نظرتي للجيش اليبيي قبل وبعد الثورة..مهم...

نظرتي للجيش الليبي قبل وبعد الثورة.... طول عمري نسنهزئ بالجيش الليبي ونحس أنهم هما نفسهم موش راضيين علي أنفسهم . ويوجعوني لما يصحو من الصبح بدري ويقولو ماشيين للمعسكر ...ماحد يزعل مني لأنا من ضمنهم زوجي كنت نضحك لما يقول ماشي للقاعدة ولما نسمع طيارة سقطت وماتو الطيارين ألي فيها أثناء التدريب ولا عرض عسكري نتألم و نقول خسارة راحو في الفاضي ........المهم كل يوم نقولا وين ماشي يقول ماشي للقاعدة منين جاي جاي من القاعدةوأنا بيني وبين نفسي نقول توا تحررو فلسطين...وهوا نفسه حتى رتبته مايحب يلبسها...وأجمل شى لما درنا موبايلات درت خلفيت موبايلي صورة أسامة بن لادن واول أسم في دليل الهاتف القاعدة....ولا لوحد شاف موبايلي راهو دارولي تهمة سياسية....صورة بن لادن وقاعدة......................المهم بدت الثورة المباركة وبدا الجد الراجل معاش قعد في الحوش من الصبح لليل في العمل ..وأحسن شي الثوار بدو يقولو عالجيش جيش معمر ويكرهوهم... أول مرة صرت ننظر لزوجي علي أنا راجل عسكري فعلا وخفت عليه وكل يوم نقولا وأنت طالع ألبس لباس مدني فوق اللباس العسكري طبعا في بداية الثورة خوفا عليه من الثوار لأنهم يحسابوهم مازالو مع معمر وبعدين من الطابور الخامس . المهم بدا الجد .... كانت عندي قريبتي في بنينا مرة كلمتني تسأل علي زوجي وين قاعد وهيا ماتتصلش بيا واجد أستغربت وقلت لها شنو فيه قالت لا مافيه شي بس نطمن عليكم وسكرت أنا أنشغلت وبديت نتصل بزوجي وكان عندي أحساس القاعدة والمطار أنضربن وفعلا هذا الي صارولقيت تلفون زوجي خارج التغطية وبدا القلق..المهم سمعت أنهم ضربو المهابط وستر الله وزوجي اتصل وطمني ولله الحمد عليه وعل القاعدة والمطار ...وبدت معركة البريقة وبدن طياراتنا يضربن في أرتال القذافي جنوب البريقة وأجدابيا وفي الصحراء..طبعا قبل تدخل النيتو ووصول رتل بنغازي....وأنا كل يوم نتصل بقريبتي ونقول للها من الخوف أطويراتنا طلعن ولا لا طبعا نخاف نتصل بزوجي خوفا من يكون التلفون مراقب وفعلا كان تلفونا مراقب وقبل دخول الرتل بساعات كلموه كم شخص وهددوه...المهم مرة تقول طلعن ومرة تقول لا لما تقول طلعن نقول لها لما يرجعن طمنيني...علي فكرة زوجي موش طيار بس كنت نطمن علي طيارينا وطياراتنا زي اي مواطن يحب بلاده ويخاف عليها...ويوم دخول الرتل شفت في الجزيرة الطيارة ألي أنضربت ومن غبايا نحسابها من طيارات معمر فرحت وحسيت بالشماته....وكانت صدمتي كبيرة لما عرفتها لقاعدة بنينا...وتوالت الأخبار وسمعنا علي الطيارين الي أستشهدو وكانو أصدقاء زوجي وتأثرنا وبكينا واجد بس هالمرة ماقلتش راحو في الفاضي زي ماقلت علي حكيت عليهم في البداية.....لأنهم أولا شهداء وثانيا لولاهم الرتل دمر بنغازي لأنهم ضربوه قبل دخول الناتو بأكثر من 7 ساعات وثوارنا كملو المهمة ...ولله الحمد المهم هذاك اليوم حسيت بقيمة طيارينا وجيشنا الي كان القذافي مهمشه ومختزله في كتايب بأسماء أبناءه......عموما أنا لست منحازة لقاعدة بنينا لأنا زوجي أحد ضباطها بس هذا الجانب أللي نعرف أخباره أكثروتأثرت بيه أكثر شي ...ومشاء الله علي ثوارنا قبل جيشنا لانهم لولاهم ماصار أللي صار وما أنتهى هالطاغوت ودمتم ودامت ليبيا حرة موحدة....

كيف موضوعي ماعجب حد

شكرآ أخي ستار ....

مشـــــــــــــــــــــــكوره اختي فدا ليبيا..موضوعك رائع
ويستـــــــــــــــــحق الاطــــــــــــــــــــــلاع
اختي..المنطقه الشرقيه كانت مهضومه وزي ماقلتي انتي اعضاء الجيش
او القوات المسلحه على حد قولهم من قبل ايام الطاغيه .......
شن انقول لك...غير ايسدوا في فراغ وخلاص ماشي جاي ع الشغل
ومافي مصلحه ولاعندهم دور..........
ولكن لما قامت الثوره المباركه...ظهر معدنهم الاصيل وتنادوا لنصرة
شبابهم................................
فمثلآ بجوارنا معسكرين ...الاول قاعده جويه ...والآخر معسكر في
الاصل دبابات...مليئين بالجنود والضباط وقاعدين وخلاص..
لكن وزي ماقلت لك..لما قامت الثوره فيهم من التحق بقاعدة بنينا
والمشاه والدبابات التحقوا بالجبهه وهم من درب الثوار على الرمايه
بالدبابت وكيفية قيادتها...................
واستشهد الكثير منهم.......
اما الآن فأن تصوري للجيش والذي ينادي اعضاء الجيش لتكوينه
سيكون لخدمة ليبيا وليس لخدمة شخص بذاته.............
اللهم ارحم من استشهد منهم..وكذلك شهداء ليبيا كلهم
ووفق قيادات جيشنا المظفر في بناء اركانه والمساعده في بناء الدوله
مشكــــــــــــــــــــــــوره اختي طرح اكثر من رائع

بارك الله فيك أخي أسماعيل...والمعدن الأصيل يظهر عندأنصهاره بالنار....ولماقال القذافي ساجعل ليبيا نار حمرة....بانت المعادن الأصيلة ...ورد كيده في نحره..

