كلامي علي الاجوادواهل الجود .... اللي ذكرهم طيب عبير ورود

كلامي علي الاجوادواهل الجود .... اللي ذكرهم طيب عبير ورود

كلامي علي الاجواد .... اهل الكرم والضيف والميعاد
اللي صيتهم ساري في كل بلاد .... مشاهير عاطيهم اللي معبود
وكان جيتهم ايجيبوا اخيار الزاد .... بتواضع يقولوا الجود م الموجود

كلامي ع اهل الجوده .... اللي ذكرهم طيب عبير وروده
والاجواد وقت الحر زي البروده .... وهم الدفاء ساعة يسير برود
والاجواد كيف السيل فايض جودا .... عم ع الوطاء نبّت خضار وعود

كلامي ع اهل الضيفه .... الاكرام عاطيهم العالي صيفه
صفاوة النيه والافعال شريفه .... يعزوك لا علي مصلحه لاجهود
والاجواد رفقتهم نفوس عفيفه .... ولاكرمهم ينباع بالمقصود

قولي علي الاكرام .... الاجواد راهم فعل موش كلام
والاجواد عاطيهم الله مقام .... في الناس ديمه وجاه مش مردود
حيين علي طول المدى والايام .... حتى كان غطاهم تراب لحود

كلامي علي اهل الضايف .... اللي يكرموا ف الضيف واللي خايف
وفي ما مضى سكنوا نجوع ضفايف .... من البعد تاراها كما العنقود
والاجواد ديمه ف الزمان خلايف .... وف كل دهر تلقى فعلهم محمود

والاجواد كيف اليسر .... يجلو ع الخاطر هموم وعسر
والاجواد ديمه للمحبه جسر .... محال تلقى ف الاكرام حسود
والاجواد كيف الجبر بعد الكسر .... الله لاتغيبهم علي لوجود

الاجواد زي الصباح .... ساعة ظهور الفجر خطا لاح
وساعة بزوغ الشمس ف السماح .... تدير في شعاع يبان عمود
والاجواد للي قاصرين جناح .... عليهم ايغطوا خيرهم ممدود


الاجواد كيف النهر .... اعجوبة الدنيا ف كل يوم وشهر
حيه علي طول المدى والدهر .... قصة جبال وبر دار غرود

الاجواد راهم هلنا .... اللي يسكنوا ف ريفنا وجبلنا
وف مدننا وجنوبنا وساحلنا .... من غربنا والشرق ليا الحدود
ومهما كتبنا وشعرنا سجلنا .... شوي ف حق افعالهم محدود

تسلم اخى عبدالحفيظ