منتديات عيت ارفاد التميمي
أهلاً وسهلاً بك عزيزي الزائر في منتديات عيت أرفاد التميمي .. تفضل بالدخول ان كنت عضواً وبالتسجيل ان لم يكن لديك حساب وذلك للحصول علي كامل المزايا ولمشاهدة المنتديات المخفية عن الزوار..
إعلانات المنتدي

الأخوة الزوار

سجل فوراً في منتديات عيت أرفاد التميمي لتنال احقية مشاهدة اخبار المنطقة ومتابعة كل صغيرة وكبيرة في التميمي - اخبار المنطقة محجوبة عن الزوار

الأعضاء الكرام

الكلمة الطيبة صدقة والاحترام المتبادل تاج علي رؤوسكم وتذكروا قول الله عز وجل !! ما يلفظ من قول الا لديه رقيب عتيد
المواضيع الأخيرة
» "بنغازي" ابرز ماجاء في المؤتمر الصحفي
اليوم في 6:02 pm من طرف عبدالحفيظ عوض ربيع

» داعش الإرهابي يعلن عن عملية نوعية
اليوم في 6:00 pm من طرف عبدالحفيظ عوض ربيع

» تم نقلهم الى المرج
اليوم في 5:55 pm من طرف عبدالحفيظ عوض ربيع

» ماتم الحصول عليه من ارهابى الشركسى
اليوم في 5:49 pm من طرف عبدالحفيظ عوض ربيع

» صنع الله ينفي وجدو مرتزقة أفارقة في الهلال النفطي
اليوم في 5:39 pm من طرف عبدالحفيظ عوض ربيع

» إجتمع رئيس الحكومة المؤقتة "عبدالله الثني"
اليوم في 5:33 pm من طرف عبدالحفيظ عوض ربيع

» 6 غارات جوية مكثفة على تمركزات ميليشيات الجضران
اليوم في 5:31 pm من طرف عبدالحفيظ عوض ربيع

» العافية بمدينة هون يستقبل عدد من الجرحي
اليوم في 5:26 pm من طرف عبدالحفيظ عوض ربيع

» تقدم القوات المسلحة العربية الليبية
اليوم في 5:24 pm من طرف عبدالحفيظ عوض ربيع

» شاهد قناه الكذب النبأ
اليوم في 5:22 pm من طرف عبدالحفيظ عوض ربيع

» إقاف عملية حجز المواعيد في منضومة حجز مواعيد استخراج جوازات السفر
اليوم في 11:02 am من طرف STAR

» التوزيعات النقدية لفروع المصارف التجارية بالمنطقة الشرقية للمصارف
اليوم في 10:12 am من طرف STAR

» هل تنوي زيارتها قريباً؟ إليك أفضل 10 مدن ملاهٍ في أميركا
اليوم في 9:47 am من طرف STAR

» الثني يعقد اجتماعًا لمناقشة الأحوال بمدينة درنة
اليوم في 9:32 am من طرف STAR

» بلدية طبرق تبحث علاج مشاكل تلوث المياه و الشواطىء بالمدينة
اليوم في 9:31 am من طرف STAR

بحـث
 
 

نتائج البحث
 


Rechercher بحث متقدم


مسجات شعبية روووعة.....

استعرض الموضوع السابق استعرض الموضوع التالي اذهب الى الأسفل

مسجات شعبية روووعة.....

مُساهمة من طرف زهرة اللوتس في 2011-02-17, 2:12 pm

هذي بعض المسجات جبتهالكم ان شاء الله تعجبكم
من خاطرى من جوه اعزاز وغوالى مش قول ودوة انحبكم من خا طرى من جوه
ما علينا رنوا اتقول في غياب رقمنا يتمنوا ....... إعزاز في خاطري ما علينا رنوا
بيهم يامولاي اجمعني......انا ندعي وأنت سامعني

اسكاتي خير من كثرة كلامي .. وكثر القول مايداوي جروح عندي جرح وسط الكبد دامي .. مايبراش نين تخرج الروح
انعاني فيه نحسب في ايامي .. يوم بيوم مانرضى انبوح لانداويه لانكوي بحامي ..
ايسطر غير مش قادر انبوح وطبعي دوم مانحكيش كامي ..
بين اهموم نداما انذوح ونامليت من كثرة ملامي ..
حسبت اللوم يعطيني وضوح سهرت معاه سيبتا منامي ..
امراره دوم في خشمي ايفوح نبي ننساه مافارق اوهامي .. رفيق البال مامنا ايروح

