الخاتمة تبديلت نشيد ورآيا..

من طرف **زهرة اللوتس** 2011-12-18, 8:49 pm

شعر :عبد الحميد السنوسي عبد السيد /قصيدة تصف حال البلاد :
ستين ألف راحوا عالبلاد ضحايا
والخاتمة تبديلت نشيد ورآيا
***********
... ... ماأهناك جديد
أمفيت العلم تبّدل أمع النشيد
وبّدلنا عقيـد بأربعيـن عقيـد
وراء كل واحد جاهزات سرايا
وأزلام للطاغي أبثوب جديد
على شعبنا ردوا قديم وصايا
***********
ماأهناك أخبار
ولا من بشاير لافته لأنظار
ما عاد تعرف منهم الثـوار
ومنه اللى مندس دار خلايـا
ومنه اللى حريص عالموكـار
ومنه اللى للثورة إريـد نهايـا
ومنه المخلص صح والسمسار
ومنه أمعانا وفى القفا سلاّيا
************
ما أهناك حكاوي
وما أهناك واحد عالخزانه ماوى
اللا كلها تاكل وما حد يـاوي
ولا عقبوا يابس ولا خضرايـه
مجلس وزاري في القيادة ’’هاوي’’
تحلف عليهـم يـا ولد غـزّايـا
يا عاصمتنا يا أم القرون ملاوي
ليش دمعتك عالخـد يا بكـايـا
عندك ضنا عندك تريس بـلاوي
دونك إطيحوا والصدور عـرايا
*************
ما اهناك شنهو اتقول
وإللي ايسير لاهو عدل ولا مقبول
والوطن يشكى غيبه المسئول
ولا جيش ولا شرطه ولا طرّايا
وسلاح فيد الناس موش أصول
ومجلس تردى ما عليه أعبايـا
والثورة أقريب أتطق الحـول
والشعب مفلس واليديـن خَلايا
والفقر والعازه أبعرض وطول
وأحلامنا فاضت اليوم كبايا
*********
باديا أمواير شّر
ووجوه العرب متكدرة ما أتسر
شرابهم تعكر فى الشراب غثر
كل الوعود عدّت امغير دعايا
الشعب يحسب يدفنه هالشر
واعيشوا أبامانه والبطون ملايـا
لاوين مجلسنا أمدّربا ’’أمعمر’’
تجويع شعبه هو الهدف والغايا
صبرنا صبرنا صبر علقم مرّ
وربطنا أحزام الجوع يا مولاي
الراتب تبخر والحساب حمر
وهم فى الفنادق عايشين هنايا
ملايين عدت يا (الكيب)أجعر
بالشعب راهو ماأهناك أعنايا
************
أنريدوا جيش
وأنريد شرطه وأنريد بيش أنعيش
وبعد بهدله نبوا أنبت ريش
وكيف غيرنا ننعم أبكل مزايا
أنريد حاجتى بالعدل مانرشيش
أسلوب الطحالب راه سّد كفايا
من الخارج وزاره يا ’أجليل’ ليش
عرب ليبيا فى الداخل عرب تهّايـا
بوأثنين جنسيه وعقاب إطيش
إفضي الوزارة ونقعدوا فى حكايا
شعر :عبد الحميد السنوسي عبد السيد