اوقات الخبير

من طرف **العاشق الصغير** 2011-12-06, 3:58 am

قصيدة أوقات الخبير

اوقات الخبير ايقودنى ب لطافه
ووقات نذهبوا عالدرب نا وياه
وتحول بينا وبين الكلام مسافه
ويبات كلحد يرمي علي مرماه
ويضيعن بنات الفكر بين املافه
واخطاه الشرود اتعثر فى ممشاه
ويبقن اسيوله يقلبن جرافه
ويجود وينما تبرق ابروق سماه
وينصب مخاطيف الغلا بضرافه
ويردن عليه ابهم ومعاناه
ويحوس خاطرى يجنى عليه اريافه
ابضيق ونقيق ودمع ومهاياه
وانصار دي ما يدوي الا بحسافه
معا لوعته قاطع عزيز الواه
الا عالغلا ياسه طبق مندافه
عناه مر من ضيمه وطول رجاه
مديول من صنا ناره وفقد اولافه
ودار خالية زادت كداه وداه
وواقات وين ما يطرب ايلم اطرافه
للصيد ياللي تنشد على مطراه
بكروزر على وجه الوطا طوافه
رفقتها اتجلى ضيقته وعناه
واتشق تربته بر الخلا وجوافه
ما تهاب وديانه وروس اعلاه
واتقض الهويد وع العلا شرافه
ويبان وطن نوار الربيع كساه
منبوت ارض حره طيبه هيّافه
تبريك نسمته كيف الدوا تلقاه
مدهوك من بدارى مزنته غزرافه
قوى اشتاه مداير تعنقد ماه
وتنظر اللي هامل جميل اوصافه
" جلايب " وجن دونه افراق قطاه
وفرق الحبارى دوب ما يتهافى
بين فرق قدامه وفرق احذاه
وتقابل بنات القود والعنسافه
جناح دايره بارم بعيد مداه
وفيها جمل يرزم اكبار خفافه
وين عالوطا يوطى اترج امعاه
وطيرى نداوى داميات امشافه
طايب نظر صيده فلت ورباه
واللي امعاى للفجوج الخلا عّرافه
عناهم طويل اصحاب قدر وجاه
سقيم قولهم ماهم اللي بقرافه
تريس ينفعوا عز الرفق والله
كلام خطره شايب حكيت اصدافه
نشدنى ونا جاوبت عن معناه
****