سلامي عليهم طيبين العشرة أصحاب الوفا نبصملهم بالعشرة
ماله بنة عندي العمر متكدر إحليلي منه . . . بلا شوفتك هالوقت ماله بنة
يا جميل اعفينا .. ان كان ع القهاير سادنا ما رينا .. موش ناقصينك
ميت فيك الله يرحمني ياظالمني حتى من نومي حارمني
مانك وافئ ولانك معايا في المودة صافي *** نعاني في بعدك لوعتي وأريافي
قزون تحت القاطر ، مكسور خاطره والدمع منه ماطر ، بعد غيبتك تميت
نلقاك قاصد وبالخطاء تجرحني *** تمثل عليا في الحنان الدافئ وتقول بطيب طيبته يمنحني
ما نحسابك تلعب وداير خونتي في حسابك *** انا لاسألتك ولا نبيه جوابك ولا تقول قلبك طيب وتمذحني

الدنيا تبي خبير,,والبحر يبي قوارب..و كل حلم لا تفسير,,والسيل عندة مسارب..اوقات تتعب اتحير ,,واوقات فرحان طارب..والصبر مفتاح خير,,والانسان حياتة تجارب..

صون الغلا يا قلب ما تنساها و إحفظ عهود أيام عشت معاها

كامل كامل غير أبعث مسج يا بخيل و جامل سيوره الرصيد يتم كامل كامل

قديم نسيته تعرف ليش !! الى ماتت معاد تعيش

شور عزاز قليبي صافى لين نموت وعهدى وافى

مكتوب يانفس ننهاك....ومكتوب تبقى عنيدة.....مكتوب يانفس غلاك....مع اللي اوصافه فريدة
مكتوب ياعين شقواك...من بعد كنتى سعيدة...ع الدمع ياعين ننهاك.........يكفيك عيشتي وحيدة

يلي غلاك زايد حده ... لو نزرعه انخاف الوطا ماتسده

لا تتغلوا راكم اعزاز علينا... في غيابكم تصغر الدنيا بينا

اطلب تمنى ياربيع العمر ادلل عليا وزاد تأمر أمر
لكن عليا مانهار اتغيب أغيابك عليا كيف لذع الجمر
يادليل الخاطر ياللي بلاك العقل ديما جاضر
لحظة بلاك القلب ماهو صابر عمري كتبتة معاك سطر بسطر

النوم والعزيز بعيد......ماهو حلال ياعين ترقدى

مانك عادي ..يلي يهدرز عليك العقل جاي وغادي....يلي سكنت القلب مانك عادي...

الخاطر معاك يروق ينسا اسمه يشوف الحياه حلوه وفيها البسمة

الخاطر عالنقال عيونه جن جنونه ايراجي في رنات حنونة

دقه دقه العين طالبة مني العزيز اتحقه لو يزمان تعود نجاك دقه دقه

عليه نمسي يلي خاطري يعزه معزة نفسي نبع الغلا و الدوق عليه نمسي

داير هزه بابه تخلخل نقصاته رزه قلبي عليك اليوم داير هزه

ياجارحنا نسيت الغلا نسوك حتى نحنا زايد علينا بيش ياجارحنا

فراق الغولي و الزمان الغابر مقدرتهن لاكن عليهن صابر

داير جوء ننسوك ياغالي بعيد السوء خلكم معانا دوم داير جوء....

فاقد حسه ليه زمان لاصبح عليا لا مسى الله يدكره باالخير فاقد حسه

قطره قطره لابس غلاكم توب وانتم عطر يفداك دم القلب قطره قطره..

لا عيب درنا ولا بخلنا بود امغير بخت ماينشد علينا حد ..........

الله لا يغيبهم اللي ينشدو من غير من عاتبهم غوالي علي الله لا يغيبهم...

النوم و الهناء الشوق مايتلقو وين الهناء كان العيون اشتاقوا...

ترفع رموش الشوق وطيها يسيل دمعها يخطر عزيز عليها

مش ناسيك الود ودي نوصلك ونجيك امرايف علي شوفتك والقلب ذايب فيك

كيف انطوله طلبت العزيز وشبكته مشغولها نريد نشدو عاالحال....

اغليت علي صحيح....خايف انقدم في غلاك انريح....لين ننتهي

ما نبيهن ........ متنازل على سباك عدى بيهن ....كبدي مع العيون ..... ما نبيهن

خذن عزيز مني غدر. لقسام لا رجن لا شاورن.

