تجميع سليمان الخفيفي

عقل شاغله مازال ... سريب صوب ديوان القدم

عذاب عمر كامل فيك ... ننساك كيف يا دار القدم

الكبد فى رحاء حطيت ... يطحن جديد وهاجوه القدم

حتى والجدبد اطعمـــه ... يحكى العقل ما زال على القدم

لو كان ياجديد اقسمت ... نزهوبك شماته فالقدم

يحاسبني قديم انمـــــوت ... دثمر دواي داووني اجدد

تخطيمـــة الزاهد ليش ... مريت يا قديمي فالغلا

قديم كي نويت جديــــــد ... عيط وراي ممشاي قصره

يستـاهل ابكاك صحيح ... غلا قديم يا عين واجعك

كنيب تحلمي بقديــــــــم ... كري اغطاك يالعين وارقدي

قديم قال ما انخطـــــــاك ... ان جاك نوم راني جايك

مدفون في خفايا العقل ... صوب القديم ما يوم انتسى

حتى لو خذوه انظري ... نمشي كفيف لديار القدم

عليك حلم جـــــاب قديم ... تفسيره انموت وما اقسم

يلويني ارياف انجيــــــــــــك ... وندير يوم يا دار القدم

عماني غلا قديــــــــــــــــم ... جديد بيش نبي ننظرا

غفت العين جاب العقل ... سريب لقدم طار نومها

غلا جديد جـــــا للعين ... عماها علي صوب القدم

ما القيت للجديد مكان ... اللي اهناك جا دوب القدم

خايف اندير جديــــــــــد ... يفضالي قديم وننقهر

ملذوع من قديم انخاف ... انغالي جديد منا نلتذع

لثنين واعرت عليك ... نسوت قديم يالعين والبكا

انريد القديم ايعلم ... دورت جديد ويضوق الوجع

ايجيب ما ايجيب القسم ... واخذ اقدم ما ايجيب كيفهم

لو كان كسر لا يمناه ... دقدق قديم فينا كل شئ

بكانى جديد اليوم ... ينشد عليش خانوك القدم

نمشيلك انجى بريان ... دواى فيك يا دار القدم

يسارب قريب ايضيع ... العمر بين لوهام والقدم

حتى لو بجديد امطرت ... ما زالن ابروق القديم ايخايلن

الغيرى قديم الصوب ... لقسام دودشنه دودشه

ملذوع من قديم انخاف ... نقرب جديد منا نلتذع

تكره العين فى لوهام ... من خوف امهاياه القدم

مليان غير داير عزم ... ارياف عالمواهيم والقدم

نضايق ان كان كميت ... تسكيبى ضرورى عالقدم

عالعقل لافيه بالعرض ... افراق ناس واوهام يشغلن

اوهام اوقديم اوفقد ... يسكت عليش عقلي مالقى

نحساب الجديد الهاك ... بندر قديم جيتى تمدحى

ازعمه يا جديد اتسير ... تملا مكان فضوه القدم

جديد ما مسحلى كبد ... هضا اسبب ردتى علقدم

ما ايمت نين انموت ... سطار جرح داروه القدم

لناشد انقول ابريت ... اونا عديم من نار القدم

يحكيبكم ونا ناهيه ... اوحلت في عقلي ياقدم

حلال يا جديد عليك ... عقلى كان جبتا ماقدم

نسريله اونا ممطور ... شكيع برق فى غيم القدم

حالف ماندير جديد ... علي قديم كبدى ذايبه

مالقيت درب ايشيل ... منك بعيد يا دار القدم

حتى والجديد امعاى ... نحلف بروسكم ياقدم

حطيت عالقديم رديم ... فى جديد يانار اولعى

عذاب عمر كامل فيك ... ننساك كيف يا دار القدم

مابيت لجديد انطيع ... داير احساب ديما للقدم

علي جديد درنا كبد كله ... مكر فى عيت القدم

عزل خليطتى القديم ... انلوم فيه ويقول سوقها

قديم يالعين اظلمك ... اوبسكابك ظلمتى خاطرى

سفيت علقديم رديم ... واقصر جديد هو زاد نردمه

اتريد عزم ومهايه ... تخطيمتى علي دار القدم

امرايف او جوه منام ... العقل دار ليله علقدم

القيت ياقديم ابعدك ... هواى غير ليدين يفرقن

