمدار .. وضاقن بيه لفجوج الاوساع
كي من خش في صحراء وحار .. وشور اعربه ما جابه اكراع
ولا ليمين عارف من ليسار .. والارض ابرمة واشوي المتاع
..

الشاعر " عطاياالصبحي "
..
ضاع وعوزوني..اصحاب عقول كانوا يفهموني
معاكن الاذن سيلن يا عيوني .. كان الدمع يبري في الاوجاع
كميت مغير بانت في جفوني ..صبر العقل كامل من افجاع
فقد اجواد هم لي دقدقوني ..اصحاب الصيت جوهر باللماع
ابعاد البوع ما هم كي الدوني .. في ما فات كانوا م السباع
ركَّابين جيَّد مو حروني .. وينيفز ديره جا امزاع

عليهم دوم سايل بهدلوني .. وكم خويل خايب غير طاع



.. الشاعر " محمد الشيخي

..

راضى بالخساير .. يالى فيك مافادن ثماير
حتى كان مانى طير طاير .. لى اجناح يهوى الارتفاع
وعندى عقل مو ناقص دباير .. وعندى وجه مايعرف اقناع
ولا امخصوص ننزل دار باير .. ولاننجر فى جرت اكراع

الشاعر " ........."

..

كونه فى قصر .. وكل نفيس من ذاكره كسر
كونهجد جدى ماتحسر .. ماهماش لابيا استاع
احسبته لى ثاريته اينصر .. يدعى امعاه ضدى كل داع
اوكونه فى يربح كان خسر .. عشرة وقت ناقصها اجماع
جى فى الحلم لكن مااتفسر .. انى مجثوم وانفاسى اقطاع
اوجانى خوف فيا لين جسر .. على لكراع ركبتلى اكراع
..
الشاعر " .السهران."من سبها

..
كونه غاب غيب .. وكونه كان يالايا اقريب
وعاش امعاى لين الرأس شيب .. وله ثأتير عندى واندفاع
بنحاكيك رانى يا احبيب .. افهم زين واحسن لأستماع
جانى صهد لين الكبد طيب .. وكم من يأس جا دار اجتماع
ضهرلى حلم لكن حلم طيب .. امغير الحلم خاتمته ضياع
..
كونه راح راح .. وكونه ضاع شالنه ارياح
فيه العب يأسى واستراح .. وخلا الجوف مطرطش امزاع
يخدم فيه خدمة بالركاح .. لو عجول لاهو بالاوجاع
ولو بالجهد لاهو بالصياح .. او لابالمال ولا لانصياع
انديروا شى ماهو مستباح .. ونجروا جرى فوق المستطاع
..

..

الشاعر " ......."

..

كونه هام هام .. وفى الهيام ليه اليوم عام
تباعد خش جوا فى الظلام .. تهاوا صار تحت القاع قاع
هزى عالنصح وهزى عالملام .. واللى مايوم ريه طاع طاع
حياته فلم من جملة افلام .. الدنيا دين يخلص صاع صاع
اقباله مات ماهمه الالام .. جنين الصوب يثغا واع واع

..

الشاعر " ........"

كونه ذاب ذاب .. ذوبة ملح فى طاسةشراب
وفيما جد ماجاء فى احساب .. لغا مدعاه بالى باأقتناع
بعد سافيه دون الدار ثاب .. وبات الدرب مالفا للفاع
ارياح اليأس كاسيته تراب .. بحر ريغان مااتخشه كراع
قل البخث هو راس الاسباب .. ولط القسام هو سر الضياع
حبيب الروح ماكيفه احباب .. ولاظنيت ناجدله ارداع
سواد الرأس من مطره شاب .. اللى عالعين غايب والأسماع

للشاعر المتميز محمد الممهور :

كونـــه غـــــــاب غـــــــــــــــــاب .. و كونــه فــص ملــح و ذاب ذاب

و كونـه فيـه خــاب الظــن خــاب .. و كونــه طــاع للعـــدوان طــــاع

و كونـه ساب عهد الصوب سـاب .. و كونـــه لاع قلبـــي بنــــار لاع

سـراب و كنـت نحسابــه شـــراب .. جريــت وراه ضيعنـــي ضيــــاع


كونــــه خــــــص خــــــــــــــــص .. و كونـه قـص حبـل الــود قــص

و كونـه غـص قلبـي بـداه غــص .. و كونـــه بـــاع ودي راه بـــــاع

شـــال النـــص خلانــي بنـــــــص .. مركـــب دون دفـــه لا شــــــراع

علــى نغمـــات عبراتـــي رقـــص .. و نـا مجـروح نشلـى مالاوجــاع


كونــه خـــــــان خــــــــــــــــــــان .. و كـونـه بــان قــل وفــاه بـــــــان

