المؤتمر الوطني يكلف الداخلية والدفاع بالقبض على قاتل شعبان

اللهم احفظ ليبيا من الفتن..

والمعتقلين من ورفلة في مصراتة شن صار فيهم

طبعا, هذه واضحة جدا لايختلف عليها اثنان ...فعلة أزلام المقبور

قصدك المجرمين من ورفلة شن صار فيهم لان مصراتة الرقى والحضارة والعدل والمساواة لا تعتقل الا مجرم

شوفو شن صار فى سجون بني وليد من تعذيب حتي بعد مقتل عمران شعبان حسبى الله ونعم الوكيل

شن صار يا حسين ؟

ارجو وقف الفتن والهمز واللمز ..
ارجو الرد في اطار الموضوع ولا داعي للدوران .
الشعب الليبي يعرف جيدا من وقف مع القذافي وزني واغتصب وسرق
ويعرف جيدا من كان السبب في وفاة 50 الف ليبي .
الامور واضحة ..
لولا مصراتة لانقسمت ليبيا شرق وغرب
لا ننكر الحقائق

الكابتن كتب: .
الامور واضحة ..
لولا مصراتة لانقسمت ليبيا شرق وغرب
لا ننكر الحقائق

لأتفق معك ... أخى الكريم الكابتن ... لولا أرادة الله ... ... هى التى أبقت هذا الوطن موحد ... ولك الشكر ...

لأتفق معك ... أخى الكريم الكابتن ... لولا أرادة الله ... ... هى التى أبقت هذا الوطن موحد ... ولك الشكر ...

أكيد ارادة الله فوق كل شئ .. وهي اول الامور

قصدك لولا جرافات عرب الشرق المعيبة سلاح - معاش حد يزايد على حد - قلنالكم ورفلة عرفت الطاغية طاغي ودكتاتوري قبلكم من 18 عام وانتم من اخرتونا كل هذه السنين للخلف ولولا تصفيقكم وهتافكم الذي من ضمنه مصراتة هي مصراتة تحمي الفاتح وانجازاته ولولا مخاطبكم للطاغية بقول بعض المناطق والقبائل اعطينا الاشارة يا قائد باش نمسحوا الخونة الجواسيس - في سنة 93 اتهموا ورفلة بالخيانة والتجسس لصالح فرنسا والان يتهمونهم بالازلام - وخليكم ثابتين على تسمية واحدة خير وياريت تبطلوا هالفتنة واطلعوا منها مصراتة - اني ساكنة فيها ولعلمكم عارفين ولدهم كيف مات ورجليه هي من جابته لورفلة مش ورفلة مشتلها لمصراتة-

وبلاش هالمزايدات الفاضية والهو بالبلي والفساد والمصائب اللي في ليبيا كل يوم تطربق من مكان -

ارجوكم ما فيش حد خير من حد ليبيا كلها شاركت

ما دام ورفلة عرفت الطاغية طا غية قبل18 السنة ليش غيرت رايها توا وقتلت من امسك بالطاغية والا يا اما اديروا انقلاب على معمر بروحكم وتحكموها انتم والا لا يعنى لما كانت ثورة شعب وخرتوا ياريت كنتم ثابتين والا انتم فى وادى والشعب فى وادى
رجليه هى جاباته لورفلة يعنى معاد حد يمشى لورفلى يعنى هى اصبحت تبع اسرائيل استفسار فقط !!
ليبيا على خير ما يرام وما فيهاش مصايب ولا بلى ولا فساد هده حقيقة يجب ان تصدوقوها

فعلاً ورفله ... هى أول من ثارت ونحن خذلنها ... والكل يشير إليها فى ذلك الوقت بالقبيلة الخائنه .... نشهد بالله أن هذا هو الصح ...

ثورة 17 فبراير ما هي الا امتداد لجذور انقلاب 93 الذي خسرت فيه ورفلة خيرة رجالها وعليك الرجوع للتاريخ يا سميرة - يبدو انك غير مطلعة - عليك متابعة وتسلسل الاحداث حتى تعطي كل ذي حقا حقه- رجال ورفلة شنقوا في رمضان الكريم ولا من حرك ساكنا لا انت ولا غيرك - ولا حتى شخص طلع حتى مظاهرة بل هتفوا له واستقبلوه واستدعوه لزيارتهم حتى يقدموا له الولاء والطاعة - ونحن كنا نطمح ان يقوم الشعب ويقول كلمته ويشاركنا راينا بل احزاننا - هجرت عائلات وهدمت بيوت وحرم ابناؤهم من العمل بالدولة - وينك يا سميرة هضاك الوقت - حتى كان كنا صغيرين لكن فيه ناس تحكي- ونتابعوا ونقروا