اساهله اندير جديد ... والواعره املاقات القدم

الماشى انوصوا فيه ... والجاى عالقدم فيه ننشدو

واجد العين انظرت ... فلعمر مابكت غير عالقدم

ما فيك ما غفا يا عين ... علي قديم سيلي ابغايتك

ما القيت لجديد مكان ... اللي اهناك جا دوب القدم

تلذيع القديم اقهرك ... اندرتى جديد يالعين شاورى

طشاش اوعوين اوهفو ... وراى دايره نار القدم

اتحوس فى مكان اشيل ... وتقول وين عدو بالقدم

خشيت فى اوهام قديم ... رديت خفت عاعين تنعما

نساقط عوين اوجمر ... تميت نار من نار القدم

كذاب من ايقول الجرح ... بعد قديم داويته ابريه

قديم هو رفيق العمر ... يقصر يطول ماعاد ينتسي

جديد علي قديم يجي ... مكتوبلي نعاني كيدهن

حلفت ماندير جديد ... عندي قديم عقلي رايده

ماجابن اقسام قديم ... ولا جديد عيني دورت

ارضيت يا قديم النقض ... معاي بعد اجدغلا

تحسابه يحيد اريـــــــاف ... تقديعك علي دار القدم

متقاوي معاي امرضي ... وخطور القديمين زادني

نحايل بقول جديـــــــد ... تقفز العين وتقول للقدم

كترت عليه لمهايـــــاه ... العقل مافرز غير القدم

بعد قديم راه حــــــــــرام ... واطي انظرك ياعين عالغلا

غنيت وضنيت وشبت ... وما زلو الاقدم فى خاطرى

حتى لو خذوه انظري ... نمشي كفيف لديار القدم

مشيت لانظر لاحيــــــــل ... تلميس نين طقيت دارهم

اشربت خمر نين ارويت ... يخطر قديم ونقول ناقصه

جديد قبل فيه علــــــــــــــــقت ... قاتل أوصاف م القدم

الكاينة اوهــــــام قديم ... ماشيلهن وعارفهن خلا

اتقول عايبات اعيـــــــــــاب ... ايشلن على دار القدم

ومغير القديــــــــــــــــم وبس ... لنظار ماجديد يولفن

ومالك مكان ياجديد ... القلب اقدم ساكنينه

كان ع القديم بكيـــــت ... تهوين مو طمع في جيتا

لوهام ياقديم ابعـــــــــــــــدك ... يعلم الله ياما جيتن

عليك حلم جاب قديــــــــــم ... تفسيره انموت وماقسم

قديم يالنوم اقسمــــــــــــــــــك ... شواك وانت من غادى اشوى

شفانى الله وبريـــــــــــت ... ونسيت لذع نيران القدم

بعيد ياجديد عليــــــــــــــــــــك ... مملوك راني للقدم

حتى هو جديد احذاي ... خربت وين هفولي اقدم

بريت يالقديم بــــــلاك ... أمسك دواك ماني مدوره

بلاك يالقديم اقعـــــــدن ... عايشات غير اقدات كل شئ

اللي مو علي عليه ... بكا العين في اوهام القدم

جيتوه يوم ساولتوه ... يبرا العقل لوكان يا قدم

غيات القديم انقضن ... كيف بو مرض لا ناوضه

نسيونا بلا سيات ... اقلال خير لولاف القدم

داريت فيه نين اوحلت ... العقل وين لاقوه القدم

نسرق انضري شور قديم ... نلقا انضره شوري سارقه

انظر اليوم كي ساير ... ما قديم قلتي مقدعي

اخطيت غير مابا العقل ... يخطى مناويل القدم

نسوني لكم نسيان ... داروا بي جديدين يا اقدم

علي صوب ناس جديد ... ندرا العقل ويجيب القدم

ماني امطلب عقل ... للي جديد ماني شي زبا

يلويني ارياف انجيك ... واندير يوم يا دار القدم

لنضار ع القدم هليع ... اجبرن ليلهن ما بطلن

نحساب الجديد لهاك ... بندر قديم جيتي تردحي

نعاود انقول خليع ... نذرا من امواهيم القدم

متكارهين نا والليل ... كريهة ضراير يا قدم

مامن جديد جا للعين ... لطاتا علي شان القدم

