رد الشاعر عبدالواحد الجنجان الوافي

السلام عليكم

هذه القصيده من اشهر القصائد عن عصر الاحتلال الايطالي حيث هاجر كثير من ابناء الوطن الى عدة جهات ( مصر ,تشاد , تونس و الجزائر) وفي احد الايام ارسل مجموعه من شعراء ورفله ابياتا من الشعر الى الاخوه الذين هاجروا الى مصر وهذه بعض منها:

سلامي عليكم يا أبعاد الردة .. علي قد ما علم الفجر وعدا
يا عزاز عليا ....... يا ساكنين الشرق والمصريه
عيني عليكم بالدموع سخيه .... تغرد كما مفطوم فاقد وده
يا أبعاد الجيره .. يا راكبين الكوت والقنتيره
طالب جدا مولاي ما حد غيره .. اللي باعده غوش الأحباب يرده .

بعد وصول هذه الابيات الى الليبيين المهاجرين الى مصر , رد الشاعر عبد الواحد الجنجان ( وهو من قبيلة اولاد وافي وخواله قذاذفه, قبل هجرته الى مصر عاش في المنطقه الوسطى مع خواله ولهذ السبب فأن البعض كان يضن انه قذافي .عبد الواحد الجنجان كان يكن احتراما كبيرا لقبيله ورفله ) وهذه الابيات التي ارسلها عبد الواحد الجنجان الى ليبيا ردا على الابيات التي وصلته :


سلامك جانا .. قبلناه وأقبل للسلام أوزانه
من حيش سلتنا كان يوجعك مطرانا .. نعلموك عاللي صار بالمسوّدة
جينا لوطن الذل وطن الهانه .. وطن عيشته بالعرعده والكده
عليه ما قدرنا والرياف طنانا .. واللي معاه غيريه ذبل وتردّى
وياما بنا نردوا علي مربانا .. لكن النيه قاعده منصدّه
جا بينا حاكم ثقيل قرانه .. وحنا جدنا قبل معادي جده
واللي جلا م الوطن فات مكانه .. بعد جلوته تصعب عليه الردّه
والموح رايد به الله سبحانه .. والعبد تحت الرب موش بيدّه
مراجيين بالك ما يخيب رجانا .. كنّيبها تفراج بعد الشدّة

سلامك واصل .. يلي قطعت القول ع المفاصل
عرفناك زول محب لكن حاصل .. والحاصل يسلّم م الجواد العدّه
والحب لا كان بدي مستاصل .. لا يهون لا ينسيه طول المدّه
سلامنا ع القايل .. ونسالوا علي اللي عن جبانا سايل
والمحبة اريثه والقلوب دلايل .. واللي يودلك شيء بيه توده
ولولا اللي بيناتنا جا حايل .. واجب علينا شبحكم لا بده

شرفتنا بمعلّه .. وسلامك سليم العقل بيه تسلـّى
وسلامنا علي جملة جبا ورفله .. كبار الدما يومة دعاك الغدّه
قولولهم هالبت ما تجّلا .. وهابلت ما تدرب اللي منسدّه
ويهلك المولى خاطيين المله .. واللي عدو للدّين يكسر يدّه
بوعقل ما حلا ينسى خوته .. ولا هناك من ينسى خواية جدّه
ما هناك من ينساكم .. علي بعدكم ران العقول معاكم
يا لذاذ في العشره وفي دنواكم .. يا عز وين الحرب يضبح قده
وقسناه ثاريت المعاش بلاكم .. كيف هاللي يقولوا معاش الهدّه
مانا عقول ضراري .. ولاهو حمار الليل بينا ساري
ولابان من يغني علي المتواري .. ولا نغيّروا صاحب قديم بضدّه
اللي فيه عقل يا بعاد الذاري .. منين تخطروا يبكي بكا من جِدّه
مفيت ما عليكم مالناش سهاري .. يا خيار بر طرابلس من حدّه
هذا سلامي في الورق يوصلهم .. اللي ينشدوا عن حالنا يشغلهم
اللي يكبروا لاجيتهم في هلهم .. اللي جارهم بالقدر هو والمبدا
اللي ملاح لاصار الخزز في بلهم .. تجي قومهم بالصولبه منهدّه
اللي بناك من لاويل من منسلهم .. اللي طفلهم عصران ما يجدّه
أمّـا يقتلوا قبالة اللي قاتلهم .. وإلا يصنعوه من غير وخذ مودّه