هذا كان لابنائنا في بنغازي وفي مصراتة وفي بني وليد وفي الكثير من المدن الليبية الحبيبة دور كبير في هذه الثورة وسقط منا الكثير من الشهداء ولا احد يزايد على ذلك وعليك بزيارة مدينة بنغازي ومصراتة بالذات لتنظري كم خسرنا من ابنائنا فداءا لهذه الثورة المباركة

اما بالنسبة لعمران شعبان عليك الاطلاع على لقاء المقريف بمشائخ مدينة ورفلة وتستمعي لقصة هذا الشاب الذي تضاربت الاراء حول ما اذا قام فعلا بعملية القبض على الطاغية او هناك من كان معه خصوصا وقد خرجنا علينا الاخ من الشرق ومعه دبلته - فهو امر محير

بالنسبة لقولك ان كل حد يجي لورفلة يمسكوه - لا يا سميرة تعالي ومرحبتين بيك وتشوفي خوالي كيف يكرموك ومن لايعرفك يجهلك - لكن قولك ان ورفلة اسرائيل لا اسمح لك - ورفلة لم تعلق اي علم لا لامريكا ولا اسرائيل او اي دولة اوروبية - بينما علقت اعلام الدول الاوروبية وبما فيها اسرائيل في الساحات والميادين - بل رقص سليمان الفورتية وهو عضو الانتقالي مع برنارد ليفي اليهودي في مهرجان كان وهذا لا يليق به كعضو يمثل منطقته احتراما لنفسه وللاخرين - كونه ساهم في عملية الاستخفاف برسولنا الكريم صلى الله عليه وسلم اقصد برنارد ليفي -

وليبيا على خير ما يرام نتمنى ذلك - لكن اني مش باكستانية راني ليبية - اصولي مقسمة بين مدينيتن من مدن ليبيا الحبيبة -

كلنا يعرف مناطق ليبيا
كلنا يعرف من المستفيد من الطاغية مثلاً هل بني وليد ام طبرق ام الزنتان ام غيرها .
نعرف الان المناطق التي فيها الازلام و التي مازالت ترفع الراية الخضراء
ظناً ووهماً بأن سيدهم سيعود .
نعرف الان الماطق التي تجبر المارين بها بتقبيل صورة المردوم علي الدينار
انا لستُ من مصراته بل ابعد ما يكون عنها ولكني لا انكر الحقائق ولا احاول اخفاء الشمس . ولا اعيش في عامل افتراضي وهمي اشكله حسب هوى نفسي ، بل اعيش الحقيقة واري بعيني الواقع .

الطاغية كان داهية فى استعمال الشر واستعمال السدج خلى اللى شنقوا ظباط 93 وهجروا العائلات واستدعوه لزيارتهم كما تقولين وقدموا الولاء والطاعة هم ورفلى نفسهم عزيزتى عليكم بهم-

سجال عنيف ... الحمد لله إلى فى سلاح القلم ... فقط ... وإلا تحولنا .. إلى شهداء .. وإلا موتا ... أحسبوها زى ماتحسبوها ... المهم عند المولى عز وجل ... كيف مصنف الموته ..... هنا يكمن السر العظيم ... الذى لايعرفه ... إلا سواه ..... جل وعلا ...

هضا كلام الكابتن - ما نلوموش على الاعضاء- انت تسكن وين نحلف عليك عمرك ما زرت بني وليد ولا تعلم عليها حتى وين تقع - سألتك بالله وبمحمد رسول الله شفيع امته - ان تكتب قسما في هذا المنتدى ان ما قلته صحيح ورأيته بأم عينك ان ورفلة تجبر المارين بها بتقبيل صورة القذافي . أو أنها ترفع الراية الخضر.

اليوم فقط رجعت من بني وليد - المدينة آمنة مطمئنة - كل واحد من عنده محل فاتحه والمدارس فاتحة - الاعلام موجودة في المقرات الحكومية وفي البوابات الرئيسية وعلى ساريات الاعلام في المدارس -

لو ان يا كابتن الكلام اللي تقول فيه موجود المقريف زارها وزاروها عديد الوفود - ولعلمك المقريف زارها فجأة وبدون علما المجلس الاجتماعي لبني وليد -

الرجاء الاطلاع على اجتماع السيد المقريف مع مشائخ والمجلس الاجتماعي بني وليد موجود على اليوتيوب وانت تحكم بنفسك اما الحكم على الناس جزافا لايليق بهذا المنبر المحترم الذي ظننته يقف مع الحق -

لك يا كابتن كل شكري وتقديري على المجهودات التي تبذلونها ولكم الحق في كل شيء كون المنتدى يخصكم وانا متطفلة عليه- عليكم بمراعاة مشاعر الاخرين

اللبيب من الاشارة يفهم === وان غدا لناظره قريب === لن يطول اختفاء الحقائق وعندها لكل حادث حديث

الحلقة رقم 9999998848484



من حلقة الفيلم التركي عنوانه تحرير بني وليد