اكبرنا تمينا شياب .. وعقلي تاب .. علي غيت مجلي الانياب

من طرف **العاشق الصغير** 2012-07-10, 2:03 am

ناسبة هذه القصيدة عندما تقدمت السن بالشاعرين المرحوم غالب بو امطير والشاعر عقوب الشرمي أطال الله في عمره ووصلوا إلي سن الخمسين وأصبحوا (كبار) على الحب ومغازلة الفتيات كسابق عهدهم وأصبح فارق العمر كبير بينهم والفتيات اللاتي في سن بناتهم.

قال الشاعر المرحوم غالب بو امطير
اكبرنا تمينا شياب .. وعقلي تاب .. علي غيت مجلي الانياب
اكبرنا طقّر فينا شيب .. وتبقى عيب .. انجيبوا للغيات سريب
ابقي لنا لياس طبيب .. علاجه جاب .. نفع ماعد عندي شخشاب

فلما وصلت هذة الابيات الي الشاعر الكبير عقوب عبد الغني الشرمي قال

اكبرنا قولوا للزينين .. وتم ضنين .. اخطور غلا ضاوي الجبين
اللي عمره فوق الخمسين .. يقولوا عاب اندار مع وحده سلهاب
اصوله يبقى م العاقلين .. عليه احساب .. وماله ف الغيات مناب
اكبرنا بكفايه ماصار ..نسيت الكار .. وتميت رزين وصبار
انخطم بو دملج وسوار .. نرد الباب .. ونمسكلي سبحه وكتاب
خذينا ف الغيه مشوار .. معا لحباب .. نريدوا منهم رد اتعاب
اكبرنا وانسيت الغيات .. بعد شيبات .. نقيده كي نطري البنات
امعاهن مالي سهريات .. انريت شباب ..نطبس ونواطي لشناب
زمان الغيه راح وفات .. بقيت انهاب .. قساميي ف الزين اصعاب
كبرنا ماعد لنا فيه .. سريب الغيات انسيناه
الشايب مو امحلاك اوجيه .. انكان اغوي قدام ضناه
الناس اتقول عليه سفيه .. بعد كبرا ياحول الله
العاقل كيف الشيب ايجيه .. ايهوّد ويغير ممشاه
ولكن عقلي واحل فيه .. ايحوس عليا كي ننهاه
قديم الغيات امرديه .. امغير ايموج كابر داه
ايزازي من نار غواليه .. وجسمه ذاب .. اضايق مو طايق لثياب
اكبرنا ياخوتي بالحيل .. نسيت غلا ضاوي الجبين
نسيت غلا لاوي المنديل .. بعد غيات امعاه اسنين
نشد نحكيلك بالتفصيل .. علي غيت مكحول العين
غلاهم عندي له تسجيل .. اول عام اثنين وخمسين
انشد نحيلك بالتفصيل .. علي غيت ضاوي الجبين
تلاقينا من غير دليل .. نشدني قال لفيت منين
حصلي ف الراس اتبرجيل .. اكثر تفكيري والتخمين
وثاني يوم حصل تاويل .. توافقنا نحنا الاثنين
وتمينا كي المساطيل .. اغوينا والغاوي مسكين
بعد صارن هالمواويل .. برم لياس قليل الدين
اجرون غلانا جاهن سيل .. كنسهن ماعقب غمرين
بعد صابا هفنا م الكيل .. الله يجعلنا م الصابرين
مرادي حازوها العويل .. ونا تميت اتقول حزين
الغيات زها وتبهديل .. شقا وعذاب .. اخسارتن ساعة الحساب

فرد عليه الشاعر المرحوم غالب بوامطيروقال

اكبرنا قبل نريد نتوب .. لقيت عقوب .. جبد مدعا منقوش الثوب
اللي حبه ذوبني ذوب .. فتحلي باب .. انهان لنظار الخياب
الغالي دونه ياس نحوب .. وناقر باب .. انخطر ملقاهم ونهاب
عقوب شكالي عن مطراه .. وجر غلاه .. اللي صار وماتم وفاه
جحد ماصحت لمذاراه .. اسنين اصعاب .. قضاهن في مرجى غياب
قديم الغيه يخطر راه .. ابدون اسباب .. اللي يقول انسيته كذاب
اكبرنا عن غيات اليوم .. امغير الماضي ماننسوه
اعيون اللي ع الصيد ايحوم .. انروقوا وقتن مانطروه
انحنوله كيف المفطوم .. اللي عن ثدي امه اعزلوه
الغالي لباس المكعوم .. انموتوا موت وما ننسوه
عقوب ان كان شكا مظلوم .. ايشيلوا وزر اللي لاموه
يصهد لازاد ولانوم .. اللي راعوا حاله اقرضوه
سمّر ف الليل ايعد انجوم .. ويطلب في عون وفي بوه
يراجي في عداد اللوم . رجا ماجاب .. وهو دمعه نازل سكاب
أكبرنا تمينا شياب .. وعقلي تاب .. علي غيت مجلي الأنياب
م ن ق و ل