الشاعر عزالدين الفيتوري

الشاعر

عزالدين الفيتوري

عالزمان رمينا
عيوب واجده والعيب منّا وفينا
يا حسرتي

رمينا العيب
وتمينا أنقولوا هالزمان عجيب
والعيب فينا ماهو كلام غريب
نبوا الراحه وكل شي في إيدينا
ونبوا أنديروا لكل شيء سريب
ونبوا نعيشوا وما نشوفوا الشينه

عالزمان رمينا
عيوب واجده والعيب منا وفينا
يا حسرتي

عالزمان عزقنا
أسباب الفشل وكفوفنا صفقنا
وتمينا علي هالحال نين أغرقنا
ومازال واجد كان ما صبينا
تصبايت تريس وننفوا اللي لفقنا
علي كل كلمه في حق الزمان حكينا

عالزمان رمينا
عيوب واجده والعيب منا وفينا
يا حسرتي

يا حسرتي في دانا
ويا حسرتي في فكر عاش معانا
أنلوموا الزمان ولو حكى هجانا
علي كل عيب أندار في ماضينا
والاّ الحاضر يستره مولانا
الساتر اللي ياما ستر خافينا

عالزمان رمينا
عيوب واجده والعيب منا وفينا
يا حسرتي

يا حسرتي في ناسي
ويا حسرتي ماللي أنحفر في راسي
وين ما أنطيحوا أنقولوا الوقت القاسي
هو السبب في كل شيء إيجينا
أو وين ما تروق نخبطوا الطواسي
فراحه سعاده وكل الهموم أنسينا

عالزمان رمينا
عيوب واجده والعيب منا وفينا
يا حسرتي

تسلم اخى ستار