للناشد انقول ابريت. والنار في كنيني شايطه

ياقلب حظك فالغلا ومكتوبك.اللي توالفا يمشي بعكس دروبك

الناس راقدة ..وأنا قليل رقادي ..والروح تايها والعقل عندك غادي..

كوم اوحده. لادرت قبله ولا انريد ابعده. عزيز في الغلا ياهوه كوم اوحده

ياحنون الطاري....بلا شوق نشادات عليك انظاري....يابال رايفن

عندي عادي،،قلت هناي وعوزتي لرقادي،،مدام انتو بخير،،

ماعلينا رنوا . . .اتقول في غياب وجوهنا يتمنوا . . . اعزاز خاطري


كان بودي إنديرك صاحب***** تشيل معاي هم الزمان
لكن لقيتك ماتتصـــــــاحب **** ولا عندك للود مــــــكان
نحسابك صافي في النيه ****** صاحبي ونلوم عليــــــك
ماترضاش معاي السيئه ***** ومانرضاش العيبة فيك

قيسك ياعيني مسحوره ننهو فيك وتمشي شوره

وينك يامذهوب الشيره ايام كثيره انراجي في رنه وتسكيره

مافيهاش كيف انخاف انجيك نسمى ضعيف
مافيهاش دبارة انخاف انجيك ياكحيل انظارة
بين الناس تبقالي اعزارة ونا محسوب بين الناس ضيف
مافيهاش كيف

مانك اللي غلطانة حسك رقيق وشفرتك ليبيانا....ليش طالبة رنة مع تسكيرة
عادة قديمة ماتفيد بصيره....وخليك رزينة من بنات الخيرة...لايخيب طبعها ولاتجي ندمانة

مش بلعاني لكن الله غالب ظروف زماني خلتني عليك انغيب

من خاطرى من جوه اعزاز وغوالى مش قول ودوة انحبكم من خا طرى من جوه

ياقديم عليش اترقع ... درنا صووووب جديد امسقع

ياالقديم إلقينا غيرك .. كان تفارق كثر خيرك

ياالقديم أشقى بحوالك ... درنا صووووب جديد بدالك

مليت من سريب غلاك....بين البينين
بين نتركك بين الغرام نخاير
جفاك شين مستأصل وحبك جاير...بين الغرام نجامل
ونزعل نقول نشطّبه بالكامل....سريبا الغلا وانعدّ ماهو صاير
حايس
بين الغرام الصافي....وبين الجفا منك وماني جافي
بين الغرام انريده...وبين الجفا والصوب ومواعيده
بين الغرام وقدره....وبين صوب خلفّلي أمراض وكدره
منّه نفيض القلب داخل صدره...مو ماسكه وسط الكنين ستاير
بين الغرام وهمّه.....وبين الجفا والجرح نازف دمه
مليت من سريب غلاك بايخ تمّه....كل يوم والثاني اتوق بصاير
ماعد انجيك جديد ضايق سمه خذيت فرحتي كان الغرام قهاير

جاته ظله ترك سبحته وحتي صلاته خله الخاطر بعد لولاف جاته ظله

العين رايفت وياما عليكم رنت تردوا عليها ياعزاز تمنت.....

في القلب ساكن وفي العيون انشيلك مرايف عليك العقل مانحكليك...

سلام خواطر على عدد ذرات السحاب الماطر سلامي علي غالي علي خاطر

غيابي علي الاحباب ماهو بيدي يوم خلل في الشبكة ويوم تام رصيدى

الو.. الو... ايوه ..تسمع فيا يلي خديت العقل رده ليا بلاش لخبطه......

فيه خطوره يسب عطل للقلب صوت وصوره غيابك عليا يوم فيه خطوره..

داير جو ... ننساك يا غالي بعيد السو... خلك معانا دوم داير جو

عزة نفسي مانواطيها كيف الشيك انوقع فيها

غلاكم كيف الطير الحر ....امنين يفر ...إيخوف كل طيور البر

كنك غايب... لاتقول نشغلهم وراي حبايب... لا بعتت لاررنيت كنك غايب

موش اخسارة انذز السلام ونزيد في تكراره فيكم يا عزاز على القلب..

لمحه لمحه مشتاق يبو ملامح سمحه انريد شوفتك باالعين حتا لمحه .....

فيه مضره اتجيبه الجزيره وليبيا والحره خبر غيبتك عاجل فيه مضره

وحشك وبعدك زاد ضيق الخاطر بلا وعد مني دمعتي تتقاطر.......

