تقاوى رخه
للشاعر عمران القزون العرفى
÷÷÷÷÷÷÷÷÷÷÷÷÷÷÷
تقاوى رخه… خطا من امعا جدي الغزال اتنخه .... اشبوب دمعتي منه

لط اقسامه ... حسد خاطرى ضحكه او منامـــــه

حتى وين ما صاحب اوناصح لامـــــه .... حديثه خذاه اقطاف ما ستمخه

شلال دمعتا من فقد سود ميامه .... لا جف لا بت قوتا اترخه

حتى وين طالن بالفراق ايامه .... م الماقي اتقول تضخ فيه مضخه
....
لط قسامك .... اولوعة خطاك او ولعتي بغرامك

وقعادهن خوالى موحشات او هامك .... اوياسك اللي بسموم جرحك بخه

العين دمعها خلن ان داها ضامك .... مــداوم نزيلـه م الهــــــدوب مسخها

واريافي محايبي دلال ايامك .... والموح صورتك في خاطري رسخها

اللي بريشتا تصعب علي رسامك ..... اوبالكمره والله ماينسخها

بلوانها يشوه بشرتك وميامك .... اوفيها الحياه تغيب ويبيخها
.....
سيل ليلة عيره .... تقاوى معا ضيق الحلوق هديره

اودار فالبواطن والصفاح مسيره .... لجبال وحشا رمّا علي شامخها

اوحط وين ماشق البلاد طفيره .... مساكن عربها في عيون صبخها
.....
امطاره زانت .... ومعا سيولها كل الحلوق تغانت

ياس من لها فيه التماني كانت .... دراها اوما صحيت العين لفخها

نين فيه طاحت والخديعه بانت .... خانها اولذة حلمها فوخها

اووين بغلاه اوب العهود اطمانت .... طعنها ابياسه والعهود فسخها

عليه قبل كانت عاصيه ما لانت .... لكن غلاك لدمعها رضخها
.....
الخاطر ضام .... واحداث دنيتا غير هذاك العام

وان كان بالوفاة ايتورخو لسلام .... ياسه احداث العمر به تورخها
.....
كحيل انظاره .... م البخت كي اكتب ياسه تقاوت ناره

اوعجاجها معا ريح الخريف دياره .... يرقى ابسقط اعطوفا ووسخها

غلاه وين ما عوده اثقل بثماره .... الياس اقرميتا دالها كيخها
……
الخاطر مغيب فرحه .... خطا بوجدايل سود طاحن طرحه

اووين ما عرف عيني معدم جرحه .... دواه دس وبكف الفراق لبخها
…….
اندام دمعها ذراف .... اسباب العمى عيني ايكون انخاف

اشبوب جور ورياحه العون اخفاف .... علي وطن مجدب تربتا نخنخها

اوهو قبل طارد هله لكن راف .... الله بالبهايم من جدب سخسخها

وارجع العام عمرن ما من كاف .... بغلاله اوناسه في هنا ربخها

او كي هالشّبوب الدمع جا غزراف .... امغير منفعه م الدمع ما توخه

ماشخص يغني لا يزيل جفاف .... اولا عمر مومن يوم وده لخه

اشبوب غير مرجوعه علي تلاف .... قشا الهدب سيله والجفون سلخها

والعين الخطا من بونياب رهاف …. ماكان في حسبانها دوخها

مصروف نقطه حبر في نشف .... حسد سيرتا النظاف به لطخها

للخاطر عدم يرث خطا لولاف .... ان ما من تحاسيفه الروح نفخها
……
الشبوب نزيله .... انجور دموعي من خطاه مثيله

امغير الشبوب ان طال ياخذ ليله .... اونا ع المواقي دمعتي شوّخها

او قطعة اقسام عزيز ميش كفيله …. بكونها تهز العين وادروخها

واللوم من قلال العرف ما تصغيله .... اولا العقل عاتبها اولا وبخها

وابيارها معا شابيب ياس عزيله ..... تعلت مويتا علي بربخها