معتبراً أن رحيله كارثة..عبدالجليل يؤكد أن بقاءه في منصبه مهم

اعتبر رئيس المجلس الوطني الانتقالي مصطفى عبد الجليل أنَّ رحيله اليوم عن المشهد الليبي “ربما سيؤدي بالوطن إلى كارثة” موضحا في الوقت نفسه “أنه إذا طلب نصف الليبيين أو أكثر رحيله فسوف يرحل، مؤكداً أنه ليس حريصاً على المنصب ويعلم أن رحيله ربما يؤدي لكارثة وأن بقاءه مهمة وطنية قبل كل شيء.

وقال عبدالجليل خلال مقابلة مع قناة العربية، إن الدعوات والمظاهرات المطالبة برحيله والتي شهدتها بعض المناطق في ليبيا مثل بنغازي هي تعبير عن الديمقراطية.

وأضاف “هناك من هم على علاقة بالساعدي القذافي ويحاولون دس الدسائس في ليبيا ويحاولون زرع الانقسامات داخل المجتمع الليبي”، مؤكداً: “لدينا ما يثبت بأن هناك من يتلقى أوامره من الساعدي القذافي”.

من قالك ارحل نبوك بس احكيلنا ورينا ناقشنا فهمنا شنو صاير
نبوك امعانا موش احذنا
نبوك مع الجيش موش مع المليشيات
نبوك في الشارع موش في الفنادق
نبوك واضح موش كل يوم اتقول كلمه وثاني يوم تطلع اتقول عكسها
نبوك مع الشرطه موش مع الامن الوقائي
نبوك مع الشرفاء موش مع القتله والسراقة
نبوك تتقي الله فينا وفي الامانه الي سلمناها لك

يعنى على اساس يامحمد اللافى لو سيبنا عبدالجليل بنضيعووووا

لاوراسه الشعب الليبى فطن لمصلحته كويس عاجبه يبى يمسكنا صاح ويحول القطن لى حاطه له غوقه فى وذانه تمام مش عاجبه يربح ويخلي ليبيا فى حالها

لا شموخ موش هضا قصدي انا قصدي لو كان يتقي الله فينا ويخاف علي البلاد والعباد علي عينا وراسنا سواء مصطفي او اي ليبي ثاني
موش قصدي تحديد شخص بعينه

لاعليك محمد فهمتـــــــــــــــــــــــــــك

ومشكور لتفاعلك معى فى مايخص بلادنا الغاليه

لا ايها الرجل الفاضل ليبيا في حاجة اليك الان اكثر من اي وقت مضى انك اول الثوار وخسي من يطلب منك الرحيل

انا مع المستشار فى كل كلامه وهناك الكثير من الامور سوف تخرج عاجلا او اجلا ..ومن ينكر ان هناك ازلام للقذافى غرضهم ان تكون البلد غير امنه... ولانملك الا ان نقول حسبى الله ونعم الوكيل فى كل من يتاجر فى هذا الوطن ودماء الليبيين ...ويجعل الله كيدهم فى نحرهم ...

مشكوووووووووووورين للاطلاع وانحب انقوللكم ليبيا بعد 17 فبراير لن تتوقف على شخص واحد

ليبيا محتاجه لك ولها وليا وكل واحد فينا

اللى ايدير ثوب مايقطعش كمه يابوجليل...خليك نين تستقر الامور وبعدين الحريه للشعب الليبى ايقولك اقعد ولا حيد ...اما مندسين يرشى فيهم الساعدى ودايرين اررواحهم مع الثوار ....هذه حقيقه يجب ان يعلمها الجميع ..ولا ننجر وراء هؤلاء الذين لايعنيهم دم شهدائنا الابرار...وارجو الا نكون كالقطط ناكل ونحن نيام...الله المستعان

