ينصركم الله يا أبطال يا ثوار

ينصركم الله يا أبطال يا ثوار

لشاعر مطرود الجبالي المغربي

ينصركم الله يا أبطال يا ثوار....ويهزم علي ايديكم اخباث المله
الله يعزكم يا دم حر وحار....واللي ذلكم ناوي الله يذله
يا جيل جاب لليبيا الفخار....وبيه راسها شامخ لفوق تعلا
وانتوا شرف نظف سنين العار....وفزعة اللي مقهور فشت غله
ارحم بطن شالتكم تريس احرار....نهضتوا بلاد اطرافها منشله
اليوم ريت فيكم روح م المختار....اللي من عتاد أيطاليا ما ولى
الثوره الثوره هذا يوم الثار....هيا نداووا ليبيا م العله
جيناك يا مجنون (بومنيار)....انت وشلتك يلعن الله الشله
يا نجس يا كذاب يا غدار....يا ابليس في صورة انسان تبلى
افهم حشا من يستمع يا حمار....اقلب خلاص الشعب وجهك مله
شر ونكد ومرمده وامرار....مشن اسنين بفكارك اللي منضله
(معمر) وما عمرك نويت عمار....كافر علي امة مسلمين تولى
حاربت دين الله بستكبار....وعمره لسانك عالنبي ما صلى
يهودي ودرت مدار ما يندار....حتى م اليهودي في ارضنا المحتله
حكمت ليبيا بشلة انجاس اشرار....مصاصة دماء داروا اسماك مظله
راسمين خطه للبلاد دمار....وللشعب جهل وفقر منكم لله
دفنتوا الناس الصادقه الاخيار....ودرتوا اذيول اعقولها مختله
فوضى وفساد وكل يوم قرار....دولة عصابه بالعرب تسلى
نريدوا معاهم يا الله نهار....نين من سمانا غيمهم يجلى
ليبيا عليهم نشعلوها نار....جهنم لهم ابوابها منحله
وتصير يا معمر جثتك تذكار....كيف ما جسد فرعون ربك خله
ثوار يا ليبيا عالعهد باستمرار....نين يتحرر وطنا هو كله
معنا الله انكملوا المشوار....واللي معاه الله تسهله