الثلاثية الليبية.

من طرف **dude333** 2012-04-26, 11:03 am

الثلاثية الليبية

ثلاثة يتمناهم الليبيين: السكن في طرابلس ... والعلاج في تونس ... والوصول لسن التقاعد.

ثلاثة ايحبونهن عويل الليبين : التنسريف فى الشوارع ...... معاكسة البنات ...... و الجل .

ثلاثة ايحبنهن بنات الليبين : كريمة فير اند لفلى ........ و بلوزات البدى ........ و التحرقيس .

ثلاثة ايحبوهن مشجعى النصر : كان خسرو ايسكرو الشارع ...... كان اربحو ايسكرو الشارع ....... كان تعادلو ايسكرو الشارع

ثلاثة ما تحلمش بيهم : السفر للسياحة ... وتصًيف مع عايلتك ... وكأس العالم في ليبيا.

ثلاثة صعب نتخلى عنها : الماء ... والهواء ... والبازين .

ثلاثة لازم نتخلى عليهن : التفنيص ... و التتنيح ... والبني خارج المخطط .

ثلاثة تسبب الإحباط : الواسطة ... و الديون ... والمنتخب الليبي .

ثلاثة يرفعوا الضغط : الملح ... وزحمة المرور ... والعيل كان عشش .

ثلاثة اينقصن الضغط : مدير محترم .... مرتبك ينزل يوم 26 فى الشهر ....... و شرطى ليبى ما ايفنصش

ثلاثة تسبب الغرور : الفيلا ... والهمر ... وبدلة الحرس البلدي .

ثلاثة مايحبوهمش الليبيين: التعليم ... و المصريين ... والشبشب المقلوب.

ثلاثة ما يرقدوش الليل : المديون ... و المرتشى... و اللى نايضة عليه السوسة .

ثلاثة شبه اختفوا من ليبيا : الدلاع الطويل ...واحترام الشياب ... و الجرد الجربى .

ثلاثة ما تحسش بطعمتهم الا في ليبيا : الشاهي الخضر... و الحسا بالقديد ...والبورديم .

ثلاثة تدعو لهم بالهداية : البلعوط ...و الحسدى ... واللي يشجع في نادي النصر

ثلاثة ما تستغربهمش في ليبيا : واحد قاص السريع على كرعية ... وواحد يسوق في الاتجاه المعاكس ... ومتعين وعمره عامين.

ثلاثة تتمنى ماتتصبحش فيهم : سواق قلع مستعجل ... وطابور الخبزة ... ومديرة المدرسة وفيدها عصا.

ثلاثة ما تعرفش أمتا تخشلهم : السجن ... والمستشفى ... ومكب القوى العاملة.

ثلاثة ما لهمش معنى إلا في ليبيا : القعمول ... والزميتة ... والعصبان .

ثلاثة ربي يفكك منهم : مجاري مفتوحة ... وكلب مطلوق ... و موس بوخوصة .

ثلاثة إيديرو فيهن الليبيين بس : الطلوع فى الأحمر... والتفال على رأس بمبلي الغاز ... و عزق عقاب لوكال من السيارة و هى تجرى

ثلاثة امدوخات صبايا الليبين : اللمات ....وغدا الجعة.......والغسالة كان اوقفت

ثلاث طوابير ايهمن الليبين : طابور المصرف اخر الشهر.... طابور الخبزة اخر الليل ... طابور البنزينة لول الصبح

ثلاثة طلعو من اجلهن الليبين يوم 17 فبراير : تحرير ليبيا تحرير ليبيا تحرير ليبيا