ماني راقد مرايف علي شبحه وحسه فاقد يارقدين اليل ماني راقد.....

سؤال؟ كان غاب عن عيني عزيز انوده حبل الغلا نرخيه والا نشده الجواب\ حبل الوفاء بالحيل نمسك فيه وان غاب عن عيني عزيز ودوم يبقى صاحبي وفيه الشده

عندي عين ما ترقد اليل رفيقة دمع حرفتها بكا وعندي قلب مجروح و عليل نزيفه زاد وما فاده دواء وعندي روح رغبتها الرحيل بعد الولاف ماتريد الحياه......

امغير تبقى راضي نسيب الدواء و يبرن جميع امرضي الاجفاك مانحمله

يلي عليك خدينا و يلي غلاك شابه غلا والدينا الله يحفضك .....

داير عليك اكبيده ومازال ياغالي غلاك انريدهحتي بقسوتك مازال داير عليك اكبيده....

مره مره يدردر شراب العين ويطلع بره علي ناس فرقاهم عليا مره ..

فاقد غلاك وخاطري متضايق .. بعد غيبتك كيف يمسى الخاطر رايق .. دقيتهاتفك ما قصدي إزعاجك فاقد غلاك والقلب داعيلك وين ما أتخطى الخيرإيجيلك..
كان رخاني ليش انحير كي مادار عزيز اندير

عندي لها ميعاد وتاخد الليل ودمعها بداد العين فى البكاء عندي .. عندي لها تكسيدة من ساعة غروب الشمس للتمهيدة .. الناس راقدة ونا انقولنريدة .. وين قلت ننساه غلاه زاد

كيف البحر في غيضة موجة اتجي زرقا وموجة بيضا الايام يقلبن..

ودااااع او صار...ورحلة طويلة انتهت بامرار
حاولت نذكر معاه شن صار...بلكى امقصر وين كان احذاى
وحاولت نبحث ما لقيت اعذار....مظلوم يمكن وعندا الحق امعاى
وحاولت نحكيلا جميع اسرار...لكن الباين ما يريد غلاى

ساكت وماعندي كلام انقوله.....للي بعيد وماقدرت انطوله
ماعندي كلام انرده....إلا العين تبكي من حوايج عدة
بعدك وشوقي ليك زايد حده....منك انهاتي حالتي معلولة
وسط الوطا ماضن قلبي ايسده...بلا شوفتك زادن عليه احموله

عليهم رايفنا ياعين.... غوالي غابو قلنا وين..

يا قلب طيب منشرح ... ويود كل الناس
موش انت اللى تنجرح ... ولايجرحولك ياحبيبى احساس
ناللى عرفته طبعك ... صادق وفــــى
وكيف المناهل نبعك ... وصافى ونقـــــــــــى
ومافيك ناخذ كلمه ... يانور وسط الظلمه

كبيره قرعته في العقل....عزيز امغير موداري بيها

سلامين ياصاحب.... سلامي رده.........سلام شوق من صاحبوديد لوده.
سلام اندزه سلام شوق لصاحب عزيز انعزه...سلام خوت ما في يومريح اتهزه.....سلام ود للي كيف خوي انعده

خلاص افهمها....العين مالها خاطيك يالايمها....يصير الخطا لكن خلاص افهمها

شاقى بيكم وساعه بعد ساعه نرن عليكم
ماعمر عقلى ياعزيز انسيكم...وعندك الحق تقول غايب كنه
عندى العقل يا صاحب يريد يجيكم....لكن رصيدى والظروف لهنا

موحال في كتاب العقل تلقي سطور فيهن نسوتك

كل الدوا جربنا.......مليون شيشه ياعزيز شربنا...........نهار غيبتك

ارجوك ماله داعي ...هجرك حبيبي زاد كل اوجاعي....ارحمني شوية حتى شعوري راعي .....مانريد غيرك فالغلا يريحني

ما كل من يعشق ايطول وده...ولا كل من يأخد قليب ايرده
غلاك فى القلب فايت حده.....غلاى كابر له زمان ومده
غلاىكامل محال تلقى نده...غلاى صادق يصعب عليك تصده
غلاى دايم للعزيز فى بعده....غلاى وافى مازلت صاين عهده