هاووله بصوب جديد ... قفز ايقول يانا يا اقدم

يحسابني جديد عطيت ... طريق ف القديم جا منعمي

تقول ما نقول قديم ... تحلف اتحنث عيني اتقولها

مايموت نين انموت ... سطار جرح داروه القدم

طحنت ياقديم غلاك ... تناتر وجاءشور الجدد

جميل الجديد كبير ... مشا وجاب عقلي من القدم

داووني الجدد بريت ... جروح القدم طار سوهن

يستاهل بكاي عليه ... قديم لاجل ماضي بينا

علي بكاي مانلتام ... سريب القدم خاطر علي

وما سكتت يالقديم ... هوينا وجازينابها

جميع ماجرى للعين ... نسياته الاياس القدم

قديم قال مانخطاك ... ان جاك نوم راني جايك

لوكان ياقديم تبان ... تمسح ارياف كبدي الذايبه

خلانى القديم عوين ... مرهون غير فى ريح هابه

سفينا عليه رديم ... ماضي قديم وشقيت بالجدد

تقلع مشى فالهود ... غلا قديم بارياح الجدد

القيت الجديد حنون ... مسح جميع ما دار لولي

اول العمر راح رياح ... تلافو عقابه يالجدد

تلذيع القديم قهرك ... ديري جديد يا عين خيرلك

داووني خذو في لجر ... جارحيني قديمين ياجدد

جدد وراه الصوب خلك منه ... اقدم جرحهم يبراو غصبن عنه

اللـــــــي رد النيران علي ... قديم غلا لازمتا في

طاري جاب قديم الطاري ... حطيت الكيد علي انظاري

صوب قديم أيـــام شبابي ... درته في لخرين انزابي

نرقد فى نومى مطــــرف ... خايف باسم قديم انخرف

تباعد يالجديد يعيـــــــــــد ... اقدم قدامك ويش اتريد

جديد اندير انحطـــــه وين ... قديمى فى كل تراكين

ياخذ سوك يامجروحـــــــه ... ماضر قديم الا روحه

جديد اديرى فى شان ايش ... قديمك مازال ادقوليش

القــــــــــــــــديم اقرب داويهن ... راك مطاويح مخليهن

يالقــــــــــــــــديم معاهن كنك ... يبكن فيت عليك ومنك

يا القـــديم أنسيتك راني ... صاحب صوب جديد لواني

يا القـــــــــــديم انسيتك مدة ... نادم ونفكر فى الردة

يا القـــــــــــــــديم امغير ايمتا ... تبرم ع العين تسكتا

يالقـــــــــــــديم بقلة خيرك ... لا هنت ولا درنا غيرك

يالقـــــــــــــديم احقوقك جنك ... وحنا ياما نبو منك

يالقديم اصعب مجلاسك ... و العين تعانى فى يائسك

يا القــــــــديم امعاك انراجع ... ما نتفكر غير مواجع

يا القـــــديم نظرهن دوبك ... مادارن صوب علي صوبك

يالقــــديم ايش امعقبلي ... غير اوهام عجاج وقبلي

يالقــــــــــــديم وما تعلمها ... نارك صوب جديد ردمها

يا لقـــــــــديم رضاك انريده ... ماتلزمني نار جديده

يا القــــــديم معاهن كنك ... جيت بعد قلنا نسينك

يالقــــــــــديم غلاك شطبنا ... رانا شور جديد هلبنا

يا القــــــــــديم بعد حقيتك ... ردت فيا الروح وجيتك

يالقـــــــديم اللي نفتلها ... نلقاك اتنقض فاولها

يا القـــديم اللة لاايردك ... ماني ملك البوك وجدك

يالقــديم خلاص أنسيتك ... وانت تنساني ياريتك

السم مداواته بسم ... جدد ينسونا القدم

كان تفـارق كثـر خيرك ... يا القديم القيـنا غيرك

يوم ابيوم العمر امجبي ... وانتي غير اقدم ما تبي

افرح يحساب قديم انموت ... جديد نشلني م التابوت

اقدم مايثمر فيهم خير ... ان قلناها للعين تطير

انسيت سريبك يالقديم ... علي غيرك تميت انهيم

قديم انقلنا للانظار ... ايقولن دار اودار اودار

