نشرتي كلامك لي عطر ورود

الشاعر سعد العمرونى

نشرتي كلامك لي عطر ورود
نردوا الجميل بقول جاك الجود

لك كل ما نتمنوا ...
وفي الرب الكريم بحسن ظن انظنوا
سابق جميلك ماعليك انمنّوا
والله يحفظك من عين كل حسود
وحرّ من احرار الجمر له نستنوا
كلامك اللي يحيي يباس العود
واللي حنون عليه دوم انحنّوا
وارياحنا على اللي قاسيين خمود
والصاحب اللي فارح انجوه انهنّوا
وان جا باسم متكدر مشا مسعود
وان جا ضيفنا مامن طعام اندنّوا
وبرهان قولنا ليام راه اشهود

كي عطر من زهرا تك
نشرتي ونشرتي الحلو من كلماتك
ووفوق من خدودك ناشرة بسماتك
والله يعطّرك من عطر طيب العود
والله لايسّقط حزن من دمعاتك
ويزهن ايامك ماتشوفي سود
والله ياحنونه الستر طول حياتك
انت عرضنا ونحن معاك اجنود
الله يعوّضك بالخير في مافاتك
ودود وكريم وربنا مقصود