النقاش حول الظواهر الاجتماعية

من طرف **STAR** 2010-06-15, 12:27 pm

من اجل المشاركة فى النقاش حول الظواهر الاجتماعية
ومحاولة ايجاد بعض الحلول للقضاء على الظواهر الاجتماعية الهدامة

( الزوجة ) كى اصبحت يا حاج

( الزوج ) صبحك عالخير

( الزوجة ) هيا ياحاج اشرب شاهيتك وسقد روحك

( الزوج ) خير إن شاء الله شنو فيه

( الزوجة ) بيش اتعدى للبنك واطلع افلوس

( الزوج ) عليش مستعجلة عالفلوس صبح يا فتاح
وبعدين المرتب مازال ما نزل

( الزوجة ) انسيت ما قتلكش راهو لمة عيت عمى
بكرة

( الزوج ) وان كان لمتم بكرة ايش دخل لفلوس

( الزوجة ) ان شاء الله تبينى نمشى من غير دبش جديد

( الزوج ) دبش ايش دوته مانك شريتى لبسة
حقها 350 دينار ينطح دينار

( الزوجة ) هذك موضتها طاحت وكل الناس
وصحباتى حقنها علي

( الزوج ) إن شألله 350 دينار راحت علي

( الزوجة ) لاتعقد ولا تزعل توا نعطيها لجارتنا الدلالة
بيش اتبيعها فى سوق الصبايا

( الزوج ) ما تنسيش هالبسة راهى ما زالت دين
علي اكتوفى

( الزوجة ) ديما من دون الصبايا بختى بالهون حتى
فى لبستى

( الزوج ) ريتينى نابيدى حارم روحى من كل حاجة
بيش انكمل بنبة هالحوش

( الزوجة ) لعند امتى نقعدوا على هالحال لا ذهب ولا
لبس كيف باقى الصبايا

( الزوج ) اصبرى الصبر مفتاح الفرج وايفرجها الله

( الزوجة ) معنى كلامك هذا تبينى نمشى انخش اللمة
من غير دبش جديد

( الزوج ) احمدى الله واشكريه وخليك من الصبايا
اللي ما يفكرن غير فى اللبس والذهب

( الزوجة ) الحمد والشكر لك ياربى وعطينا الصحة
والعافية وارزقنا بقرش الحلال

( الزوج ) هكى نبيك تكونى واعية وتبعدى عن العادات الضارة

////////////////////////////////////////////////////////
هذا للنقاش وكل واحد يعطينا رأية بصراحة

وتذكروا ان حرية الكلمة هي المقدمه الاولى للديمقراطيه