مطلع هذه القصيدة للشاعر : ابراهيم بوجلاوي:

ماتقول حاشت ليلة .. علي نجع يطامن احذاه نزيلة ..اخلي مراحها
ما تقول هلها كـــــانو .. ولاتقول في علو البساط ادانو
ولاتقول شي حطن نواجع بانو ... شيابنا وشيابهم سياد المـيله
ولاتقول شي جدي الغزال اقتالو ... في وطـن خالي في وطاه محيله
اليوم ينطـرو تمو بكلمة كانـو ... ورا الدهر يقلب كل عقد بجيله
خـذتم الدنيا كلهـم ودفانـو ... حزتهـم لحـايد واثقة وثقيله


لا تقول كانو هلها ... ولاتقول شي حاشت اعراض شملها
ولاتقول شي وقت الهواج جملها ... انزوم رعد في مزن جارف سيله
ولا تقـول شي عند العصير بهلها ... ميار بو حريك الزين خيرة جيله
ولا تقول داره في السلـوك نزلها ... وقـت الربيـع امناته الخـويله
ولا تقول شي شور العيون سكلها ... في اخشوش مايو م العطش تاتيله
قديمـه الدنيا عارفيـن عللـها ... حتى لو زهـت را الهـا تمييلـه


ما تقول شي كسبوها ... ولاتقول شي حاشت ولا رعوها
ولاتقول شي مدت ولا ساقوها ... شـور الظهر والدير في التقبيله
ولاتقول شي دار العفا انزلوها ... حومت الحلق والدير بتشوكيله
يتاوق هللها وين ما اطلقـوها ... ربيع حومت النويبات هي تمشيله

من وادي المرا والغاطسه جابوها ... مقـادير فيه امـربعه الهميله
متقنزع وبرها وين ما لقيوها ... هي والغزال رياض فيه اكحيله
ابعيني القـود امعقله شالوها ... هي والبقر سـوقها عمر تدليله
وغابو اللي كانو الا يحموها ... ركابت الكوته اللي شلوق تليله


ولاتقول شي يعــــــــرفه ... ولاتقول كاسبها ولا يوصفه
ولاتقول خشبها دروق الدفه ... ابراهيم بو الوصلي قليل مثيله

ايجي مجـريد القافلة حـادفه ... وحمولها صعيدي سف في التكييله
والبل امـغير انشد اللي يعرفه ... كانت اتشيل النقل هي الوسيله
غابو اللي كانو بهـم توصفه ... روادة الدير اللي طفش زغليله
اليوم وقتا عاكس وصارت لفه ... سايبينها تـمت ادور ظـليله

قصيدة سمحة والله ... شكراً ياحمدي
ما أتقول فيهن كانوا أسماح المنازل وين ما يدانوا اجواف يصهدن

ولاتقول شي يعــــــــرفه ... ولاتقول كاسبها ولا يوصفه
مشكور على المرور الطيب

مشكور على هذة المشاركة الجد قيمة وانت دائماً مميز بكل ما تأتى بة من جديد ورائع موفق وفى انتظار القادم منك واكيد القادم اجمل