اللي قايلك ريت اقدم ... امغير ايكدي فيك ابهم

اتعرم عالخاطر تعريم ... جفا وامواجع يالقديم

انظاري يا القديم عليك ... بكن بكيا وتخلف فيك

يالجديد ايش اللى درته ... نين قديم هناك دفرته

صوب جديد اكبر في عيني ... ماعاد قديم يبكيني

شهاده يالجديد بجد ... بعدكم مايلزمني حد

عندك يالجديد معزه ... الخاطر جاه قديم ولزه

درنا يالقديم بديلك ... ارقدزين وبرد حيلك

يالقديم عليها نادم ... درتك بين الناس بنادم

يالقديم انعدك ميت ... نيتك ع الشينات مبيت

هدا ماخلي القديم ... جفا ومواجع ومواهيم

انفضهن يالقديم ايديك ... علي الله رزقي موش عليك

بادن الله جديدك شاطر ... يمسح كل جروح الخاطر

بغناوي وشيبي وضناي ... نموت ونارعزيز معاي

يالقديم ايش عندك فيها ... تبرم عالعين اتبكيها

دق نديف اقدم ندابي ... فالداروماجو غيابي

امساهي روحي قلت انسيت ... وين طرو اقدم انجنيت

ياريت ياقديم اتجيه ... العقل نين تبرا لوعته

قديم هو سبب امرضي .. نبرا انكان لاباس قالي

تراين ودارن عزم ... طرو قديم ضروهن على

فى عازه ابكاك عليه ... قديم الغلا ليش ساكته

قديم كي طروه احذاي ... اعلي انفسي والعين رقرقت

معاي يا قديم ابــعدك ... عله انزلت لاهي اللي رقت

تبكيله الها كم عام ... يكرب قديم مو باكيلها

حكومة بلا قانون ... غلا قديم دولة ظالمة

رميت ع القديم رميت ... انكان هى سفاها درتا

قديم يا العين غنوه ... ما ايجيك لو اعميتي مالبكا

من بالي قديم الصوب ... روحي انسيت مابا ينتسى

يا اخسارة مكان قديم ... خذا جديد مني مطرحه

مع قديم كابر نار ... لليوم لذعها باين على

ايجي في مكان قديم ... يكرب جديد هياله الا

انريد غير يا القديم ... تحضر نهار موتي انودعك

ابكاي عالقديم قديم.. ... لا اليوم لا امس يا ناشديني

ما تلومني انكان بكيت ... راني اليوم لاقيت القدم

اندمت في بكاي عليه ... قديم كي تعاميت باعني

ياريت ياقديم اتسير ... ايجي دواك فيدى انقطمرك

قديم بالخطا كافاك ... وجعاتك وجا كيدك علي

مشنون ياالعين اطربي ... بعد قديم ماني لولي

قديم باعني لجديد ... وجديد ماشرا لين باعني

ايعاود اللي ادفنوه ... اتصير هذي ولا انهون القدم

نسيت بالقديم نطقت ... حذا جديد وجعاته بكا

احملن راقدات بلاه ... خطر قديم وعاهن بكن

يوعى لها ثقيل النوم ... بكية العين في الليل ع القدم

قديم وجديد وجرح ... تخطر عليك جني كلهن

قديم ضاع فيه القسم ... علي جديد عيني حالفة

سميت يالقديم عليك ... بكري ضناي من خوف تنتسى

ملذوع من قديم انخاف ... نقرب جديد منه نلتذع

تلاقيت نا و قديم ... ذبنا دموع ما والي حكا

خلاص ما اتريد قديم ... غلا جديد عينى صوقرت

كلا قديم مو للنسو ... حتى انكان مو داير اشوي

خايف عليه يضيــــع ... العمر ياقديمين روحوا

عطيـت عهــد نا والعيــن ... نحلــف انتـوب لو انطــول

أحملتي بلاه طيب فيك ... ياما قديم قلتي قرعتي

طقيته ارواق العزم ... وطاح في ملاقات القدم

كاتب عليه قديم ... العقل غير ايش ايغيرا

انجيت للكلام حنون ... وافعاله قديم ايبغددن

بلا قديم يا هواى ... النوم لو اتجازى ما يجى

ماكيف القديم قديم ... من البخت حتي عقلي قالها

حتي كان فقدت نظري ... نمشي كفيف لدار القدم