و كونـه كـان نـور العيـن كــــــان .. و كــان الفـرح وبليلـــي شعـــاع

و كونـي كنـت غـارق فـي الحنـان .. كنــت مغيــرحنانــه خــــــــــداع

اللـي راعيــت مـن طيبــه الـــوان .. راح الطيــب كــي طـاح القنــــاع

زمـان الحلــم عــدى فــي زمـــان .. اليـــوم وداع يـــا صوبـــــه وداع

نهونـه كيـف ماضـي العهـد هــان .. نــعده ضبــــي حازنـــه اسبـــــاع

شـلايـــا راح مـا بيــن الاسنـــــان .. و دار الــدم فـي التربــه نقــــــاع

مغيــر كــلام مــا فــات اللســـــان .. غــلاه اورام سرحـن فـي النخــاع

نخـاف معـاي يبقـى فـي الاكفـــان .. و يوم الحشر يمزعنـــي مــــزاع

كرهـت الروح و كـرهـت الانسـان .. اللـي فـي الـروح نازعنـي نــزاع

زرعتــه فــرح عقب لـــي احــــزان .. رفعتــه علـــو نزّلنــي القــــــــاع

رغــــم القـــو قدامـــه جبـــــــــان .. و رغـم الضعـف قدامــي شجــاع

حتـــى بعــد فارقنـــي و خـــــــان .. مابــى يهــون بو عيونــاً اوســـاع

خيالـه تـم ساكـن فــي الاجفـــــان .. و صوتـه يـوم ما فــــات لسمــاع

نشـم اريـج عطــره فــي الابــدان .. نحـس بلمــس كفّــه فـي لصبــاع

بـدت لوطـان فـي عينـي اوطـــان .. بــلاه اجــداب فــي عــز الربـــاع

يـــامـــولاي يــا عالــي الشــــان .. مفيتـــك راه مــا للنـــا افـــــــزاع

إلهمنـي الصبـر و عزومـاً امتــان .. راه القلــب ضايــق بالاضــــــلاع

و فــرّج كــرب عبـدك بالاحســان .. جــدب ليـــام هاييلـــه ارجـــــــاع


مشاركة الشاعر /عبد الرحمن عابد بو جازية - إجدابيا

كونه صار صار .. اضياع كبير في وضح النهار

وْفي لنظار ما من بصر دار.. شيـنك يوم يا يوم الوداع

صعيب صحيح يا فقد الكبار .. اترق العزم وتْخلَّف أوجاع

ويْجيب الشيب حتى للصغار .. وقليل الشيب فاللي ما ألتاع

وأيام العمر لو طالن أقصار .. يجيهن يوم ينتهين السَّاع

بعدهن فيه جنة وفيه نار .. وأن صار الضياع هَذاك الضياع

اللي للبعث ما دار إعتبار ......... بْسوم بخيـس نلقانا أنبـاع



- مشاركة الشاعر: صالح محمد دواس - إجدابيا

- كونه جم جـــم .. دمعي نين م الماقي خرمْ

واللِّي فات في فكري برمْ .. واللِّي شين هو يوم الوداع

هي عند أيش نشري فـ الندم .. إن كان الصبر قالوا ليِّ أنباع

والذلاَّل عمره ما زدمْ .. أن صار اوخاذ حقَّه بالذراع

والفرسان لا ملطم ارْسمْ .. يزيدوا بتع ويجودوا أسَّـاع

فيهن فرق حتى وهن لحم .. قلوب الضان وقلوب السّباع

- مشاركة الشاعر- بوبكررابح القرقعي- إجدابيا

- كونه راح راح .. وراء مجهول ساقنَّا ارياح

يْريد الصَّاح ما لايم الصاح .. وعلي ما فات موْ سافي اقناع

وكونه طاح فــ المحظور طاح .. وسِرَّه شاع بين الناس شاع


مشاركة الشاعر عبدالله القراب - مصراته

كونه كان غالى = وكونه العهد ما يرضى بدالي
كونه حلم بيحقق امالى=وكونه هدف ما يقبل ضياع
وكونه نعز في قدره العالي=وكونه العند ما يحل النزاع
كونه أحداث ماكانن في بالى=كونه الأمر يحتاج اقتناع
وكونه البحر في مدا العالي=وكونه الصح تغييرالشراع
وكونه الجد مهوش تسالى=كونه الحزم مايبى قناع
وكونه طاح من برج العلالى =استخسر في نظرات الوداع

كونه ما قسم=وكونه ضاع عيشنى فيهم
وكونه العقد من بعد التتظم=وكونه راح مابين الصباع
وكونه بكاس جرعني السم=وكونه لدغ من أشرس الفاع
وكونه قال وافقنا نعم =كونه بيه سلمنا انصياع
وكونه بعهد ما يوم التزم=كونه الحب ما يعنى إتباع
وكونه الحظ في لحظة برم=وكونه غرقت لامستا القاع
وكونه العزم ما يوم نهزم=إرادة صلب ليه خبرة وباع

كونه ما يعود=وكونه راح حازنا غرود
وكونه الغدر والأقسى الجحود=وكونه الشد من وجع الذراع
كونه الصبر را عنده حدود=وكونه الفرق في نوع الأوجاع
وكونه عشت أياما و سود=كونه لين قطعني قطاع
وكونه الخوف ديمه من الحسود=كونه الحسد من شين أطباع
وكونه الحب من يوم الوجود=كونه إحساس وجداني متاع
وكونه الصدق والقلب الودود= وكونه العفو من شيم الشجاع
وكونه العمرفى أيامه عدود= أنا سامحت واللي ضاع ضاع


:

و سلمتو

الهيلع
لواء
لواء

ذكر
عدد المشاركات : 1811
العمر : 41
قوة التقييم : 9
تاريخ التسجيل : 09/07/2009

الرجوع الى أعلى الصفحة اذهب الى الأسفل

رد: كونه ضاع ضاع.كامله.بجميع الردود من شعراء الفحول

مُساهمة من طرف c.ronaldo في 2010-05-16, 2:21 am

قصيــدة لا بعدها ولا قبلها.وجمياــه جــدآآآ.سمحــه يعنــى.بـــــــــــــــــــــــــارك الله فيك...

c.ronaldo
مستشار
مستشار

ذكر
عدد المشاركات : 16314
العمر : 31
رقم العضوية : 559
قوة التقييم : 94
تاريخ التسجيل : 26/09/2009

http://tamimi.own0.com/profile.forum?mode=editprofile

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى