اعزاز باعدوا------

قصيده للشاعر
--احمد ارميله--
وينما انريد انجيها********نهاب جيتي لدارهم وماهم فيها
اعزاز باعدوا
وينما علي ايبانن********منازل ابوادي قبل فيهن كانن
نواجع اسماح امكردسات ادانن****عندي العين يضايق سما ماقيها
تذكر وجوه اصحاب ماينهانن*****يبقوا اتقول ماغابوا نهار عليها
غرايره ان كان شافواظروفه شانن***نزيلهم امنين جاهم ايجي ماليها
وينما نهار انعدي************لدارهم وهي خاليه انجي متكدي
ماتقول حقت نجع داير سدي******اذواده ايجيبك من بعيد زفيها
الطارف اللي ماله دروب اتودي*****هلها يخبروه امنين جا بدريها
للخالي اللي فيه الغزال امجدي******معاليه نوار العفا كاسيها
وينما انجي لجباها************دار بوحداجه ع الكتوف سفاها
انطول ونا قاعد ونا انحوس احذاها****وهي له مدايد منتهي ذاريها
ياما ادانن هنا بين اعلاها*********الدايم الله ايبالها وشويها
حكينا علي ناس الزمان فناها******واحنا اسنينا مسع كمل باقيها
وينما انجي لجباهن***********ديار بوجدايل ع الكتوف سفاهن
نقعد انقول ونا انحوس احذاهن*****الدنيا امفيت الله من واليها
وين هل قصور بادن وقاض بناهن****عليهن رسوم فيهن بدع ناشيها
ووين هل نجوع كانن شهير نباهن****ووين الصحابه والرسول نبيها
وينما انجيها جايل************ديار بوسالف سفاه جدايل
وهو له مدايد من جباهن جايل******مسافه كبيره لاوره نمشيها
ورا زول دونه وقت ماضي حايل*****وحالت اسباب اخرى ومانبيها
وناره قبلي كم واحد قايل**********اللي فالحياه اتسير لك تحكيها
وينما انجيهن طارب************ديارهم نعاود من جفاهن هارب
القيته بعد لولاف سوقي خارب*******طيلة ايام الحول ولياليها
وسامع وناظر فالحياه تجارب********تدور ع اليمين وع اليسار ارحيها
ودروب خيرها ان رضيت يديرن سارب***وان كان برمت تاخذ اللي تعطيها
وينما انجي زايرها*************يبانن امواير بيش نذكرها
منازل هذيك اللي نظيف بشرها*****اللي قبل كان العقل والع بيها
حزام من تنال الفوز يوم ندرها*****ان فاجت ايجي داير وجيج نصيها
تجوشن امنين قرن الركاب طقرها****تعجب الناظر عند شيل ايديها
غريب وصفها سابق متين ظهرها****اموالف علي جيب الثنا راعيها
وينما انجي زاير منازل هلها*******ونا كنت ناسي سيسبان عللها
اخطور من اسفن ع الكتوف خجلها****يكثر ونمشي علتي كاميها
ستين سنه بين عقابها واولها*******مرن وعدن ياشقا قاريها
سيرة اولاف طول الخلاف قتلها*****متخاطيين كلتنا مشى في جيها
وبوعقل قالوا قبلنا قايلها********را النار ماتاكل الا واطيها
وينما انجي لمكانه**********نبقى اتقول زاير ياعرب جبانه
فريق حفر ناياته اغبي سبحانه****نذكر سهاري خاطري ناسيهن
امعا من ايعدوا قرعة الجيعانه*****هنيه اتبات وزادهم ياتيها
الجار لطرفي جيرة عمام فلانه*****لو كان تبقى تنشرى يشريها

---------------------------------------------------------------------
وسلمتووووووووووووووووووووووووووووووووووووووووووووووووووووووووووووووووووووا

وبوعقل قالوا قبلنا قايلها********را النار ماتاكل الا واطيها
وينما انجي لمكانه**********نبقى اتقول زاير ياعرب جبانه

صح لسانك يااسماعيل

مشكور على القصيدة الرائعة جدا

ربي يحفظك ويسعدك ويجعل حياتك كلها افراح

مشكوره دلع على مرورك والاهتمام
---------------------------------------------
-----------------------------------------
--------------------------------------
------------------------------------
لك مني اطيب الاماني

رائع ماقدمت أخي الفاضل وصح لسان شيخ الشعراء

تسلم انت والشاعر

مشكورين المارد الاصفر وبوحميد على مروركما الكريم
---------------------------------------------
لكما مني اجمل واطيب الاماني