حكاية شعبية من التراث الليبي

من طرف **زهرة اللوتس** 2012-03-04, 12:57 pm

حكاية شعبية من التراث الليبي
الله يبعد الشيطان ..فيه هذاك الرجل ..في النهار راجل ..وفي الليل يبقي غول ..جا يريد يتيهل ..سمع عن ولية كويسة..سمحة..مشي لها ..وقال لها :يا بنت الناس..لي زمان ندور علي بنت الحلال ..نريد نكمل نص ديني ..و أيش رايك؟..قالت :باهي ..فيها خيرة ..داروا الفرح
أول ليلة خش عليها ..تحول ..و أنسخط غول..خافت ..حصلت غفلة م الغول طلعت من..جت لهذيك العجوز ..وحكت لها ..قالت لها العجوز:نعطيك مشط..و نعطيك إبرة ..و نعطيك ملح ..إن كان لحقك اعزقي له المشط ..و بعدها اعزقي له لبرة ..و بعدها اعزقي له الملح !!!!!!!
الليلة الثانية خش عليها الراجل ..تحول ..أنسخط غول..راحت تجري ..لحقها ـ عزكم الله ـ علي كلب ..عزقت المشط ..تما غابة قعد يقول :نا نكسر و كلبي يكسر نين نديروا في الغابة طريق ...شق الطريق
عزقت له لبرة..لبرة تمت حديد سد عليه الطريق ..قعد يقول :نا نكسر و كلبي يكسر نين نديرو في الحديد طريق ...شق طريق و لحقها
عزقت له الملح ..الملح تم بحر ..حال بينها و بينه قعد يقول : نا نشرب و كلبي يشرب نين نديرو في البحر طريق..لا روي و لا البحر نزح ..يشرب و يقول :نا نشرب و كلبي يشرب نين نديرو في البحر طريق أنفلق الكلب .. و أنفلق الغول........
*الغول ..و هو علي فراش الموت قال لها:
"والله نقعد لك كبش في ضان ..و سوط في غوط ..و بلحة في تمر "
مات الغول .. أفتكت منه ومن جرا يره ..أهناك الجوايز أمغير يهدن العمر..وين ما تمشي الولية سارحة بالضان يـنــطحها الكـــبــش .. ويــــن مـــا تســرح ينطحها ..سيبت الغلم !!!!!
وين ما تمشي تحطب يشلطها سوط .. ما تعرفه منين جاها ..كي تمد أيدها للعود يشلطها سوط ..روحت بلا حطب !!!!
هذاك النهار جابت طبق تمر .. تمت تأكل ..غصت في بلحة و ماتت !!!
( لا ربــــح الـــــنـــعـــام و لا طــــارده )
ناجيت جاي ...و هم عدوا غادي
مرحبة بك ..أنتي خير منهم