العين يشقا بها من يحملها

العين يشقا بها
من يحملها
ومن هو بعد تزعل ايجي ايجاملها
من هو بعد توحل ايفك وحلها
ايشيل العناء عنها ايروف عليها
عهود المحبه ايصون ما يخلفها
صادق الوعد وبالوفاء ايكافيها

من هو بعد تحتاج ما يخذلها
يبسط اليد ايمدها يعطيها

من هو بعد تبكي ايحيد جضرها
ايجفف الدمعه ويمسحه ماقيها

ان جاته شكتله منكسر خاطرها
ايطيب الخاطر ويجبره يرضيها

من هو بعد تمرض ايجي ايساولها
ملهوف منشغل ينشد ايسال عليها

بكلمه حنونه ايقولها ايطمنها
وبوردات حمراء عالمرض يلهيها

من هو بعد تشتاق ما يهملها
ايبلل الشوق بطيبته يرويها

وانت دواها فيك يا بلسمها
وانت شفاها بيك يا مداويها

انت زهاها في زمان زعلها
وانت هناها بيك ما اتخليها

انت المحنه ونبعها ومنهلها
من فيض ودك مالحنان اسقيها

انت عديل الروح يا مهمها
وانت خيال وطيف ساكن فيها

انت حياتي بيك يا مجملها
وانت حلم وردي يا سنا الياليها

وانت دليل العين فيك املها
البر السلامه شيلها وديها