مواير ولد الاجواد لك نوصفا للشاعر عبدالسلام بوجلاوي

من طرف **حبة مسك** 2010-07-15, 9:54 am

مواير ولد الاجواد لك نوصفا
للشاعر عبدالسلام بوجلاوي

مواير ولد الاجواد لك نوصفا
ان كان رافقك تلقا عليه دليل
ــــــــــــــــــــــــــــــــــــــــ
ان حدث صدق وان كان عاهد وفا
وايشيل الصليبه فوق حمل ثقيل
ــــــــــــــــــــــــــــــــــــــــ
وان فيها برم بسياسته تصفا
ان خاضت وحاست حوسة التبتيل
ــــــــــــــــــــــــــــــــــــــــ
وايدير عليك ان حالك شفا
وان كان عاندك تنظر امعاه الويل
ــــــــــــــــــــــــــــــــــــــــ
اعده صفهم خاسر ورابح صفا
وان صار سوق مقبوضه فراسة خيل
ــــــــــــــــــــــــــــــــــــــــ
الاجواد فى الكروب اتبان بموافقه
امنيين المعلق فى نهار الشيل
ــــــــــــــــــــــــــــــــــــــــ
معلاقه دقيق ايطيح واين اتهفه
ان تمت الريح مصادره الرحيل
ــــــــــــــــــــــــــــــــــــــــ
واللى مو اموالف عالصلوب اتخفا
تغلب وبات امبات قبل الليل
ــــــــــــــــــــــــــــــــــــــــ
ولاخر امصولب لا تعب لا غفا
وعنده الميه ميل كيف الميل
ــــــــــــــــــــــــــــــــــــــــ
من عيله اتهون العمر دون شرفا
وفيه غيرهم فرط بشى قليل
ــــــــــــــــــــــــــــــــــــــــ
طريق المطامع يا صاحبى امحرفا
ان جاك الزمان الصبر راه جميل
ــــــــــــــــــــــــــــــــــــــــ
اخيار ما عطا عبده عطاه العفا
الخالق اللى بالرزق هو الكفيل
ــــــــــــــــــــــــــــــــــــــــ
اتبيين اعيوب الناس واتنظفا
يقولوا العازه للرجال غسيل
ــــــــــــــــــــــــــــــــــــــــ
فيهم جميع الخافيه تكشفا
ان صار كرب ما يصمد الا الاصيل
ــــــــــــــــــــــــــــــــــــــــ
شديد عزم لا يضعف ولا يتهفا
يصمد امام الدايليين ان ديل
ــــــــــــــــــــــــــــــــــــــــ
وان كان دال لا يحقد ولا يشفا
ويرحم ان جاه عزيز قوم ذليل
ــــــــــــــــــــــــــــــــــــــــ
ليام كفتين ان كان زادت كفه
على وزن كفه عندهن تمييل
ــــــــــــــــــــــــــــــــــــــــ
وان كان استوت فى ثقل والا خفا
تقادن وصار لو ضعهن تعديل
ــــــــــــــــــــــــــــــــــــــــ
الدنيا غرورهما ايدوم ترفه
لا ترتبط بالفانيه بالحيل
ــــــــــــــــــــــــــــــــــــــــ
احيا نا هناها بالشقاء اتكفا
واوقات النكد بالفرح فيه اتزيل
ــــــــــــــــــــــــــــــــــــــــ
والا انجت عليك تحزن واتقارفه
والا معاك ضحكته عليك اتخيل
ــــــــــــــــــــــــــــــــــــــــ
وهذه نصيحه فى علل مقفا
خذتنى بعيد وما تريد اتطيل
ــــــــــــــــــــــــــــــــــــــــ
تعاود على مضمونها وهدفها
فضايل ضنا الالجواد بالتفصيل
ــــــــــــــــــــــــــــــــــــــــ
الاجواد عرقهم حتى ان صارت جفا
ايطول فى الثرا يصمد زمان طويل
ــــــــــــــــــــــــــــــــــــــــ
خير من بعض مالتمر طيب حشفا
لجود انخلتهم غالبه النخيل
ــــــــــــــــــــــــــــــــــــــــ
لجواد للغريب اللى اصداره دفه
من غبر رفعمال ابيوتهم هوتيل
ــــــــــــــــــــــــــــــــــــــــ
وابيارهم منافز مالعطش فالنفه
لعابر السبيل امشرعات سبيل
ــــــــــــــــــــــــــــــــــــــــ
وكلمة اجوادى راه مورادفه
انسان شهم صادق قول ومفاعيل
ــــــــــــــــــــــــــــــــــــــــ
وان صار تقص من الخلفه اللى خلفا
لحوال اتغير بين جيل وجيل
ــــــــــــــــــــــــــــــــــــــــ
احيانا بزين اتفوت زين سلفه
تردع بطبعه لولى وتميت
ــــــــــــــــــــــــــــــــــــــــ
ومرات تحدث للعقابى شفه
حتى لرض صارلنيته تبديل
ــــــــــــــــــــــــــــــــــــــــ
ولكن بها بلكل اللى تعرفا
الراس راس مايخلف مكانه ذيل
ــــــــــــــــــــــــــــــــــــــــ
السيل جرته فى الرخى ماتخفا
وخلقة اخيار الناس جرت سيل
ــــــــــــــــــــــــــــــــــــــــ
ومارة الربيع اللى قعد فالرفه
مع فم البيتيشاهد الزغليل
ــــــــــــــــــــــــــــــــــــــــ
ومهما الزمان تسيرله من لفه
الزين زين ديمه والنذيل نذيل
ــــــــــــــــــــــــــــــــــــــــ
وحتى لو اضعف لشقر امدورم خفه
وطاح مالجفا فوق الوطا هزيل
ــــــــــــــــــــــــــــــــــــــــ
هشيمه عظامه وماتجى فالقفه
والشاه لو تقوت مالحمل تشيل

من طرف **STAR** 2010-07-17, 1:33 pm

مميز دائماً بكل ما تأتى بة يا غالى

مواير ولد الاجواد لك نوصفا للشاعر عبدالسلام بوجلاوي

مواير ولد الاجواد لك نوصفا للشاعر عبدالسلام بوجلاوي

رد: مواير ولد الاجواد لك نوصفا للشاعر عبدالسلام بوجلاوي