خطم امضيق عصر .. للشاعر الرويعي موسى الفاخري..

من طرف الفهد 2010-09-05, 5:45 pm

خطم امظيق عصر ..فاحن عطاره ..وجا بنجراره ...ايريد ينقطع من اتثنى خصاره

خطم امظيق عصر... ما نعرفوه .. ولامنين هوه .. ومن امه وبوه
وهله اللى وحده هك اطلقوه .. جماله بلا قول مانجحدوه
ولون النظاره .. ايشعن انواره .. ويشيعن اخباره
ويلهلب اتقول نار فى راس قاره

خطم امظيق عصر ... فى لبس غالى ... انريد من هبالى ... نفتح له سوالى ..
مشا ما صغا لى ...ولا عالوطا حاسب احساب والى
وفى كل مسكين حاله بحالى ... خطفن انظاره ... اشباه الغداره
...اسلام ونصاره
اسمله عليه كل من جا اصداره

خطم امظيق عصر ... وسطا اثنى ... اعيونه كلنه.. واعيون اغبطنه.. واعيون احسدنه..
وكل سمح فى خطمته غار منه ... وعاقلين ما عقل عنهم تعنا
خلاهم حياره ..ايمينه يساره.. عليهم تواره
وهم بالمساتيه كيف السكاره

خطم امظيق عصر ... مرفوع شوفا .. ومردوع جوفا .. جمع بين نوفا ..وجسرا وخوفا
على كل ولهان ماشى حسوفا
تلقا غير من ينشدوا عن اظروفا ... وهو وين داره ... وقول ياازهاره .. ومبرك نهاره
اللى هالغزال فيه طالن اقداره

خطم امظيق عصر ... منهو نظيره ..النفس الظريره.. عدت به طريره .. وانذهبت الشيره.. وداخت الناس فيه دوخه كبيره

من عينه اللى اتقول فيه عين طيره .. درجة مهاره .. الجوع من حراراه
اتذوق فى امراره .. جلولها رقت طرشقت فى احباره

خطم امظيق عصر ... دار اثغبوره ... ابفوحة اعطوره ... و تسفاى دوره
بكثرة غروره ..ماكيف هكذى ريت فالناس صوره
اجنان مغتبل فيه غنن اطيوره... وفاحن ازهاره ... ومالنا ادباره .. انالوا اثماره
حتى لو فالسما نطيروا اطياره

خطم امظيق عصر ... وقت العشيه .. بخطوه بطيه ... وطله بهيه
جماله سويه ..الشايب صحر والولد والوليه .
سحاب فى عقاب سواد ريحه نديه .. تواقد شراراه.. صبا فى ابكاره ..هلل من امطاره .. جميع من عليه حام طرطش ابذاره

خطم امظيق عصر ... ناير الباسه ... اعيونا نعاسا .. احدود الكواسا
وجا ابنسلاسه .. على نبض لقلوب طقة مداسا
براح الغلا فيه برح ابياسه... وبرح ابناره .. وطولة اقهاره
اللى من جظاره ..ايريد من هظا حن ..حتى ايشاره
خطم امضيق عصر

من طرف **بوفرقه** 2010-10-14, 5:38 pm

شكرا على هذا الطرح الرائع

من طرف جلنار 2010-11-25, 12:20 pm

خطم امضيق عصر .. للشاعر الرويعي موسى الفاخري..

خطم امضيق عصر .. للشاعر الرويعي موسى الفاخري..

رد: خطم امضيق عصر .. للشاعر الرويعي موسى الفاخري..

رد: خطم امضيق عصر .. للشاعر الرويعي موسى الفاخري..