احلى مدينة ....طرابلس .....للشاعر : محمد المغبوب

من طرف القديسة 2011-12-21, 4:07 am

زي الورد في جنانا

و شروق الشمس في نهارنا

و الشفق وقت المساء

والقمر في حضن السماء

حلوة طرابلس

زي حرير كلامنا على لسانا

وتغريد الطيور في جيها ورواحها وعطر ورودها

وصحو جوها وأمواج بحرها على شطها

لما تعزف مع ريحها أنغامها

تقولي ليلة فرح فيها قلوبنا تهز شوقنا

والنشوى في روسنا مشعشعة

وبهجتنا قنديل يضوى ليلنا وأعمارنا تطوال بالمحبة دايمة

لأن الرحمان سبحانه من نوره صاغها في قالب من ذهب

طرابلس يا ضي عيني

منارة على بيتنا زي القمر تهل

تشع النور في أركانها وبكل ألوان الطيف

ترسم آمالي كبير ة ، وحالمة وخط واضح للضدين

يلتقوا عالشط بر ، وبحر ، وموانسة وحنين قديم

وحتى لو كان الوقت صيف ينزل المطر من سحابها

لأنها مدينة ديارها بالخير عامرة

فاتحة أيديها لناسها ولو كان ما تعرفي

انشدي بنت الغزالة في ميدانها تخبرك وقت العشية كيف تكون

كيف زحمة فرح تملأ شوارعها وخطوات متواعدة بين أحبابها

شباب يديدشو في أحلامهم وصبايا زي العسل

لما أقدامهم تمس قطرانها يطق القلب وألف باب للمحبة ينفتح

مع السعد ضاربين الموعد على الكورنيش

وهلبة أماني في المكنون ساكنه وتبان للمقـصود

في وردة حمرا كلمة غزل بهمس الروح رعشة خفيفة في لمسة يد

نظرة ، العين بيها تبوح وتوضح معانيها

طرابلس صورة جميلة ساحرة

بفجرها وقت ما تشقشق زرازيرها تصحي الشمس من نومها بشويش

ويطلع صبحها ولهان مبتسم لناسها كبارها وصغارها

طربان بغناوي بحارة صناديد طالعين بحورية بحر نشوانة

تتنطنقش وحدة ، وحدة مع الأمواج وتردد صدى ألحان طرابلسية

يالال يالال يا لالالي

شعشع ربيع العمر في وجداني

وأجمل الوردات في زماني تفتحت

احلى مدينة ....طرابلس .....للشاعر : محمد المغبوب D8a5d8b7d8b1d8a7d8a8d984d8b3d98ad8a9-d981d98a-d8add988d8b4-d8b9d8b1d8a8d98a-300x293

