الخاطر يوم رحيل ايناس

الخاطر يوم رحيل ايناس



.تخولط حاس..بقي منهاس.. طريح ويلفظ ف الانفاس
الخـــاطر يــوم فراق الزين..بقي مسكين..دموعه سالن ع الخدين
بقي مليوع وحـــاله شـين ..بكل احســاس ..علي ريـدي يذرف لا باس
خيال انسان بقي ف الحــين ..رحيل ايناس ..مخلفله في العقل مسـاس
سقط طايح جاء عالركبين ..بعبره غاص ..فجيعه ما ليهــا مقياس
الخاطر يوم رحيل ايناس..تخولط حاس.بقي منهاس.. طريح ويلفظ ف الانفاس
الخاطر يوم رحيل منــاه .. بقي غير يـذرف ويسيل
حياتي ويش تسوى بالله .. بلا ريدي بـو دور طويل
نهار رحيل انظاف عظـــاه .. خذا ليلــه يذرف ويشيل
يهاتي يجبد في ذكراه .. اللي زينـه مــا ليــه مثيل
عليه كاتب ربي مـــولاه .. فراق اللي غالي بـالحيل
فراقه في حاله خلاه .. ينين تقول امغير عليل
تعب واجد صوبه كـــداه .. بقي غير ينــوح ف الليل
علي مكتوب نحوس بـلاه ..وضيم وياس ..يحط علي من دون النـاس
الخاطر يوم رحيل ايناس..تخولط حاس..بقي منهاس.. طريح ويلفظ ف الانفاس
شهـــادة يا مناي وداعك .. مخليني كيف المجنــون
نكلم في روحي نعـارك .. عياطي كي عياط القزون
يشالي حاله مـا يسرك .. ونا كيفه حالي بـــلهــون
امنيتي لو مـرة انضمك .. لصـدري يا ام قليب حنون
اليــوم شـــلاتيتــه شــرك .. علي غيابه ضاوي الجبنون
اللي نـــربط يلفى ويفــك .. صــوابي بخزرتهن لعيون
فحل يرزم تم بـــارك .. سكاكينك بيهن مطعون
الخاطر يا مناي تهتك .. رحيلـك خلفلـه لظنون
نــرايـــف ونجـــي لديـارك .. النقــارة يصبوا من دون
فراقك ســـاقيني سمــك .. ملكتيــه القلب المسكون
نهيته مـــا يـمشي شورك .. حلف بالله زولـــك ما يهون
وخششني ف شانك مسلك .. ضلمته يا ضاوي الجبنون
القي روحه في وســط شبك .. عليه التموا يــا مرهون
الدور أسود لونه حـــالك .. مع النسمه اروع مــا يكون
يكنس في الارض يعـــارك .. ومروي بعطورة مـزيـــون
وخد وهدب تقول حســـك .. وحاجب قابل فوق عيون
ومبسم في القلب يشــرك .. يبـانن فيه بياض اسنون
وهابا لو كـان مسوك .. تضلي اللي عنـده واشون
وشفه زادت من نـارك .. لذيــذه عنـــابي في اللون
ووسطك في البخت مشارك .. وياربي نا نريد العون
وذرعان تقول سبـايك .. بهن لنقني نا مفتون
ومشية ضابط جيش مسك .. قديم وعــارفهن لفنون
الحاصل نا قلبي حبـك .. شهادة يا ام الحس حنون
نعبر في يوم غيـــابك .. الله عالم باللي مكنون
وداعك لدمايه ســافك .. حلال علي شــانك ويهون
بحر واسع عني حازك .. عليه بغلي نــا مشحون
العـــازي صبالي دونك .. وقاهرني قليبي مغبون
يحيرن يـا مناي فلايك .. أمـــواج اليم يصبن دون
انقطعن مـــا جن اخبارك .. وماتخـــافي صوبك مصيون
اندير جـرايم في شانك .. نعـاند مـــا يهم القانون
ويـــا ويله هاللي ضرك .. نخربلــه بيته الملعون
الله غـالب ما فيها شك ..أمغير فلاس ..علي حايز بو دور أكداس
الخاطر يوم رحيل ايناس..تخولط حاس..بقي منهاس.. طريح ويلفظ ف الانفاس
يوم فـراقه يوم عجب .. مخلي دمعـــاتي تبدد
عذاب من الله كيف انصب.. نهار رحيلـــه سمح القد
لا ينفـــع شيخ ولا طب.. الماقي جي دمعـــه منهد
يذرف مـــا بطل ويصب.. علي زوله بو هدب اســـود
اللي خلى الخـــاطر يندب..اللي مـــاريتش كيفه حد
اللي صوته واجـد يطرب..اللي نرخيلـــه كيف يشد
اللي فيهــا خزرة تنحب ..اللي حاملـــه كل الود
اللي فراقه حـــالي شخشب..اللي طول ما عادش رد
اللي فيها يقـــابل شـــارب .. اللي صوبه ع الكون يبد
اللي خلى عيـون نحايب.. اللي فراقي مــاهو قاصد
اللي كيفه الريـــم جلايب..اللي عيونه تــرزي من جد
اللي خـــلاني مصلب .. اللي زينه هــالب كل حد
اللي فراقه يـــا ناس غضب..علي مسلط مــو بـاليد
اللي فراقه المولى كـــاتب..اللي صوبه ماني جــاحد
غني بعيالـــه يقـولوا حب..وحــل في صوبه ويعرعد
جنانه بالورد مخضب..اللي حل اربـــاطي وشارد
اللي خلى الخاطر تاعب..اليوم خلاص..علي سيطر خـــايل للباس

مشكور بارك الله فيك
تقبل مروري

شكر ا علي مروركم وتقبلو تحياتي وتقديري