بقى مالك منظر يابيت...

بقى مالك منظر يابيت للشاعر مسعود بن مصباح

بقى مالك منظر يابيت_خلاص اغبيت_بعد بين السيسان ابنيت
انت عزك في وادي بي..امبجد مابين علاويه
في هالبساط الفوقي..رواوص وزمام وبحريه
وتامت وازكير والغبي..وسترا والطوق وغربيه
وزمزم لافوق اترقي..ويادس لوهام جلاويه
وعنتر واللوح الغربي..وفي سوف الجين وشرقيه
تظل لبل تفلى وتجي..تحوش انصاف الليل عليه
جملها يتكمر طاني..يسوط والراس معليه
تقول شايب راسه مكسي..رمى عالعرنين رغاويه
منين يزوم يدير دوي..رعد والبارق يشلا فيه
منزال والمزنة مالي..بدي اللي غابط يغبط فيه
يقول على الكمكوم يجي..يسيل عاليه وواطيه
المصنع وشضافي يخلي..وديل ميراد مرقيه
وطيسة وهام الحاشي..عدفرامي فوق جلاهيه
وقرزة والشلخة تجري..ووليا والرال مواتيه
ومجدول وهالعلاوي..الغافس والدور محاديه
ويظل مزهزه وادي بي..اشقاره ومرارة ماليه
يظل فيه نجوع مسادي..بهن رديت..الماضي دكريات نسيت


حرام مالك منظر يابيت..خلاص اغبيت..بعد بين السيسان ابنيت
وانت عزك وايام العز..امبجد في وديان اسماح
بعيد عن الشط امكرز..امعنقر في الوشكة ومراح
ويقابل يافيك ركايز..الخاطر لاشافك يرتاح
عليك يرامي مايلتز..طعامك للجايع فواح
احداك كحيلي وين يفز..نعاله مايقعد مفتاح
على عيل صيته بارز..مجهز بحلاطه وسلاح
وديما للبادي يحايز..وماهو شنبال وقوقاح
ولد ناس اتخلط وتحز..وديما للشارق مرواح
عرب شايب رايه بارز..مجرب قاسي كي الفنطاح
وعمره قلبه مايدرز..على مايقطع من ضحضاح
ايلمد في الجيران يفز..وديما للحولي ذباح
ولاهان بلاده بالرز..ولاطلين من الاول طاح
فبيته وكحيله مافز..دخل هالبساطات ضراح
واليوم هانك يابيت اتحز..على حيط امرشق بالواح
املفق بالتل امخرز..ولامقدم فيك ولاسناح
ولابرمن فيك عزايز..وليهن صيت..ليام ايعلنك وعليت

بدي مالك منظر يابيت..خلاص اغبيت..بعد بين السيسان ابنيت
انت عزك فسنين ربيع..امبجد والفلجان اجدد
طرايق سمحات مقاليع..كحالك وين يبان اسود
امفرش ومنوع تنويع..مرقم وحمولة ووسد
يقابل يافيك رقاقيع..مطرز ومنزل باليد
سريع البنية والتقليع..لياكانه مرحوله مد
بنوك في فج يبان وسيع..يقابل فصقيه السد
كحيلة في الهود لها تبرتيع..من السيح لياراس نفد
جملها يمشي بتدعديع..خبط في مارس بعد انهد
وحيرانه يدير تبرطيع..يجولن ويولن للرد
وترفاس يدير فقاقيع..يكيد اللي فيه يلمد
عشب داير غير مقاطيع..الوانه كل اصناف تعد
وتبدى في الهود مزاريع..هنية ماتخافي من حد
اسياادك ملتمين جميع..وديما شدادين الرد
فبيوت تقول مرابيع..خيار الضايف كان قصد
لحمهم مايعرف تقطيع..معرم عالقصعه يمتد
اووين نجبد هالمواضيع..تقول سهيت..تهيالي فحلمة فزيت
بقى مالك منظر يابيت..خلاص افنيت..بعد بين السيسان ابنيت

وجودك مابين السيسان..امهبي غير كيف القزون
ارمامك ماخشن قطران..املصق ومعقد بلهون
ولاجازل ولاليه مكان..الكربة فلقه من قيطون
ايام زمان كان عندك شان..امعنقر في ردة ميمون
عليك كحيلة هي والضان..يحوشن والراعي ممنون
ووسطك من داخل مليان..زقايب من ودان اعقون
غراير صنعها النسوان..امتان عراهن ليك يكون
مطاميرك في كل مكان..شعيرك في العقلة مخزون
وقدامك مربوط حصان..ايتل في الرسوة مزبون
ايام منازلنا فرقان.ابهن مريت.الهن غير الوكار لقيت
الله دايم ياايام زمان..ابهن خفيت..واني ماني بكاي بكيت
ابقى مالك منظر يابيت..خلاص اغبيت..بعد بين السيسان ابنيت

شكرا اختى على طرحك الرائع ونقلك المميز

مشكور ياغالي على التشجيع المستمر