الغلا مامات ...........تخطر ديما حتى بلا رنات .....غالي ومازال الغلا مامات

تريدك العين ربيع تزهي بيك علي طول عمرها. ياعلم


مش كل كلمه انقالت.....تجريلها نشاد
ولاكل حاجه صارت...تبني عليها ابعاد
مش كل شي ايصير...بعيد ياخذكـــ تفكير
مازلت انت الروح...وبلسم شفاء لجروح

مانهار طلقني.........امرايف عليك اوحق من خلقني ........خيالك وطيفك مانهار طلقني

مشتاقلك شوق الصغير لحضن فيه موده! ومشتاقلك شوق الكبير لعمر فات وعدى !؟
الله والنبي خلي المحبه زاد !
الله والنبي خلي الوفاء بيناتنا ميعاد !
وخلي رفقنا هو رفق لجواااااااااد

علي خاطري.. خطرت توه توه.. وكل مايجي مسج.. أنقول هذا هو.. يلي سكنت فالقلب... جوه.. جوه.‏

جربت كى نبعد نقول نهونك
لقيت الحياة ماهى حياةمن دونك
قلت نباعد بالك على هجرك الهجر يساعد
نلقا طيفك فى خيالى قاعد والعقل سارح فى مسارب كونك

ماهي سبيل لغيرك .يلي نقي كيف الحليب ضميرك. الروح غاليه ماهي سبيل لغيرك

عقلي فيه ثلاث وصايف.." غاوي وأمكبد وأمرايف.."

ماتسمعوا قول وسواس ولامن يجيب الرذيله
انتو قدركم فوق الراس في وسط عيني نشيله
انتو ناس مانكمش من الناس ولازيكم في قبيله
انتوسعركم خيرمن الماس انتو شي يصعب مثيله

وعندي قلب مايحمل بلاك....وعندي عين جافيها النوم
وعندي كبد ذوبها غلاك ...وعندي عقل ركبنا اهموم
وعندي صبر كملتا معاك....وعندي عزم جافاني اليوم
وعندي عمر عدا في رجاك...وعندي لهفه انشوفك كل يوم

ياللي جميل كلامك ...مايوم ينسي خاطري عنوانك
عليك ننشدو!
مازلت ننشد عنك....ومازال عندي قلب راضي منك
ومازلت نعزف في لحاين فنك...ومازلت نرتع في ربيع جناتك
حتي انكانه الوقت باعدعنك عليك ننشدوا.
ياللى اسماك اف بالى....ولايوم يسكن فى مكانك والي
انت حبيبى وعزوتى وامالى..وانت الدواء للروح وانت طبيبى
"ياللى اسماك *حبيبى*"

*- لا كل من داوى ايحيد العله .. ولا كل متعلم يرد سؤال .. ولا كل مسلم فى الجوامع صلى .. عليه ربنا غافر اذنوبه شال
ولا كل من ذاهب النجم ايدله .. ولا كل من يقنص يجيب غزال

في غيابك ماهناك غير الدمعه من السبت تدرف لنهار الجمعه
من السبت يبدا شوقي والاحد يبدن في الجفاف عروقي
والاتنين من تحتي النار وفوقي ويوم التلات ندوب كيف الشمعه
ويوم الاربعاء نزعل يضيق خلوقي وعند الخميس تموت كل عروقي
ويكبر اهبال العقل يوم الجمعه
عاود عليا برنه .......زعلان خاطري مابيت تنشد عنه.....انكان نشغلك عاود عليا برنه

ياسر سدت هي كبد درناها عليك اوفدت .. واجد بكت منك وفيك اجدت..نشفتها بالحيل راهي طابت.." بلي جابت...! هي كبد درناها عليك اوذابت

ماينشد علينا حد....لاعيب درنا لابخلنا بود. "امغير بخت"

لا تعتذر لاتقولي سامحني *** ما القيت في حبك اللي يريحني

الرفيق الباهي إللي طلته كيف الربيع الزاهي لا يجرحك لا يوم عنك لاهي

مانك وافئ ولانك معايا في المودة صافي *** نعاني في بعدك لوعتي وأريافي

نلاحظ ديمة تدير الخطاء وتلحق التبسيمة *** انا مشيت بنية معاك سقيمة ما القيت شئ يسر ويفرحني

مها عليك أنغيب وألايام تبعد بيا....قاعد أمعاك أقريب ما هنت يوم عليا....سريبي معاك سريب فات حدود الغيه....إن كان عندك عيب بعيبك أتعز عليا

اليوم حشومة .. امعلي مقامة وانا اللي رافع سومة .. عزيز باعني برخص التراب اليوم حشومة