بارك الله فيك اخي ستار....شكرا علي مرورك......

الموضوع رائع واضيف ان ليبيا رجعت لليبيين بعد الاستعمار المتخلف

اختي فدا ليبيا حياك الله
اعجبني الموضوع كثيرا و احب ان اظيف علية
ان الجيش اليبي كان مهمش و لو يسعفنا الوقت لتحدثنا عن االسلاح الجوي الدي دمرة معمر القدافي هناك اخوة لنا في شرق البلاد اتو بطائراهم الى قاعدة بنينا و قاموا بمجهود كبير جدا من قاعدة طبرق
قاعدة بنينا الجوية قامت بالكثير لو تسالي زوجك عن اعداد الاسلحة التي بعثت
لجميع الجبهات حتى الجنوب لقد كان دورهم كبير جدا من تامين المطار بمساعدة المتطوعين من الثوار الدين كان لهم دور بارز في حماية المهابط
لقد قاموا لما حانت الساعة ولم يتاخرو

بارك الله فيك أخي جمال المروج والله أنا حكيت الواقع وأختصرت واجد في حكايتي بيش مانكرهكمش في الموضوع...وأنا نبي نرد عليكم بالواحد بيش نعطي كل واحد حقه والنت عندي بطيئ...والله فيه قصيدة يقول فيها واحد وهيا زي النكتة والله لما يسمعها زوجي يموت من الضحك ويقول والله الشاعر يحكي في الواقع.....ممكن تكون مارة عليك... اتقول نمل نمشو طوابيرههههههههههههه.

[b]مشكوراخي عبدالحفيظ....

مشكور اخي ابراهيم وكل اخبار السلاح الجوي عايشتهن ...والمنطقة الشرقية لها دور كبير..ومنهم اصدقاء كثر لزوجي وعلي راسهم الاخ رافع الفراوي الي ماحد عطاه حقه وهوا من خيرت الطيارين...والحمد لله الي ربي حققلنا النصر والتعب ماضاعش في الفاضي بعزيمة جيشنا وثوارنا......

السلام عليكم ....يعني رقيتوني ملازم ثاني معناها هيا ..هيا عاملتوني كيف الجيش ايام القذافي...ههههههههههههههههههه

وينك يالافي ماترد علي موضوعي ديما صور طيارات ماطيارات شورك هالموضوع ....عيت حنا ماعيت حنا خطاهن...ههههههههههههه

شكرا أختي اموووول علي مرورك العطر.....

شوفي اختي فدا ليبيا الجيش الليبي من قبل كانو مظلومين بكل معني الكلمه مرة مرة يذكروهم بسيارة ويجملو عليهم بيها ونظرت العسكري انه حاس روحه انه كان يحمي في معمر موش يحمي الوطن
في الاحداث بانت عندهم الوطنيه وحسو انهم توا جا دورهم وكلهم هبو للثورة في منهم الي وقف محايد خوف من الوضوع او شي ثاني بس اكثر من 99% من شباب الجيش انظمو وانا شخصيا يوم الكتيبه شلت 4 شباب من الساعقه وعلي فكرة كانو مستقيلين من اكثر من سنه جوني وقالولي جانا استدعاء ونحن بو نمشو بجد فرحت شفت الليبي والعسكري بالذات الي كنا هازين علي وضعه يعني شباب امسيبين الجيش من سوء الوضوع شنو الي جبرهم علي الانظمام وتلبيه الاستعاء الي داره عبدالفتاح يوم 17 ما كان يرقد ويقول انا امسيب من سنه
اما موضوع قاعده بنينا هضوم ما عندك ما اتقول عليهم ايش تبي تذكر او تذكر او تذكر انا يوميا كنت انشوف فيهم ايام القصف عليهم وكيف طياراتهم تطلع وتضرب وخاصه اليوم الاسود 19 _3 وغيره وغيرة بصراحه شرفونا وعلي راس كل ليبي وردو للجيش هيبته
وعلي فكرة اغلب كتائب الثوار شباب عسكريه من الجيش وفيها ضباط وشباب كانو في الجيش او الامن العام
فعلا اختي فداليبيا فتحتي موضوع قيم علي الاقل انحاولو انردو ولو ذرة من قدموة الجيش وما ننسو الثوار الي طلعو عشان الوطن موش عشان شي ثاني
مشكورة وبارك الله فيك

فداليبيا كتب: بارك الله فيك أخي جمال المروج والله أنا حكيت الواقع وأختصرت واجد في حكايتي بيش مانكرهكمش في الموضوع...وأنا نبي نرد عليكم بالواحد بيش نعطي كل واحد حقه والنت عندي بطيئ...والله فيه قصيدة يقول فيها واحد وهيا زي النكتة والله لما يسمعها زوجي يموت من الضحك ويقول والله الشاعر يحكي في الواقع.....ممكن تكون مارة عليك... اتقول نمل نمشو طوابيرههههههههههههه.

مشكورة جدا أختنا الفاضلة