بعد هذي ما ريت شي زول خايل .....

بعد هذي ما ريت شي زول خايل .. والخاطر ايحايل .. والعين مي راضيه بالبدايل
بعد هذي ما ريت مقعد ايطرب .. والخاطر ايجرب .. والعين في مشاريع صوبه تخرب
خطفها غلا زول منها مغرب .. اسماح المسايل .. لباسة الكابات فوق الخلايل
الشوعه اللي ديها بالتكرب .. غثيثها تمايل .. من حور الروايات جابت مثايل
وعينها كما عين فالت امدرب .. شاهين جايل .. سيوره زعابين فيهن جدايل
وزول طربز بالسماحه امسرب .. اللي في العمايل .. اتجيب من تواصيف ريم الهمايل
كشكاره نبت في النقاعي امعرب .. معاه يتخايل .. انحس حس بارود منه جفايل

بعد هذي ماريت شي بنت زينه .. والخاطر خزينه .. اضايق بتنويح قلبه وعينه
محراثه معا نوس صادف دفينه .. معاها تخايل .. ايحوسن ف العدالات بين الحبايل
والصوره اللي ماكنه في كنينه .. نقيشه دبايل .. يفوت جيل والعقل منها ايخايل
مطبوعه معا كل سمحه وشينه.. رسيمه جمايل .. نجام المشاهير قاري دلايل

بعد هذي ماريت شي بنت طوقه .. والخاطر خزوقه.. صياف الغلا وبين دقت عروقه
ولها دور علي الصدر لاماح روقه.. سفاته جدايل.. ركيب اوخذ من البرك في القوايل
توعر ابقي موش ساهل لحوقه..الا بالمحايل .. ولم التجاريد من كل ظايل
والشايب اللي جو ف الصبح بوقه.. سيد الشوايل .. حتي اعداه مافيه قالو زلايل
والزين زين ما ينصغن شي احقوقه .. والعمر زايل .. فرسان العرب هم اوجوه النكايل
واحمي نين ماعاد ينطاق سوقه.. علي قول قايل .. هلها فراسين ماهم ذلايل
وعهد الفتن راح عدا بلوقه .. واندفنن مسايل .. هدفنا الا نجمعو ف الشمايل
والشاعر اللي قال كلمه لقوقه .. فيها اذايل .. احنا خوت مابينا شي غلايل
خطرها غلا زول كامل بزوقه .. عيونه ذبايل .. ايزرن علي جمر نار الشعايل
ومضحك علي لون شب الدقوقه.. يديرن ثهايل .. اخدودها علي لون شمع الفتايل

بعد هذي ماريت شي زول غالي .. ومعاها خيالي .. حتي ف المنامات ديمه قبالي
حتي انكان ف الشعر ماني هلالي ..اسبل مالسبايل .. انقول في علل ينقلوه المقايل
غبا وين في نار سمح المجالي.. لموشه قصايل .. انداقه معا وطن دارت وحايل
مفحومه مطامير نار القبالي.. وصهد القوايل .. مع هبت الريح شاطن ولايل
عزيز مقعده قول ظني وبالي .. عليهم عتايل.. اللي ف التراكيب طاحو سطايل
مناجيه ما يرفعو راس والي .. خباث الخصايل .. لباسه اثياب البدع والرزايل
مثيل النساوين دارو مخالي .. خلقهم نسايل .. عليهم جميع الخزا والدفايل
قداها علي قنو ضمر عوالي .. نهار العكايل.. يخشو علي شايطات البلايل
علي كبوه النار والكور مالي.. يهدن صلايل..ايمشن ادموع النساء والزطايل
جناين علي جرف بردي مدالي .. شعرها سبايل .. وشفه دواء كيف ريق العسايل
وخدودها شلاليع مزن الليالي .. يديرن شلايل .. ابروقه مع زمهرير الهطايل
ربيعه كسا كل عامر او خالي .. نباتت بعايل .. كل هود في خوه لاخر ايشايل
مثيل الخدم فيه راضت متالي .. عرقها نصايل .. اتلاقي خذت في الوعاشي هايل
وانداوت حشف فوق تيغي قلالي .. انيابه صكايل .. يصرن كما .. مقط جرار عايل

مشكور على ما قدمت دائماً مميز اخى الكريم