عندك نوايا من زماااااان قديمة *** انا وين خباثة نيتك تذبحني

نهيت كل شئ بيدك قفلته بابك *** بعد شني جاي تقولي صالحني jaled

لا تعتذر ولا تقولي سامحني *** ما القيت في حبك اللي يريحني

تعلمت كيف انصونك...وكيف نحفظا الغلاء
وان خنت الغلاء نا نخونك....للاسف هذي لا
حتى ان كان اقسيت....وبعت الغلاء وجفيت
نستاهل انا اللي اخطيت....انسيت انتعلم نقسه
تعلمت كيف أنحبكـــــ

يارازينا يالي بنارك فالغلاء كاوينا"
ويلي اطمعنا فيك بيش أتجينا"
تمسح دموع العين وتفرحنا"
أنكان عالبكاء واجد عليك بكينا"
اخطينا الدوج اوفالخلا نوحنا"
ياجارحنا انسيت الغلاء ننسوك حتي نحنا.زايدعلينا بيش؟

القيت البكاء ممتازحاجه روعه ..أيهون عاللى خاطره مكسور
وأستاذ فى البكا وأبكاى نادر نوعه .. وأمحصل شهايد فى البكا مشهور
وأندرس على طلاب فى موضوعه ..وأنديرمعهد عالى للبكا مشهور .
والطالب إيجى جايب أمعاه أذموعه ..شروط القبول الحزن عنده دور أهناك فرق بين أبكاه فى المربوعه
وأبكاه فى الخلا وأبكاه للجمهور . ناصب نوعه

ياعمر ضاع بلاش ويانهر موتنا احذاه اعطاش
ياعمر ضاع حسايف وياحلم عايشبه القيته زايف
وياقلب كملهن ايامه خايف وياجرح وسط الكبد مايبراش
ويازرع في وان الربيع وصايف وياجبح في وسطه القيت احناش .

تعلمت كيف أنحبك ... وكيف نفهمك بالهمسه

بس للاسف يا اخساره ... انسيت نتعلم ننسه

تعلمت لك نشتاق .... وكيف نحضنك باشواق

تنسي لا تهون
حتى أن غبت أنت في خاطري مصيون
القلب دايب فيك والروح هامت بيك
والدموع دوم عليك يدرف عما لعيون يا حب رد للكون

طـولـت فالجـيـة اشتقنـالـك زعم نخطروا ديمـا علـي بالـك
وانــت بـعـيـد افـكـارنـا كـــل يـــوم تـرحـلـلـك
وانــت بـعـيـد ازهـارنــا تـنـشـد عـلــي ظــلــك
مالـبـعـد مـــا مـلـيــتو لـلّــه عـلـيـه خـذيــت
صــابـــر هـنـيــالــك اشــتــقـــنـــالـــك

ماعاد تعني شيء ... كيف غيبتك عني وكيف تجي ...
غلاك إنتهى,, نهيته غلاك كيف زعلتك مني وكيف رضاك ...
كيف ضحكتك عندي وكيف بكاك ... تكرر أسلوبك ما يأثر في !!!
عاديت واجد ناس في سباك .. لقيت مكسبي منك خيانة لي !!
الله يسامحك في كل يوم معاك .. الماضي طويته من حياتي طي
يلهمني الله الصبر دوم بلاك .. ويبقى وجودك كيف ميت حي

غلاك مش زى كل الناس...يسوى غلاء البيضاء وكثرة شجرها
غلاك في سرت مالقيتله قياس...اكبر من سبها وأطيب من ثمرها
ولالقيتلك بطرابلس لاحس ولاإحساس
ياسيدى فديتك بغلا ليبيا وعربها

ويش السبب ماقابلاتك عيني
مشغول والله بالزعل ناسيني ،، وين ادرياك
اغيابك شغلني مالقيت اخبارك ،، من قبل ديما كاثرات اعذارك ،،، ونجاملك ونقول بكرا اتجيني ،،،
غير اسمعني ،، مجروح منك خاطري واجعني ....

