سبحان كيف هنتك وهاونتينى..

من طرف الفهد 2010-08-23, 11:31 am

يقول الشاعر سيف النصر عبد الجليل صاحب اللازمة:
سبحان اللي هنتك وهونتيني... ونسيتك بعد ولعات ونسيتيني..

يضيف الشاعر الشريف السعيطي :
سبحان كيف توازي ..
غلانا اللي مفهوم في مركازه
العقل كان شورك غالب الحزازه
وانتي تعاندي الحسود وترضيني
وسبحان من هون ع العزيز اعزازه
ويفوت يوم لا نطريك لا تطريني

سبحان كيف تغير..
والياس في غلانا لا بطا لا حير
ياما جري ريدي وياما نير
وياما سعي في كل ما يرضيني
واليوم شانيه وين الزمان أدير
أنجي نقابله بالوجه ما يعطيني

سبحان كيف هونتينا..
ونسيتك بطول ياس ونسيتينا
حسود الغلا منظر وصاغت عينه
وصار الياس والخطا م الأثنيني
وسبحان ما حكم مولاي في تكوينه
اليوم ناكرك وانتي نكرتي ديني

يضيف الشاعر معتوق ادم الرقيعي يقول:

سبحان كيف قسمنا ..
بعد الغلا هو كيف صار خصمنا
وليش انتي ونا ساهمنا
وعليه لا لمتك .. ولا لمتيني ؟
وليش نركنوا للياس نين حكمنا
وهو قبل ما يقدر حذاك يجيني

سبحان كيف صبرتي ..
وكيف يا مرادي ع الخلاف قدرتي
زمان في سبيل ارضاي ياما درتي
حتي للشروط الواعرات تليني
واليوم عن طريقك لولي حودتي
بلا عيب درته فيك عاديتيني

سبحان كيف تحول..
غلانا اللي هو كسبنا في لول
ربيعه زهي واجد وخيره طول
أياما وكانن مقبلات سنيني
واليوم فيه ياسك بالخراب يعول
وصافن خضاراته قبالة عيني

سبحان كيف نسيته..
زولك اللي في الخلق مسع ريته
واليوم ناكرك يا حلوة التبهيته
حتي لو طروني في علل تعنيني

سبحان كيف نسيتك..
وهو كيف جاني صبر نين خطيتك
أيام قبل ما نزهي الافي بيتك
نا حرك وانتي زاد ما تهنيني
اليوم من سريب غلاي طارت نيتك
وكي بضاعة اسرائيل قاطعتيني

سبحان كيف تلاشي..
غلانا وفيه الياس حط وباشا
والقدر بينا تما مغير شباشه
ع الحال تبرمي حتي ان لاقيتيني
ما نحسبوه يصير يا دوداشه
الخطا بينا وانتي عليه تعيني
أنسيت ايامك..
وأبقي شطب في دفتر غلاي كلامك
وزالت ماهيته جمال قوامك
وهو قبل ما يقدر حذاك يجيني
الياس قاطره ذوب عقاب غرامك
اللي قبل ما يقدر حذاك يجيني

أنسيت منابك ..
ةانتي زاد من شوري قفلتي بابك
لا عاد تشقي بي ولا نشقابك
أنتي دنقري ونا انواطي عيني
حتي بيش نقار الغلا يحسابك
لا قبل ريتك يوم لا ريتينى

من طرف التمساح 2010-08-23, 11:43 am

بالفعل تعتبر موروث شعبي من شعراء لهم قيمه في الشعر الشعبي
ولكن نحن في رمضان ...مشكور ياغالي

سبحان كيف هنتك وهاونتينى..

سبحان كيف هنتك وهاونتينى..

رد: سبحان كيف هنتك وهاونتينى..