جبرنى على فك خيط الضميده

جبرنى على فك خيط الضميده/ الشاعر عبدالله بالروين



جبرنى على فك خيط الجباره..اصحاب الكباره..غابوا وياريت ماحد تواره
تربوا على عز ربة عصاره..قلوبهم وديده..عالقاصر وعالقاصره والقعيده
وهل الشيخ مايحيير صاحب ادباره..بحكمه رشيده..الحق حق لا ينقصه لا يزيده
وهل طفل يطمان يالاه جاره..سيرته حميده..واحد ارضى الناس وامه وسيده
عليهم حدر عينى اجاره..فى يوم عيده..تقول سيل جاء منحدر من هويده

جبرنى على فك خيط الجباير..الا شى ساير..وغيبة اللى ايدبروا بالدباير
شيالة نباء فوق نقب العشاير..اسياد الغديده..ركابة اللى انفز ديره ايحيده
متخلبص اتخلبيص مسدى الباير..الخاطر رصيده..عليهم ومالقيت حاجة اتفيده
الدايم الله يا انظاف الضماير..احكمهم سديده..الذاهب وبعقل كله اتصيده
بلاهم ابقى الغوض فالراى حاير..امعيشته زهيده..ايخمم مع شيل حمله ايكيده

جبرنى على فك خيط الضمايد..اسمح العوايد..اللى اصبحوا رقود تحت اللحايد
اسماح النقابات فوق الجوايد..شيالة قصيده..خشاشه اللى تم يقلى صهيده
عليهم وع الخيل وام الرفايد..مامن قصيده..قيلت اسنين كرب كانت شديده
نزالة عفاء فيه بارم الرايد..منية الجيده..شباب لسلسه شبك وهو والعضيده

جبرنى على فك خيط الجبيره..افواهق كبيره..من غيبة اللى هم عقول العشيره
اللى يعرفوا صح قيمة الجيره..ويبقوا رفيده..للطايح اللى خس ماله من ايده
عليهم مقاويل واجد كثيره..ذكراهم مجيده..الزاهق دراه كبد منه اتحيده
ركابة اللى وين ثابت ذخيره..مشوار ايزيده..ندواى سقط تحت من ريح صيده
اسرع من اللى وارده عالعقيره..قطايا فريده..ارماها احرار صيف معطس وميده
كسابة اللى فلفيافى خبيره..اسياد الكريده..بناية اللى سمح خايل نضيده
يسكنهم اللى نرتجوا باب خيره..افضاله عديده..مع ابرار فى كنف جنه سعيده