بالله عليكم ياشباب ردوا بالكم واصحوا وخلوا عيونكم مفتوحة وعقولكم شغالة ازلام الطاغية والساعدي البنية مع احترامي للبنات مصلحتهم دمار ليبيا وافشال ثورة 17 فبراير لذلك تجدهم ولايترددون عن تمرير الاشاعات وثارة الفتنة والتشكيك في الحكومة الانتقالية والمجلس الانتقالي نحن لسنا اغبياء ونستطيع ان نميز ونفرق بين من يعمل لصالح الثورة ومن يعمل ضدها لذلك يجب ان نضيح عليهم الفرصة ولاندعهم يعودوا للحكم ويعود معمر القذافي لحكم ليبيا من قبره المجهول
عاشت ليبيا حرة مستقلة وعاش ابناءها وثوارها احرار

والله والله والله ماعندنا اي مشكلة ولا علينا اي تأثير بس ليش المجلس ايجيب في الكلام لروحه ويخلي الطحالب وازلام النظام يستغلو في الفرصه
انا لو قالي سيف الاسلام ابروحه ليش مافيش دعم للجيش والامن لعند توا ايش نبي انقوله
انقولة والله مصطفي عبدالجليل موش فاضي للجيش ويدعم ويجتمع مع قيادات الكتائب الي مايبن ينظمن للجيش انقولة الجيش لهم ثلاث شهور ماعندش مرتبات والمليشيات يداورو في مفاخر الارض واللبوات وعندهم دعم مادي غير عادي
انقوله الفساد طغا علي المجلس ومصطفي عبدالجليل ابروحه قالها ومافيش حد دار حاجه انقولة يا سيف جماعتك ماسكين البلاد كلهم وقريب ايردوك رئيس علينا
يا خوي والله ما عندنا مشكله مع مصطفي ولا نبو كراسي ولا في حد اثر علينا بس خلاص تما شعير بوجه ونبو مصطفي عبد الجليل ايورينا ويفهمنا ولو في حد ضاغط علية ايقولها بس والله كيف ما صبينا امعاه في الاول والله امعاه في التالي

مشكووووووووور للتفاعل البناء اخى الكريم ليبى

يا شموخ ...

على مهلك على هذا الرجل ..لقد التحم بالثورة في وقت كان فيه

القذافي على بعد أمتر من بيوتنا في شرق ليبيا ...

فلماذا هذا التنكر لدى البعض رغم أنني لست مع التأليه لأي أحد

لكن الشعوب تضل طوال تاريخها تذكر مفاخر رجالها ونسائها الذين

قدموا لها وقت الحاجة أنفسهم دون أي انتظار لمقابل كما يفعل البعض

ممن يركبون موجة الثورة ويدّعون قيادتها ....

هذا الرجل وغيره سيقودون المرحلة لأشهر وبعدها دونكم بوجناح يطير

وبو شعبية ينجح في الإنتخابات ...

وأنا أيضا مع السيد اللافي في كل تصريحاته هنا ...

شكرا يا شموخ

والله يا خوي شعيب مافيش حد فينا مختلف مع الثاني لان لو اتلاحظ ان ولله الحمد كل الاعظاء يبو مصلحة ليبيا بس كل حد فينا من منظورة وهذي فايدة اكثر ماهي مظرة لان كل حد ايبين امور ممكن اتكون مجهولة للثاني
لو اتلاحظ لو ينزل خبر مفرح علي الامن او الجيش او المصارف او الصحه كيف الناس اتفاعل امعاه وتفرح وتشكر الله ويشكرو المجلس هضا اكبر دليل علي ان مافيش مشكلة مع شخص معين او طمع في كرسي او سلطه والعياذ بالله بالعكس نحن محتاجين قيادة وتوجية وضمير

راقي دائما دون حاجة لشهادتي هذه يا بواللافي

دمت بخير ودامت ليبيا بخير

لك كل الاحترام والتقدير اخي شعيب
وعاشت ليبيا حرة مستقلة