قصيدة ( عزمت عيني ) للشاعر سيدي احمد قنانة

قصيدة ( عزمت عيني )
للشاعر سيدي احمد قنانة من واحة الزيغن بالجنوب الليبي فزان وقد لاقت رواجا وقبولا وتناقلتها الأجيال

عزمت عيني عزمها سادبهــا
رفيع شوفها تظهر علي منسبـها

عزمهــا بالنيــه
وصـبرت عـلي فـرقـا العـزيز عـلــيّا
واللي قرض ما نال غير السيه
ونال الحشومه وزينته خـربـهـا
ابنادم ليّا دار الخطــا بالنيه
يدور اديار السلطنه يخنبــهـا

عزمها بالمـاضـي
وعلّي جفـانـى مـا تـرق غـراضــى
لو كان يبدن طايلات امراضي
ولطباب عنده امفات هو كاسبهـا
نحرم ربيعـه فوق بيـه انشـاظي
ولا نالـف السيّة ولا نقربهـا

عزمهــا تعـزيمـه
وصبرت علـي فرقـا الغـوالي ديمــه
الكحل حجره واللين تسقيمـه
وبلا لـين حتـى العين ما يركبها
وروس العرب في العرف ماى غشيمه
تداري على سب القفا جانبها

عزمها من يمـه
رفيــع شوفهـا ماهي قليـلـة هـمــــه
ودك بنادم بالوتـــا يسمه
يداوس اديار الصح ويحاسبــهـا
كم صف راح اشتات بعد اللمه
وكم من عرب هبيت وضاع سببها

عزمهـــا يـا ودي
ومن وسط قلبي وخاطري ومن جـدي
ويا من بلاني بشي ما هو عندي
إن ترميـه في سامر كثير حطبهــــا
ويوم يرحل ساكن البيت يعدي
كان عشت بنسقط عليه كربهـا

عزمهـا حقـاني
وشهــدتهـا عالســر والبرانــــي
وعندي لها لولب بغير بيانـي
برم في المدينـة العاصيـة طيبهـا
يا بال من دز النذيـر وجاني
وقد من طرا حجـة على كذبـها

عزمهـا بشطــاره
وصبرت على فرقا العـزيـز وجــاره
ونا صاحبي عندي معاه ادباره
علي ساهله وعند العرب ما اصعبها

عزمهـــا بقرابــــه
وصبرت على فرقا عزيز وجابـه
ان كان جيت في كسر الحرم ما تابه
ونا زاد عالفراق ما نغصبها