(قصائد من ذهب) تركناه حب الوطن

قصيدة ( تركناه حب الوطن ) للشاعر قنانه

تركناه حب الوطن نمشوا منّه
بلا مال لاهو فرض لاهو سنه

تركناه للفلاحه
وتركناه للى طالبين الراحه
وقولوا لبو سالف كما الدرجاحه
بلا مال حتى ريادنا عافنه

ترك البين
احنا وطنا ما هو علينا هين
وان لهموك الدين لا تدين
راهو عقاب الدين يبقى غنه

ترك الباين
احنا وطننا ما علينا هاين
وعلة محاريت الجمال دفاين
والفقر هو بخس الرجال نظنه

ترك البرمه
وطياح الورق يهزب غصان الكرمه
من السرج ليا عند الركاب الحرمه
ومن طاح يبقى فى المداس مدّنه
فى المداس مراغه
وروس العرب لبعاضها تصاغه
كمين عبد نازل فى منازل لاغا
وكم كرغلى من درجته واطنه
كم كرغلى من درجته منعوته
تواطى بدى قدر الوصيف يفوته
غلا الفحم رخص قيمة الياقوته
ولسعاد جلد الفارغه يملنه

ترك سياسه
ماهو جفا من وطننا ولا ناسه
مفات من تفاكير الزمان وباسه
وليام فى دولاتهن داسنا
فى دولاتهن ينداسن
عليّ صبحن ضيم الزمان وماسن
وسامع حجايج موجعه من ناسن
ما ينسكن حيط البلاد بهن
حيط البلاد الدارى
على ما جرالي هايضات افكارى
وكميان نار الموجعه فى اسرارى
صبغ كيف ما يصبغ غيار الحنه
كيف ما يصبغ مكرر غزله
وطشم كيف طشم الرزن فوق الهزله
وحمل السمينه ما تقله هزله
له لا يدنوها ولا تدنى
له لا يدنوها ولا هى تشيله
واسمع كلامى واعتنى فى قيله
رفعنا ورا ثقل الحميل عديله
واللى بدا بالموجعه نحسن له

تركناه للهمازه
تركناه وطن المرمده والعازه
لين نقطعوا رقراق دار نفازه
جنانيب لاهن شلبطه لا شنه

تركناه للفتفاته
تركناه للى يعرفوا معاناته
وصغر الكلام يولد اكباراته
وكبر الكلام يوحلك فى غنه

تركناه ترك اخلوقك
ومشيك مع اللى كارهين يعوقك
حديثك اليا ما حصله صندوقك
عليه لا تلوم الناس وقت تشنه

تركناه ترك الفكره
وترك العشيه والضحى والبكره
وكم طير جلاه الجفا من وكره
والقل هو عيب الرجال انظنه