مقاعد اصحاب الصوب ,,,,

من طرف **زهرة اللوتس** 2010-11-13, 8:00 pm

مقاعد اصحاب الصوب ,,,

مقاعد أصحاب الصوب ...

فسحة في تراثنا الرائع ...

نصول ونجول

ونمتطي صهوة الكلام الطيب الممزوج بعرق الأجداد

نتجول معا ...

نتعمق في كل حرف وقصيدة ...

نترنع بين كل " غناوة وابنتها ... "

ننسجم مع كل حكاية قديمة

يا بوعقل ؟

للشاعر :عبدالنبي المغربي

يابوعقل نشكيلك ابدايا ... بالك راه تلقالي دوا

أبليت بجرح طبايا احذايا ... مغير بخيل مابي اعتنا

قهرني قهر قلل في هنايا ... خذيت الليل ساهر في الخلا

يوم انقول ما يبي غلايا ... ويوم انقول راضي بالغلا

او يوم ايهم يحكيلي حكاية ... او يقعد يوم ما كلمة حكا

ويوم حنون يسعى في ارضايا ... او يوم السو يشريلا شرا

ويابوعقل حيرني منايا ... ونا ولهان دايربي كدا

بالك راه في قلبه خفايا ... من يالاي لكن ما بدا

بديت امعاه حاكيته ابدايا ... ارضي بالقول دنقر في الوطا

او رد علي همدهن امعايا .... عيون اوساع مامنهن نجا

ابلطف اسلوب فيا قال رايا ... مغير عزيز يحسب في اشيا

عنده حق خايف من النهاية ... انه في الصوب ما ياجد زها

اوقال قريب تبقو م الغنايا ... غلا مرهون ماعمرا نما

ابقيت احذاه لمواقي روايا ... اتقول امطار تهذل م السما

امقوصر قيد و محودد هوايا ... و عارف قسم في غيره جرا

ويا بوعقل تشرح ف القضايا ... علي لصحاب ماعندك بطا

وهظا كل مو ساير معايا ... كيف أدير خايف م الخطا

من الأقوال الشعبية

إن كان قابلك عون ذري ... ما في المواناه خيره

وان ما قابلك عون خلي ... تبنه امغطي شعيره

اللي وين تشرق تناديه ... والريق عاقد امراره

إن كان جاك عريان كسيه ...وان جاع وكله م الغراره

ياعلم ... ياعلم ...!!!!

ومن جمال معاني غناوي العلم ،،

علي جفاي يجري لجل ... عارف عزيز روحا غاليه

مكن غلا فينا قبل .... وايعول ع الجفا ريت جارحي

علي جفاي ريت عزيز ... متعامي تعاميت ع الجفا

الله و النبي يا شوق .... ابهم تعال رانا نشغلو

لفراق صار قبل ايسير ... لولاف دنو بيني و بينهم

يخلف الله لنا عزم ... ننسوبا قديمين الغلا

الله الله نا وعزيز ... قاطعين قبل مشوار في الغلا

أيدك يا ميت

ثاريت الدنيا قلابا ... درت غلا موت في ترابه

عود غلاي بياس املقم ... لا مات ولا با يسقم

عزيز أقساما ريح خريف ... ايلطن ما تعرفهن كيف

ذهب شيرتنا مزن الصيف ... حرثنا نحسابوه خريف

كسرة ناب خطاهم دبر ... لا يداوا لا يجبر

هك وهك عزيز ميوحا ... لا نسينا لا ريح روحا

عزيز مجرحني تجريح ... انبهت في روحي ونطيح

خرافة من التراث

قامت بوضع الرحى فوق الرقعة التي عادة ما تصنع من جلد الماعز أو الخروف ... وتوضع تحت الرحى لتسقط عليه ذرات الدقيق

أخذت تطحن الحبوب وتنوي أن تصنع طعاماً للضيوف الذين نزلوا عليهم ... ولكنها تعرف شح و بخل زوجها

فهو لم يذبح ذبيحة ليكرمهم بها

فقالت : " يا راكبين السرية ... يافاهمين الكلامي ... را العيش صنعة ايديه ... اوليدام ما هو ايدامي ..."

والمعنى : أيها الفرسان انتم تعلمون أن المرآة لا تلام إلا على ما تقوم بأعداده من طعام ... أما نوع الإدام وهو ما يؤدم به الطعام فهو على الرجل ،،

فأن كان كريما فلابد أن يكون "مرق" لحم ... وان كان بخيلا فلا يكون إلا لبناً أو حساء .... فهي تبرئ نفسها من بخل الزوج وفي نفس الوقت تنبئهم بأن ينظروا كيف تصنع الطعام وكيف تتقنه ...

أسماء و أوصاف

الخيل :

من أسماء و أوصاف الذكور :

كوت ، جنحان ، قارح ، شعنان ، مضمار ، مكروم ، نقمار ، قنتير

الإبل :

من أسماء و أوصاف الذكور :

ثلب ، قلالي ، فاطر ، حاشي ، غديد ، دقيني

من الذاكرة الشعبية

دجاجة عميه ،،

لعبة يلعبها مجموعة من الأولاد و البنات ... حيث يختارون واحداً أو واحدةً من بينهم ويربطون له عينيه بمنديل ويبتعدون عنه قليلاً و يبدأون التصفيق له ويقولون : دجاجه عميه أهي جت ... ويقتربون منه ... ويقوم هو بمحاولة إمساك احدهم ... فإذا وقف فأن الذي يتم مسكه تربط عينيه ويفك الرباط من عيني الطفل الأول ... أما إذا لم يوفق في مسك احد

فأنه يظل للمرة الثانية ....... وهكذا ....

قول أجواد :

يا العقل دير حساب ...

ظلام القبور ...

وغيبة النور ...

ويوم النشور ...

واعبد المولى في هنا وسرور ...

حكمة غناوة

ما يدوم لا غلا عمر *** ما أيدوم غير مولاك واصبري

*************************
منقووووووول ،،