في وحـــــــــــــدتي

من طرف اسماعيل ادريس 2011-11-13, 1:25 am

فى وحدتى ناديتك ...فى وسط ليلى وغربتى ما القيتك
وبدمعه حنونه حايره ناجيتك
فاضن عليك اشواق يا شاغلنى

انجيب سريبك...ايهوج الحنين ايجيبن افكارى طيفك
ايهفن معا الذكرى نسايم صيفك
وتكبر امعايا نار يا ظالمنى

ايقل منامى ...وتسهر اعيونى وصورتك قدامى
مشتاقلك يا خزرة اعيون الدامى
حتى السهر و الليل ما حاملنى

اطاول موحى...ذبلن اورودى صافن جناين روحى
بأهاتى وأنينى تنزف غزيره اجروحى
جيب الدواء دونك كذه رممنى

مانى صافى ... تاه ع الموانى مركبى ومجدافى
ضاع المنار وضاعت طريق اولافى
خاب الأمل غايب دليلى عنى

طال رجايا... واجيوش ياسى امعسكره ياليا
قنديل الغلاء زيته كمل يا امنايا
~~~~~~~~~~~~~~~~~~~~~~~~~~~~~~~~~~~~~~~~
وسلمتوووووووووووووووووووووووووووووووووووووووووووووووووووووووووووووا