تريدي دليل يوريك المعاناة .. وكيف الشقا

من طرف اسماعيل ادريس 2011-12-10, 5:51 pm

تريدي دليل يوريك المعاناة .. وكيف الشقا ..
وطول الرجا ..
خوذي الدليل أكبر دليل أنا
كم جرح عاند جرح .. في خاطري المجروح ..
وكم يأس بّكا فرح .. وكم ظلم هزّ الروح ..
حتى الرفيق اللي عليه عبيت .. غاب ورحل سيبنيّ
ونا كنت نحسابه إن كان شكيت ... وآن التعب يسندني ّ
...
ولو عندك الوقت الكافي .. نا نرد نحكي قصة
قصة أغياب أولافي .. مش كيف أيً قصة
قصة مضت من كام عام .. قصة غرام .. بدأ بالسلام وبعدين اللقاء
حكاية غلا يا دوبــه بدا ... مدام غير أيام
حكاية اللي غاليته .. ومن خاطري وديته
وما بين عيني ورمشها داريته ..
على عيون كل الناس... على قهر ظلم اليأس
على القسم والنصيب .. وع الهجر والتعذيب
على كل كلمة تجرحه ...
المهم ،،، لا ما يغيب
......
وفجأة إتضايق علمي ّ .. وفجأة تلاشى حلميّ
وغايب عـلــيّا لقيته ..
وين غاب في غيابه عليّ مليت .. وين غاب من شوقيّ عليه بكيت
ناديت يا غالي عليّ ...راجيت نحسابه يجيّ
نا قلت في طبعه وفي ّ .. ولا ما نهون عليه
حنيت ..بالشوق الخفيّ
وسهيت والخاطر سهيّ
مديت وبلهفة يديّ .. لقيت السراب أيديه
ومن وقتها ما جاني .. لا طل لا عاود سأل
في غيبته خلانيّ .. نراجي ونا عندي أمل
حاولت ننسى ونقسى .. ونعده سحابة عابرة
دورت وين المرسى .. اللي فيه الخواطر صابرة
جربت نعشق غيرة ... ونترك دروب الحيرة
نسايس مناهل قاطري ...ونهديّ هواجس خاطري
ونحد من تفكيره .... !!
نلقى الخطاوي اتقودنيّ .. شور المكان اللي زمان يضمنا
رغماً علي اتقودني .. في هذاك الحنان اللي بحضنه ضمنا
نلقى بقايا شمعة .. ياما ضوت ما بينا
وع الخد تنزل دمعة .. كانت دليل حنينا
في هالمكان حكينا .. وفي هالمكان شكينا
وفي هالمكان انضمت ع الوعود ايدينا
نعاود وشايل جرحي .. ويا دوب تمشي خطوتي
وغابن منايل فرحي .. من حسرتي في عبرتي
وعايش على هالحال .. ليا اسنين أطوال
ومازلت نرجا فيه .. نحلم انني نلاقيه
وعارف الملقى بيه .. مش صعب .. من المحال
وهذا الدليل اللي عليه حكيت
اللي غاب لا يعرف اني راجيت .. ولا جـا .. ولا يجيبه رجا
كيف الشقا .. ولا تقولي العنا .. خوذي الدليل
أكبر دليل أنــا ..