مالي افــــــدا تلقــــــيه دلَّلتك دلال كبير بوزعتيه

مالي افــــــدا تلقــــــيه دلَّلتك دلال كبير بوزعتيه
أنت الخاسرة
ومن هو اللِّي درتيه غالي ثاني مــــــن هــــو الليِّ يفداني
ومن هو اللِّي واطى غلاي وشاني في نظرك يا ريدي اللِّي تبِّيه

ومن هو اللِّي واخذ اليوم مكاني ومن هو اللِّي هو مطرحي ماليه
نريد نعرفه لأيَّن خلايق داني ومن أيَّن جلاوي يا علم جبتيه
وكنَّك تقولي ما بشر غالاني من غيرك عليش العقل عوَّزتيه
ونا ويش داير شنو اللِي شوَّاني وشوَّى الغلا للياس خلِّيتيه
خطاك هو اللِّي هيِّض اليوم مكاني وعطيب العرب مِ الناس شمَّتيه
فيا ونا مو هذا شي حسباني حاسب حْسابك ما خطا تاطيه
وبقي نين يعجز عَ الكلام لْساني بْفعلك اللِّي درتيه لكَّنتيه
ونا قبل نرضخ تحت نار حناني وْجميع ما تريدي فِ الحياة نلبِّيه
اسَّاع تندمي بكرة وْنا بركاني ينوض نين ما تلقي مْنين اتجيه
وْنقولك بلاك وبيك باني باني بيتي اللِّي بالزور طيِّحتيه
ماله افـــــــدا يا شــــــــوعة الخاطر اللِّي درتي لحوم ضْلوعه
نارك اللِّي يمسي عليه يوعى وجرحك اللِّي بيها تداوي فيه
وحامل علي شانك امرار اللَّوعة واللِّي تقهره وترضيبها ترضيه
حطِّيتي مْن ايدك في يدّ ياس اصروعه عنَك بعيد صحيح موَّحتيه
بلا أسباب شطَّبتي علي موضوعه علي قلب غافل غِرّ فاجيتيه
حتى إن كان كابر سايلات دْموعه علي ما جحد هيَّص خطاك عليه
واللِّي دردراته دايرك مشروعه ويحسابك علي واجد غرض تغنيه
وفيّ مْعَاك في أيَّامًا اتجي في طوعه وْوين ما تحطِّي خاطري تلقيه
مغير ويش تبِّي يعيِّشك دلوعة علي ارضاك يجنى في غضب ولديه
~~~~~~~~~~~~~~~~~~~~~~~~~~~~~~~~~~~~~~~~~~~