يا من إيهمك الامر...غيابك عليا كيف لدع الجمر
يامن إيهمك أمري...بين الرجا ولياس عدا عمري
إيزيد إزياده
م الشوق والع جمري باين عليا مانفعش طمر
يااللي بحنين انراجو نهار وليل نا والعين
يااللي تهتم أغيابك عليا شين هم وغم
أمرايف عليك أرياف لو تعلم نين م البكا العيون تمن حمر

ايش جابرك ياقلب رد عليا ... ايش جابرك عالموجعه والسيه
ياقلب بلاش محنا بعد ما ينكرك مازال تبي منا
وين ينشدوك تقول كنت نحبه هو باعني والعيب ما هو فيا
ياقلب انسى غرامه وانسى صوته ومشيته وكلامه وخلي حياتك ماشيه عاديه

قتلك بعد خطرها ...رد بالك منها
وياريت ما تقهرها .. ويطول بعدك عنها
روحي اللي تهواك .. متمنيا ملقاك
ولما تكون امعاك ساعات ما يسدنها

محبتك محبة عمر مش يوم او يومين...يبقى مكانك قصر بين الرمش والعين

ماني عديم الضمير ندير صاحب ونفوته في الاخير ....... علي ما تنكتب

لو كان تعرف قدرك ........... تحظن رسايلي ياعزيز بصدرك .........وتعودلي مجنون

مابا يبرا.....جبناله طبيب وشيخ تما يقرا ................مسحور بغلاك العقل مابا يبرا

مانحكيها ..! امفيت للعزيز اللي دنيتي ضاويها ....قولت امرايف عيك مانحكيها

اصعب شعور اتحسه...............اتغالي حبيب وفي الكنين ادسه .........وهو فايتك

عليكم عيني ماتت موت .....ارياف وتنهيد بلا صوت
الله الله ما تنسوني .. راكم ونس للروح ما تخلوني .. انتم زها خاطري ونور عيوني

غادي غادي ... يا اللي معاك الوقت ما هو عادي ... قاعد حداك العقل غادي غادي

علي نياتي نحساب الغلا ساهل أقطع راياتي تاريتني طيب علي نياتي

كان عزيز هجرني وعدى...لا ما نرده.... سيورة راجع يتجدا

يلى علينا ايمنوا يوم يمكروا فينا ويوم ايحنوا اصحاب الغلا

شاقي بيكم .. مواطي جميع الناس و معليكم .. انتم عزاز القلب روحي فيكم

مانك ليها...مكانك رفيع لفوق مايساويها ....الارض اللي يمشوا عليها الناس مانك ليها

الزين اللي جاني مرساله....سلم حاله....ان شاء الله ديما زاهي باله

غلاكم متمكن في احشانا ...شاد مكانه ...من غير جمايل ليبيانا

ماكيف ودك ود...ولايزحمك وسط الخواطر حد...ياقلب نابض للوفاء ممتد

ماينقص غلاكم لو بالصوت ماسمعناكم....ويكفى العقل معاكم لوبالعين ماشفناكم

ياصاحبي ألايام وين تميل يامصعبها لا نود صاحب لاعدوا إيجربها تبي قديم مجرب فارس علي اللوعار أمدرب أن شرقت شد الرحيل وغرب وأن غابت شرق علي مغربها

كل المراكب في البحر عوامه مغير مركبي يا ناس في دوامه

عليك خدينا ... عالطله و عا لمسج وعلي التشرينه يقعد بلاك العقل قعده شينه

دونك دونك محتاج الغلاك وضحكتك وعيونك الخاطر مرض بالحيل والله دونك...

ياصاحبي ماشفت مثلك في الناس فيك الوفاء وفي هالزمان قل الوفاء انت الي في ظلام الليل نبراس وانت اللي بين الدهب خاتم الماس غالي الثمن عندي ولاحد يوازيه

مره مره عندي عقل متكدر و كاتم سره ارجوك يا حنون ترسل مره مره

النشدة الواجب و العين ما تحمل فراق الحاجب واللي ينساك يصبح قليل الواجب

من يقدرها لزت طيور غلاك يا موعرها بعد سكنتك في القلب من يقدرها

عزيز و شايلك في القلب محبة .. لو ع الفعل نمشي معاك لصين دبة دبة..

وينك وينك قاطع حبال الود عيني عينك ما انريد منك شى

رقيق بشوقه وين ما نسيم غلاك يهل ايسوقه ... عندي قلب ياوحلتي فيه رقيق بشوقه

جهلت اسبابه ...لا اللي عرفته لا خيالي جابه....سر الغلا فيكم جهلت اسبابه

رافقت واجد من رفقاني .. مالقيت واحد رفقته حقاني .. رافق اللي ايصونك وين يبرمن الايام يفزع دونك .. ما ترافق اللي يغدرك ويخونك في الوجه يعجبك وفي القفى تعاني ..