انقولك حاجة يا أحسن حاجة

هي مش حلوة وبس طرابلس هي بعضها على بعضها

كلها حلاوة وسكرها زيادة في قهوتي وقت المساء

لما المزاج بيها يروق ونمد النظر لبعيد

نلمح بنت طرابلسية زي النوارة في جنانا

كيف الريم تتهادى وتتزعبن في مشيتها

تشوف لظلها قدامها وكل متقرب

تزيد دقات قلبي وليها نفز

ونظراتنا تتلاقى تحضن بعضها في رمشة عين

وبعدها تتواطى عفة وزيادة حياء

هي نصفي الثاني وطيفها في أحلامي

تتمرجح بين اهداب العين

ومقامها في العالي بين القمر ، والنجمات

وكل أشعاري فيها

دوم ساكنة وجداني وصمتها في مسمعي احلى الكلام

وكل شيء فيها حلو يذهل عيون البشر حتى انتظاري ليها

وموعدي اللي معاها قرب

علم وزين ورضاية الولدين

اللهم صلي عالنبي عليها

مية في المية طرابلسية

عطرها يرد الروح وتخلي خريف العمر ربيع

طرابلس حبي الثاني مهجتي وبنات أفكاري

ولو في يوم تهتي عليها بين القلم ، وورقتي تلقيها

عروس البحر بالكلام راسمها

حاضنة الفرح لعرسانها

قناديلها في ايدين الصبايا تقيد

وألف زغرودة تعم الكون

حضاري ونوبات للمالوف

وقلوبنا تدق دفوفها

جاوي وقماري وبخور في العالي

وعقـود المحلب في النفـوس تفوح

تهاليل ، ومواويل ودربوكة رابخه

ونجمة بالبهجة ضاوية في ليلة خميس

في ليلة خميس

نتذكر ليلة عمر من هالعمر

رد وبرق ومطر وزحمة أحباب

فيها الأمل واقف عند الباب

نقول في نفسي

ما زال ما بين الجوانح حلم

يكبر في المشيات ، والجيات

وبين الميادين وزناقيها

وبين خطاوي العاشقـين في دروب الهوى

مازال العمر قدامى نكبر وطرابلس ديمة شباب

طرابلس مدينة نهارها صاحي وليلها سهران فيها

كراريس للعرسان مراكب خير نوارس بحرها

أذان مأذنها أصوات سكانها دقات ساعاتها

كل شي فيها حي

فيها الصبح للرزق دوار والقايلة لمة عيلة دافية

بكلمات صافية تجر خطواتها بهداوة

وفيه المساء زاهي يراقص في النسمات

والليل فاتح طريق السهر ليها

والأحلام عا لناصية تراجي فينا

وبين الصبا ، والسيكا معزوفة بوزن جديد تغنينا

عن شوقنا أمالنا وغاياتنا الجميلة

أسعد أمنياتنا وفي كل يوم من أوله

ترفرف عصافيرها وتزقزق تصبح عليها بنور

وتحكي لينا قصة مدينة في التاريخ حاضرة

بأرضها وعمرانها ومجدها بكفاحها

ودم تريسها اللي ما راح هدر

اللي روى ترابها ونبت زرعها

شعيرها قمحها زيتونها ونخيلها الشامخ

عنوان جهاد رجالها

اللي ما تراجعو ما دلو ما تخادلو

ولا علي قسمة بيناتهم تعاركو

القلب على القلب واليد في اليد

وبحروف من نور كتبو ملحمة عشقهم فيها في لحظة

من ليليلها نعيش خيرها وكل يابس فيها اخضر

ياعمري عندي لطرابلس هوى وسجل حبي ليها ما ينطوي

وبين كل عشية وليلها ينبت في القلب حبها من جديد

ولو يمه ما حَستّ بيّ ونكرت حبها علىّ

يكفي أني حبيتها بجنون وحاطها في صبي العين

مدينتي اللي أجدودي دفعو مهر حبها دم في الشط والهاني والكردون

وعمرو سوانيها وبالمحبة سقـووها

مش أنتِ وبوي

يد بيد أغرستو أشجارها وزرعتو نوارها

وبسماتها على وجهي وحبي الكبير ليها

طرابلس ذكرياتنا فيها تصاوير بكل ألوان متشكلة

احلى مدينة ....طرابلس .....للشاعر : محمد المغبوب D985d8a7-d8a3d8add984d8a7d987d8a7-d984d8a8d8b3d8a9-d8a7d984d981d8b1d8a7d8b4d98ad8a9-300x284

