ما نفكر فيك لكن حواسي كلها تبيك لو كان بيدي

لو كان بيدي ما اخترت غـلاك
لكن حواسي كلها تهواك
إن غبت عني تاخذ العقل معـــــاك
وإن جيت وقتي تشغل أفكاري بيك
نا يوم شفتك سميت روحي افداك
وحلمي أنموت بس بين ايديك
لو كانك اللي تنتسى ننســــــــاك
وفي نسياني ننسى أني ناسيك
لكن مشكلتي حتى ونا يـــــــــلاك
أيزيد شوقي واللارياف عليك
أنخاف نرمش وين ما نلــــــــــــقاك
وأتضيع نظره كانت دسيسه ليك
شي غريب يملكني بلا مسعـــاك
شي أيخليني أن بعتني نشريك
عندي رضا والدي ما يجي في رضاك
نخسر جميع الناس لو أنعدها ترضيك
حبك في أستوطن ودار أمـــــــــــــلاك
في كل أرجاء الجسم تلقى اللي تعنيك
اللحظه اللي تعدي علي بلاك
ينشل ذهني فيها ويوقف بلا تحريك
أنهاب الفراق وأنعده مع الهلاك
وأنهاب غيري في الحياه أيغاليك
حبي لك تخطى حدود مداك
شعوري أتجاهك متحصن من التفكيك
تعرف أنكان جربت في جفاك
يقتلني بكاي وف القبر نبكيك
لا تخليني أنذوب في مرجاك
لا تجبرني ف الدعا نشكيك
لا تشمت في م الناس هذا وهذاك
لا تنفض أشواقي وقت ما تحويك
عبرني أبسمه من فتات هناك
ونا أسنين أفراحي كلها نعطيك
أتصدق ما عندي أفراح ف الحياه لولاك
أنت أفراحي وبكل الرجا غاويك
ما القيت حد في قيمته يسواك
عيونك تساوي الكون يا بال عد باقيك
سبحان ربي كيف من بين الملك خلاك
أتعيش معانا وتترك ف السما ذاويك
حقك تنغر وحقه اليوم حلاك
كل العالم أتقوله لبيك
أمير في ذاتي وخاطري علاك
وملكك أشياء ما لها تمليك
الروح والقلب والفكر عطاك
و أبيات الشعر الغاويه يهديك
إنكان ما بداخلي اليوم ما كفاك
أرجوك تطلب وايش اللي يكفيك
أطلب ونا نحقق جميع أمناك
إلا شي واحد فيه ما نلبيك
لا تطلب عيوني ف سبيل هناك
إن خذيت عيوني كيف نقدر أنراعيك؟
~~~~~~~~~~~~~~~~~~~~~~~~~~~~~~~~~~~~~