نحساب روحي في الكنين سكنت....ونحساب روحي للحبيب وصلت
يقسى حبيبي ..! ياناس ماتصورت .......تمنيت روحي في الحياة ماصرت ..........راهنت قلبي وفي الرهان خسرت...!

غير ايجينى .. مازال فى قلبى ان هو ناسينى ...
نلقاله عزيز العذر .. غير نشوفه ...
لا نريد عذر و لا نريد حلوفه ...
اللى فى غيابه كبدتى ملهوفه ...
القاسى اللى ما حن كيف حنينى ...
من غير عذر امقدرين ظروفه ...
عندى عزيز و جيته ترضينى ...

عندي قلب مانملك انرده عايش حر في صدري عنيد يوم النبض عالي فات حده
وينزل يوم والثاني ايزيد شايل حن واحساس وموده¤وشايل هم كي ثقل الحديد رزين اوقات
ماتلقاش نده وايخف اوقات لولافه ايريد.. .

الصاحب اللي ماتلقاه وقت الشدة قوله شحالك من بعيد اتسده .. الصحاب في وقت الوسع مامنهم في وقت الضيق ماتلقاش واحد منهم
غني قلب ماني غني مال .. مبسوط غير شاقي قاعدلها تحت الاظلال حاسب حساب الفراق .

مازال ليك معزة...وموال صوبك ماقدرت انحزه
وعمر البدن عالروح ماتجزأ...
ويلى فى قلبى واخدين مساحة...اجعنه غلاكم فيه مانترزا

طـولـت فالجـيـة اشتقنـالـك زعم نخطروا ديمـا علـي بالـك
وانــت بـعـيـد افـكـارنـا كـــل يـــوم تـرحـلـلـك
وانــت بـعـيـد ازهـارنــا تـنـشـد عـلــي ظــلــك
مالـبـعـد مـــا مـلـيــتو لـلّــه عـلـيـه خـذيــت
صــابـــر هـنـيــالــك اشــتــقـــنـــالـــك

ماهو غريب عليك....تهون قلب كامي لوعتك دافنها
وماهو غريب عليك....تنسى عيون اريافها جننها
تروم غيرنا معشوق...وتصيف ربيع الشوق
هذي تديرها وتدير اكبر منها

ما عاد تسوى باره ....ولاعاد تستاهل غلا وكباره!!!
واللي نقص معروف تبرد ناره....
وحتى الدلال يجيك يوم تمله والدهر ما تنفع معاه شطاره....وكيف ما عقدت الحبل راك تحله!!!

مازلت ياغالي أنقولك غالي وديما مكانك مايطوله والي .ومازلت في تذكارك ومازلت عاشق في سماع
أخبارك ومزال طيفك علي المنام أيشارك ومزال قدرك فوق عندي عالي ومزلت في مرجاك ومازلت صاين ياعزيز غلاك.

نكويك ياقلب بالنار لو تطريهم
اعزاز الغلا ماعاد ينفع فيهم
وما تجبرهم
اللى يبدلك فى الصوب ما تنظرهم
اعزاز الغلاء كنا على خاطرهم
نسلك دروب الشوك ونلاقيهم
تمو علينا فى القسا موعرهم
باعو غلاي بالبخيس ارميهم

-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~-~
لحظة الوداع من أصعب اللحظات على البشر .. ولكن ما باليد حيله
وداعا ... لك ايها المنتدى الغالي..وداعا ... لكم يا أعضاء منتديات عيت ارفاد التميمي
وداعا ... لكل من اسعدته ..وداعا ... لكل من احزنته..وداعا ... لكل من أحبني
وداعا ... لكل من كرهني ..وداعا ... لكل من كنت ضيفا خفيفا عليه ..
وداعا ... لكل من كنت ضيفا ثقيلا عليه ..وداعا ... وكلي ألم لفراقكم
لأنكم أفضل من إستقبلني ..وداعا ... وكلي حزن لأنكم خير من شرفني
وداعا ... واجعلوا ايامي التي لم تعجبكم في طي النسيان ..فقط تذكروني بينكم!!
وداعا ... واستودعكــــــــــم الله الذي لا تضيع ودائـــــــــــــعه
اتمني لكم اوقات سعيد
واتمني التقدم لهذا المنتدى الرائع


زهرة اللوتس
إداري
إداري

انثى
عدد المشاركات : 124527
العمر : 35
رقم العضوية : 2346
قوة التقييم : 157
تاريخ التسجيل : 30/06/2010

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى