قصائد في رثاء الشاعر ادريس الشيخي رحمه الله

الشاعر عبد الجواد فرج احد الاصدقاء المقربين جدا من المرحوم حين وقف على قبر الشيخي يوم دفنه وقال

((الله ايسامحك ما من وابساط وطيته .... وما من خلا خالي امسوته جيته ))

رد الشاعر : محمد علي مومن - البيضاء - على مطلع البيت وقال

ما من افجوج صحاري ... قصدهن بعد ثلثين جاهن ساري

التكوه على رثمه ونار اجداري ... ديمه اتصيد العقل و مواليته

وتاخذ كلام اشعار موش سهاري .... على كل شاطب تنتظم قافيته

ان كان جال شور الدين عالم قاري .... وان كان جال ع الدنيا هذيك قضيته

وكان وصفك فكة محاس حباري .... امنين ما تنقال في اطراف حطيته

عليه وين ما جلي فليت حباري .... خذا الخارمه ما سال في واطيته

ووصف الربيع سيل بداري ... شاقيبهن لاعند يوم الميته

وان كان قال عالجواد طيبك طاري .... ولا ايجامل العفنين في مهجيته

وديمه علي برعاص ريقه جاري .... اجواد صيتهم ذايع وذايع صيته

عليه مالسما رحمه الله الباري .... ايديرها افراش وستر ومغطيته

ويغفر اذنوب اللي سمع لشعاري .... كريم العطا من غير من عطيته

الشاعر الحاج :الشريف الحرنه -اجدابيا- 17:11:2010-يرثي المرحوم ثاني يوم الوفاة

سارح مع مية اقرام كرامه ...ادريس لين مات وهو الهن حماي

حسب ما سمعت عليه مالكلامه ... ابعاد الجبا واللي اقعود احذاي

ثابت علي مبداه طول ايامه ...ما ابقي لحد نيار لا سداي

عصى ع الطمع ما طاع للروامه .... حتى وهن اظروفه ذيبهن عواي

عزا لعيلته وجمله اولاد عمامه ... نبعث وما نبخل ابخير ادعاي

الفردوس تجعل يا الله مقامه .... مرتاح في هنا ما يلحقى تكداي

الشاعر محمد علي مومن في رثاء صديقه يقول

حتى و العمار امحوددات بساعه ... مابت اتحودد دمعتي دفاعه

مابه ايحودد عايب ... شلال دمعتي فوق الخدود سكايب

كيف غيبته نا زاد عندي غايب .... جرة افراقه يا حمد لذاعه

حتى و العمار امحودات كتايب ... والموت حق لاكن الها نفجاعه

اشبوبي عمر في جو مزنه ذايب .... مصيم عقاير خاطري وانقاعه

مابا ايحودد سيله .... زاعب امروي لحيتي بهذيله

علي فقد صاحب كان لي عزيله ... انجيه وين ما ضاقن علي او ساعه

ايهون عليا وين ما نشكيله .... حجايجه ايحيدن من كنين اوجاعه

رفيق عمر مي رفقه نهار او ليله ..... رفقه وفاء لاغش لا نخداعه

ما يوم لاقاني ابعينة بخيله ...حتى و الظروف الغايته مناعه

وصابر وحامل كل مو جاريله .... وحامد الله وشاركره ابقناعه

من يوم عرفته لعند يوم رحيله ..... كلمة الحق ايقولها ابشجاعه

وعاش صقر ماعمره البس كنبيله .... عفيف نفس من زين اطباع اطباعه

علي خط واحد ما عرف تبديله .... عليه نين كر الزمان اقناعه

الله يجعله في جار خليله .... ابجاه كل من صلى اخشوع وطاعه

ويشمل الله ابرحمته الجليله .... جميع من امصلي عالنبي و اتباعه

ابن الشاعر : سعيد ادريس الشيخي :: قال في يوم وفاة والده رحمه الله

علي اوحدي ..افواهق ونا بارد اليوم اجهدي ... عزيز غاب خلاهن

غاب اليوم .. اللي غيبته شوت علي النوم

علي اتهايا كي اندير اعزوم ... ننهال بالبكا فرقت العزم ايغدي

الراجل اللي بأسمه ابقي مرحوم .... على سيرتهى ديمى طويل سردي

العاقل اللي وقتا ايسير الشوم ...فكاك للبعض ماهو امتاع اطردي

ولا دار فتنه لا عداء لا اخصوم .... ولا يقرضه والي انصار اعددي

ولا عمر في بطنه كلا زقوم .... سديد راي ديمه للصلاح ايهدي

كلام طيب تسلم اخى ادريس