دايرني خصيم..أتقول عليّ وصّاك القديم

الشاعر القدير والكبير والمُبدع

بوبكر بوحويّه

يقول :


دايرني خصيم..أتقول عليّ وصّاك القديم

يا الجديد دايرني خصيم !

**
راني أمعاك وافي..وأنت فيّ بالشينه أتكافي

أصفَى أمعاي خلْني أمعاك صافي..لانك ليّ لاني لك خصيم

سيل أبكاي كي سيل الفيافي..على الجّالات يعزق فـ الهشيم

مانك غير طرقي جاي لافي..نازل جاي في كبدي أتقيم

**
ماني من عدَاك..أنريد قديم فيّن وقت جاك ؟

نين عليّ ها المَليَه ملاَك..خصيمك بتت وأنا لك غريم

غير المُهم ديره فى أعباك..عليك أنصيم لو ننوي أنصيم

الزينه أحذاك مدّلها اخطاك..أنكان أتريد تعقد في شليم

واللي صار سوّيته أفداك..يابودور كي ريش الظليم

وفاء مو نقص نعتبره خطاك..مازال في جوجيّي رحيم

**
راني لك جريح..وأنت ليّ ياراقد الرّيح

جاحد راك فيّ تعطي الميح..لقطت أدروب عُوج ونا سقيم

عليش عليّ متشرّب الرّيح..أحنا فى صوب والاّ في جحيم ؟

طبّك فيّ كي طبّ المسيح..اللي فـ العيد ضحّوا بالزعيم

قبل الهدي دمّه مايصيح..دمّه ساح ساعات الجهيم

أعدام الوجه هاضاك الشريح..فى الاسلام ضربه فـ الصميم

فيّن شرع دمّه يستبيح؟..وفيّن عُرف صدّام العظيم ؟

قول الحق صوته يستصيح..ومن ها الدّول مايعقّب أقليم

درنا يوم يسّمّى صحيح..إيوالي وجه مولاي الكريم

حدّ عزاه درناله ضريح..وين عليه ماأنهال الرّديم

ولنّا طبل تسمعله نديح..وأحنا دوب ما انمّوا نميم

أنشمّوا فيه كي بنّة الشيح..أشياط البمب من طيبت الخيم

علينا تمّ يضرب فـ الكسيح..ويحدل كيف مايحدل الغيم

عداد الموت من خاطي الجريح..أكثر بلحيل م الحيّ السليم

أمغير الحق قوله مو مليح..وقول الزور هو القول الحكيم !

مايجيب لاشيّ تكثير الدحيح..مامن عين سين يريد جيم

مشيت بعيد ياخزرة الرّيم..بنردّ عليك مانبّي أنريح

مانحساب من عينك أنطيح..طيحت دمع من ماقي يتيم

العفو خوي ابن ادم
والله انت الي رائع وموش عادي ربي يعطيك الصحه والعافيه

تسلم انت والشاعر على هذا الكلام الطيب

مشكور يابواللافي على الاختيار الرائع والموفق
وسلمت ايديك وصحيت وصح لسان الشاعر بوبكر بوحويه

الله ايسلمك خوي فرج احميد
مشكور علي المتابعه

*************************
العفو خوي اسماعيل
تسلم ياغالي ومشكور علي المتابعه

مشكور يابو الافى كلام باهى بلحيل

والله انت الي باهي ومانك عادي
امنور يا بوفرقه علي المتابعه والاطلاع