في حوشنا وفي زنقـتي مع صحابي وفي الميدان

في الكِتاب وفي مدرستي وأول دغدغة لعواطفي

تتفكري في المولد والبغدادي

وصوت الطبل والغيطة في نوبة مالوف

والخمرة الفايحة ولبسي الجديد ولمتنا الحلوة عالقـنديل

وزغاريد في عاشورا وشيشباني ياباني

والبسمة اللي على وجوهنا في راس العام

وعيدنا السعيد بفرحنا بيه وبيها

وتذكري لعبنا وابيسنا وزرابيطنا

ووين حوش البوسعدية وعروسة وعريس

وصيفنا على شطها وشتانا ودفئنا بعيلتنا وحكايات حناتنا

عن بوزيد وسالم وجساس وبن شداد

وفنارنا ضاوي علينا بنور بلادنا

أكيد ماكش ناسية ود جيرانا وعز ديارهم

وكلمة كبيرنا اللي عالكل وديمه فوق

وحاجات كثير في بالنا ماتنتسى

حلم كان يكبر في قلوبنا خربشات على حيطانها رسمتها عقولنا

طواوير من الورق في الهواء نطيرها

رافعة شوقنا ليها واللي في بالنا

واحنا بين جنباتها دراجيح انمرجحها بهداوة

ومن خوفنا عليها بحزام المدي نشدها لينا

ونحطها قدامنا نمشط بجواجينا جدايل شعرها

وبمرود جلاللها وهيبتها العالية

نكحل عيونها وبثوب الفرح نكسيها

أصلها من يومها أميرة فيها السماحة ومنها ومش غريبة عليها

وتتفكري في شقـاوتي ولعبي في السانية اللي مخضبة بنعناع وعطر وزهر ليمنا

وخوخ وكرم ولوز تلاعب الريح أغصانه

ورمان فاتح للنهار شباكه

وتفاح لونه علي خدود نساوينها مختوم

وساقية جارية رقراقة

وبوي زي الصقر قاشط حزامه مع بوه وخوته وأمه وأعمامه

ينقش لوحاته بعرقه وبلون أخضر

وعلى أشجارنا زرازيرنا ترفرف في جناحاتها

وتغرد بلحن جديد

والخطيفة المحنية صوابعها طايرة في سمانا

زي أطوير جنة هايم يوم العيد

البال رايق والمزاج عال العال

والخواطر راضية يومنا فرحان وليلنا حكايات ما تكملش

في سهرة شملنا ملتم ونجوم السعد في سمانا نايرة

وكلامنا همس في همس والشمس في حضن البحر ناعسة

وموال الحب تردده الأيام

وعطر نساوينا قدام المرايا يبان

وكلامهم يدوب ينسمع باحساس يقـطر عسل

يخلي الخواطر بالمحبة هايجة

وأحلامنا في منامنا نشوانة في طريق محفـوف بحوريات

تختال في مشيتها تدندن بأنغامنا

وتردد غناوي شوق وغية وعشق قديم

ويجي في بالنا كل شيء غير فراق طرابلس والبعاد عليها

مش ممكن أبداً في عمرنا ما يصير ويستحيل هجرها

وهي في القلب ساكنة وحبها دم يجري في الشريان

أحلى مدينة

عنوان بلادنا

ليبيا أكاكوس غدامس وحضارات فيها تشكلت

ليبيا عشنا ومركبنا وعزنا مجداف وبساطنا الطاير بعون الله

سفرنا وترحالنا البحر والمرسى السكة والقطار و المحطة

أمسنا ويومنا واللي بعده جاي

طرابلس يا أعز الناس اللي رضعتيني حبها وربتيني على عشقها

وعلمتيني من أول صرختي في الدنيا كيف انحبها بإحساس

وكيف في قلبي انصونها ونحفظ عهدها

وكيف أمتى نقول نعم وأمتى نقول لا

هي كل انشغالي وفكري

وهي عندي أغلى من الذهب والماس

هي الندى عالورد وهدية المحبوب للمحبوب

خواطر جميلة صورة بهلبه ألوان مترتبة

أطياف متشكلة أبصر كيـف

حزمة ود

كتلة فرح شحنة عواطف هايجة

وبركان وجد ديمه ثائر

فكرة متجددة طريق للسفر

والعودة قمر ثاني لون ثامن في رسمتي

قنديل بهجتنا أم بلادنا

نسمة ربيع في وقت الصيف منديل يمسح دموع الفرح

وأروع ذكرياتنا في أحضانها ننسى أتعابنا

وأحزانا في حضرتها تمشي بعيد

ما فيش غير الأمل حولها وبين ايديها

شمسنا الدافية هلال عيدنا قمرنا الوناس

قافلة سايرة والله حارسها

قداش يد امتدت ليها وكم من سكين حاول ذبحها

ورياح هوجة وكافرة بتنزعها

ماحنت راسها ما تواطى مقامها

ولا شراع مركبها تمزق

صامدة وخالق الأطيار ناصرها وأكبر مثل لغيرها من الأوطان

أرضها خضراء ودوم سحابها ماطر

كبيرة وكل شروق تكبر والخير فيها زايد

زينة والزين منها وفيها سبحان ربنا الرحمان كيف صورها

وسبحان كيف زيها ما خلق.

انحبك يا أم السرايا العالية

يا مراية يومنا يا بلسم شفي جروحنا يا جسدنا ويا روحنا

من طرف **العاشق الصغير** 2012-02-24, 4:12 pm

احلى مدينة ....طرابلس .....للشاعر : محمد المغبوب

احلى مدينة ....طرابلس .....للشاعر : محمد المغبوب

رد: احلى مدينة ....طرابلس .....للشاعر : محمد المغبوب