ردا على سؤال الطاغية من انتم

قام الشاعر مفتاح بوعريقيب وعدد من الشعراء الشعبين بنظم ابيات لتعريف القذافى من نحن ..
على عبدالعزيز:
نحنا خوفك .....نحن الرعب اللى فى جوفك
جثامه مابين اكتوفك ...ياللى ماتعرف من نحنا
نحن يومك...نحنا قل هناك ونومك
نحنا كل اسباب همومك ...ومانك عارفنا من نحنا
نحنا ضدك ...نحنا ما نبوك ايسدك
طامع تحكمنا من جدك؟...لو صارت ما نبقوا نحنا
ا
ادريس التركاوى

نحنا دابك ...نحن شرطناه اكتابك
حتى كى نشيت اكلابك.. ما بينا نستسلم نحنا
ياناكرنا ...ليبيه ع الضيم صبرنا
لكن حن الله وثرنا..بيش ايقولوا لك من نحنا
من تحسابك ..صبيت وودرت اعصابك
واحنا كل اسباب وكابك..من جدك ناسينا نحن

مفتاح بوعريقيب

نحنا سيل ...امخلط بالهول وبالويل
ايغرب نين يشيلك شيل ...وساعتا تعرف من نحنا
نحن موتك ...نحن السم اللى فى قوتك
نحن الخوف اللى فى صوتك ...ياناشد من انتم ؟ نحن
نحنا جينا ...من فج وصوب تنادينا
منك ملينا كلينا ..صبر ايوب صبرنا نحن

خالد الزول

نحنا الاجواد ..اللى صبوا كى صار اعناد
عصاره مافينا حلباد ..ودون اترابه وطنى طحنا
نحن الاصايل ..سدك وانت فينا عايل
ملينا م الحكم الطايل ..وامصمم تبى تمسحنا ؟
نحنا ليبيه ..نقاره وضنا بيتيه
كم منك حاملين اذيه ..ياظالم نين تملحنا

احميده بوشنة
نحنا عله...فى جوفك والقلب اتسله
قول وفعل وما اتبله ...ربى خير اليوم منحنا
نحنا الفهايم ...شعب وكل خميسه صابم
موكيفك بالسلطه هايم ...صبينا كيف تملحنا
نحنا اجواد ..انواعد وانجوا عالميعاد
ان صار الضيم اجوك اشداد...سال الدم وما سامحنا

رائعه جدآ صح لسان الشاعر وكل الشكر للمشاركه