الناااس ياقديم الصوب

من طرف الفراشه 2011-01-11, 3:31 pm

يحسابوني=مرايف وكي تخطر تشيل غبوني
الناس يا قديم الصوب
هم يحسابو=مازلتلك عاشق حكاوي جابو
هم في كلامي واهمين وخابو=خياب ضنهم نا قلت ما فهموني
ليش يا قديمي زولنا ماسابو=وهم خربوا اللي بينا وقهروني
وليش يا قديمي فيك ديمه يحابو=وكي قاصدين بلومهم يرموني
وليش يا قديمي في غلانا عابو=ايام كنت زاهي بيك ما هنوني
وليش يا قديمي حاقدين أصابو=قدامنا بنجيك ما خلوني
وليش يا قديمي عالخطا نزّابو=كي تريدني وانا نريدك كوني
وليش يا قديمي في الاقسام نهابو=ضحيت دونك ما اتضحي دوني!
وليش يا قديمي اليوم عنك تابو=الخاطر وعقلي كي زهن عيوني
علي خطّروك الناس وين تكابو=علي دارنا هذيك كي شالوني
الا انا انسيتك!..يفهموها مابو=منك خبر خايب وبيه يجوني!
مازلتلي عاشق خطو ما صابو=نا عارفك كيفي انسيت جنوني
نا الحق مستغرب!..عليش ينابو=دوم في بعضهم كان هم شافوني
خليتهم من القهر هاهم شابو=ولا همني حتى وفيك رزوني

يحسابوني=مرايف وكي تخطر تشيل غبوني
الناس يا قديم الصوب
الحق غريبه=شي حاسبينه هالعقول عطيبه
وين قلت نا نسيتك لفتهم ريبه=ونا الحق ما نبي اللي رخيوني
هذا نصيبي!!..لكل حي نصيبه=الا عقل خايب كي خياب ضنوني
وين قبل درتك يا مناي حبيبه=صدقت قولك كي حلفتي تصوني
جوك طامعين لصوبنا تخريبه=وأنا حلفتلهم علي ما تهوني
حسو قداك معاي بانت عيبه=جوك شايلين الشر به نعتوني
واني بري منّه براءة ذيبه=يوسف ونا صافي مصفي ديوني
هاللي حصلي يا القديم عجيبه=وأنا معاكم دوم راقد عوني
كذا خبري هالناس يا الطبيبه=وقوليلهم تايب علي فكوني
يعلم النهبه اللي حصل تسييبه=ونا بعزم عقال العرب يطروني
يحسابوني=مرايف وكي تخطر تشيل غبوني
الناس يا قديم الصوب