عندي العقل

من طرف **العاشق الصغير** 2012-07-17, 8:56 pm

عندي العقل كي غونن نوى ف الحال
ارحاله شال
عدل وجهته شرّق عمد لـجبال
* * *
هلب بوهديمة
وجا عالمساكن مايريد زحام
بحّر تقاصى في طريق قديمة
وحدّد مساره في حيّ السلام
شرّق وعدّا في طريق سقيمة
فات بودزيرة قال يا رحّام
توكّل وسمّى كي تقاوى ضيمه
وسيدي خليفة فات بـانسجام
دريانة بعد جاها كثر تخميمه
زاد سرعته غونن بكل الزام
المبني وبوجرّار في التخطيمة
نظرهن وبرسس فات لـَقدّام
في توكرة هدّر وزاد عزيمة
كيف الفحل جاه الخريف وهام
اصّعّد مع الباكور جاه نسيمه
ربيع الجبل فايح مع الانسام
فرزوغة هلبها غير ف التخطيمة
ف المرج دمعته سالت وما يلتام
العويلية لاقى وجوه كريمة
لفّوا عليه بـقدر واحترام
منزل ضنا الاجواد ضاق نعيمه
رفاقه يهنّوا موش غير كلام
وقتاً استاذ ن حررّوا التسليمة
وكمّل طريقه قال ياعلاّم
لسطاطة وبجراوة هلبهن كيما
يقولوا العرب خطّم مرور كرام
البيّاضة خطم فيها مع التحكيمة
خفّف السرعة خاف م الصدام
في قصر ليبيا للعقل جت تدويمه
موكر خواله اللّي ابهم يفخام
وقتاً هلبها خشّ لمواهيمه
فـي زاوية العرقوب طاب مقام
كبر نار شاهي عصر ولها قيمة
في موكره وموكر ضنا العمام
وقتاًاسقد زاد في تقديمه
ع الكوف جبّا ضاع كل ضيام
سبّح الله بقدرته العظيمة
فعلاً جبلنا راسمه رسّام
مسّة هلب فيها مع التظليمة
وفات البلنج بـسيل دمع جمام
وكيف ما يبان البدر فوق الغيمة
بانت البيضاء نايره الظلام
دخلها وفات الجامعة تصميمه
وجا للعروبة لقي الناس نيام
الخاطر دعا مولاه تبقى ديما
البيضاء هنية وعامرة برجال
عندي العقل كي غونن نوى ف الحال
ارحاله شال
عدل وجهته شرّق عمد لـجبال
* * *
هلب بنغازي
وخشّ الجبل الاخضر بشوق يزازي
حكم الجبل عالقلب حكم النازي
انكان ماقتل مارحمته تنطال
امرايف رياف العمر ماني هازي
لاجل ا ربيت وعشت فيه دلال
وحتى ان كبرت وشالني عكّازي
هونة الجبل والله م المحال
وطالب ان متّ يكون غير مفازي
م المولى الدفنة في وطاه ننال
لاجل تراب الوطن عزّ عزازي
ولا العين غيره عندها موّال
عندي العقل كي غونن نوى ف الحال
ارحاله شال
عدل وجهته شرّق عمد لـجبال
* * *
هلبها برقة
عدل جيهته جبّى رحيله شرقه
مرايف وناره في الجواجي ترقى
علي وطن مو قابل عليه ابدال
امرايف علي عدّ الشجر بالورقة
وعلي عدّ الوطا بـالشبر والاميال
ومرايف علي صفوة سماه الزرقا
وع الكوف والبيضاء وع الشلاّل
وريافي على الموكار ماهو طهقة
نلقنّه غلا و رياف بوعقّال
عندي العقل كي غونن نوى ف الحال
ارحاله شال
عدل وجهته شرّق عمد لـجبال
م ن ق و ل